{ عفـــواً ماعندنا ميـــزانيــة ~

[شمــــــــوخ]

::

يسعد مسائكمــ بالخيرات

الله حي هالخشش كلبوووها ..


{ مَدْخَل ~

عيني على الزياده يابومتعب ,, وجت الميزانيه والأسعار الناريه :(8


8

ابد ماسوى فيني شيء شاعر المليوووون :D

بصراحه متوهقه ماعندي مقدمه غير اني منقهره من اللي يصييير ,,

أكييد تابعتوا الميزانيه والأيرادات والخرابيط ذي كلها وعلى قولتهم الميزانيه هالسنه أحسن من السنوات الماضيه بكثير وتبع هالميزانيه أشاعات بزيادة للرواتب ومدري وشوو وللحين ماشفنا شيء << خشه منغبنه

وتحسين مستويات المعلمات الضعيفات اللي مثلي << عيني بعينتس اشوف
وبرضوا ننتظر ..

الميزانيه بعيون الأطفال :

آبفهم شيء واحد وشدخل حليب الأطفال يوم يرفعوووون سعره عليهم وش ذنبهم طيب ؟
يعني هالزياده بالسعر بتقوي دخل الدوله والا وش السالفه ؟

واتفاجأ عقب بخبر يقوول :

صدر قرار ملكي دعم مقطوعه للرز المستورد بألف ريال للطن الواحد وحليب البزارين اللي من ريالين الى 12 ريال للكيلو غرام
<< ياترى حليب النيدو معهم والا ؟

يعني الرز راح يقل سعره بنسبة 25% تقريباً

انا ماقهرني غير وزير التجاره يوم يقول الأسعار عاديه ..

طيب آمنا بالله بنخلي الرز الرصيص :D على جنب والحليب ونجي لمشاكل كثثيره يعاني منها المواطن

مثل أرتفاع الأيجارات والمنتجات التموينيه وحتى مواد البناء أرتفعت
وكثير أشياء كسرت ظهر المواطن ..

هذا غير المدارس عندنا تعالوا شوفوا الكراسي بمدرستي بس خخخخ تكرسفت منها
كم مره من دخلت المدرسه للحين

واذا قلت للمرشده قالت تخبرين الوزاره ماعندها ميزانيه تجيب كراسي جديده .!!:(

وفي يوم كان عندنا حفل أمهات بالمدرسه وموجهات حاضرات وكان لازم نحضر دعوات لهن ونطبعها رحت للطابعه فوق اقلب فيها مالقيت والا ورقه وين طس هالورق ؟
وآروح لغرفة المديره :

قلت لها وين ورق الطابعه قالت لي: ليش وش تبين فيه << قلت ابد بصور جنبه الله يسلمتس ومير تكوش علي
قلت: بصور دعوات الأمهات يعني شبي فيه!!

قالت: والله منتهي الورق روحي اشتري وتعالي صوري قلت وجع اصور من حسابي

كل ماجا حفل أروح آصور 500 ورقه وأوزعها على المدرسه كلها وين الورق اللي يجي من الوزاره قالت: طلبنا منهم وقالوا دبرن نفسكن مافيه سيووله .!!!

<< حشا موب وزاره ذي

المهم صورتها برا على حسابي طبعآ تكلف فوق 100 ريال موغاليه بس مابيهم على قولة أمي يطيحون فيني
<< دايم تهاوشني لايطيحون فيتس يالخبله :( << أسألوا العيووف عن ترجمتها خخخخ

يوم جا الحفل رتبت له وغير اني مسويه ديكور الطاولات على حسابي الخاص لأن مافيه ميزانيه على قولتهم
وكتبت العبارات برضوا من حسابي ووزعت نشرات مسويتها برا ..

ومشى الحفل تمام التمام ويوم جلست عند المسرح والحفل توه بادي
الا توقفني وحده من هالأداريات:

وقالت لي: لوسمحتي وين الحلويات والشعبيات اللي بوزعها على الأمهات
أنا عيوني صارت كذا :sm71: قلت وشوووو وش قالوالتس ياحبي مكتوب على خشتي فرع القباني والا جهينه :D
قلت ياعيووني والا مو من اختصاصي لايكون اكد على ضعووف وأنامدري
راتبي كله طار على طلبات المدرسه وبعد تبون حلويات الا ماتبون بعد عصيرات فرررريش :D

::

هذا غير القطات اللي تصير بينا علشان نجيب مكيف لنا زي الناس والا نجيب ثلاجه خاصه لنا بغرفة المعلمات:cool:

::

الى هنا ويكفي واجد البلاوي عندنا بالمدرسه وأذا قلنا شيء او طلبنا قالو الميزانيه ماتكفي والا ماعندنا سيووله

طيب وبعدييين ؟

فلوسنا راحت برا ومدارسنا رايحه فيها ومتصدعه وبحاجه لهالفلووس

اللي كل ماجاهم رئيس يسترفد :D عطووووه << لاعاد تتحمسين تكفين

ولاجت الميزانيه زينه قالوا صرفنا كذا وكذا للمدارس ولاشفنا شيء منها للأسف ..!!

مدري وين تروووح ؟

::

آقول ان غبت عن المنتدى أسألوا عني يمكن يصير فيني شيء عقب هالموضووع

::

لاحد يناشبني تراني كاتبه الموضووع وانا معصبه


~ مَخْرَج }

" سبحانك اللهم وبحمدك ، أشهد أن لا إله إلا أنت أستغفرك وأتوب إليك "


حرر اليوم :

4 ذوالحجه 1428هــ

شمـــــــــــوخ

::

[شــامخ]

اخــتي شـــموخ


جبتيها على الجرح ولو بطريقه فكاهيه


الزيادات الاخيره اللي في دول الخليج احرجت الحكومه بشكل كبير


100%100

70%100

50%100

ياترى كم راح تكون زيادتنا هذا اذا فيه زياده

15؟

20؟

40؟


وبعدين راح ترتفع الاسعار من جديد



اذا لم يوضع قرار صارم بعدم رفع الاسعار ماراح نستفيد شي


: خــارج النص :

وصلني ايميل قبل اسبوع مفاده ان البليده عفواَ البلديه اقفلت مخبز لرفعه اسعار الخبز لريالين (يعني مايكفي انهم ينقصون رغيف او رغيفين من الكيس الواحد)



بغض النظر عن الارتفاع اللي جاي من برا


لما يجي التاجر يستورد بضاعه من برا ويلقى سعر ( الكونتينر) ارتفع للدبل اكيد راح يرفع سعر البضاعه لتفادي الخساره


لكن التجار اللي يرفعون الاسعار هنا وتبريرهم انه الارتفاع من برا والسبب الحقيقي انه اللي على شاكلته من التجار الجشعين رفعوا الاسعار وهو جيزه بجيزهم لازم يرفع وابناء بلده عمرهم لاياكلون ولايعمرون





الوضـــع مــزري لابعد حد





( مــاعاد نبغــى بالرواتب زيـــاده @@ اللي نبيه اليوم تخفيض الاسعـــار )



مشـــكوره اختي شمـــوخ حتى انا والله مرتفع ظغطي



لكن الشكوى لله

[هندي المقبل]

اختي شموخ

جميل هو اسلوبك في الطرح لك جل الشكر والتقدير

عند صدور كل ميزانيه ياخذ التعليم نصيب الاسد منها "ربع الميزانيه"

وللأسف ان التعليم عندنا في الحضيض ولا نرى في هذه المدارس شيئا من هذه المليارات التي تدفع

هناك الكثير من المدارس المستاجره
وهناك الكثير من التجهيزات الضروريه بالمدارس ناقصه فلا معامل ولا تجهيزات اداريه مكتمله

والادهى والامر ان اكثر من نصف المعلمين والمعلمات عينوا على مستويات اقل من مستوياتهم المستحقه منذ اكثر من عشر سنوات واغلبهم يؤخذ من راتبه ظلما 2500 ريال شهريا

والوزاره لم تسعى لتحسين مستويات هولاء المعلمين وتعديل مستوياتهم الي المستحق

كان تعيينهم في السابق بسبب ان الميزانيه لاتغطي وكان البترول ب10 دولارات فقط الآن البترول ب100 دولار
وهناك فوائض كبيره في الميزانيه لماذا لايعطي المعلمين حقوقهم ؟!!

الفائض يعني زايد عن الحاجه ؟؟ وهناك مواطنين لم يأخذوا حقوقهم !!! فكيف يكون هناك زياده عن الحاجه ؟!!!

وهذا ما ادى بالتعليم الي الهبوط الي الحضيض بسبب تجاهل المعلم وعدم الاهتمام به نهائيا من قبل هذه الوزاره

نسال الله العون

دمتي بكل ود

[فهد الشافي]

تحية طيبة اختي شموخ

..وليش معصبة مع ان الميزانية للدولة من افضل الميزانيات

..لاسيما وان نسبة عالية منها لقطاع التعليم

..ولماذا نستبق الاحداث نتفأل بالخير افضل

..يمكن مع السنة الهجرية القادمة ان شاء الله يبدأ تحسين مستويات المعلمين ثم المعلمات....

..اعتقد يا شموخ انكي تأثرتي بإشرافك على المنتدى ....فارتبط بإشرافك على انشطة الطالبات

..فنصيحة ترى ما احد سأل عن الاعمال التي تقومي بها ..وانا اعتقد انكي تقومي بها لرفعة شأن المدرسة...ولكن هل يوجد تقدير لما تفعلي؟

..من قبل المديرة!!!!!!!!

..احسن شئ المعلم يقوم بعمله ولا له بوجع الراس...إلا اذا وجد مدير يقدر مايعمله......وهو قليل ان لم يكن .......نادر في هذا الوقت.!!!!!

..اهم شئ الطلاب والطالبات يفهمون الشرح ابراء للذمة وتقوى الله.......وللمعلومية الاجازة بعد ثمانية اشهر من الان..

...اجازة سعيدة...وكل عام وانتم بخير

[اميرة الحرف]

<<< هذا المعرف قطع علاقته بكاتبة هذا الموضوع لأن هذا المعرف خيشه ولاعندك احد


شموخ لبا والله قلبتس يابنت عمي والله انتس نفلا
هذا الحكي صحيح وهذا الواقع في مدارسنا وليس بجديد علينا وللأسف نفس الوضع في ظل تغيير كم وزير يعني المشكله مستأصله
وليس قطاع التعليم وحده من يشتكي بل جميع القطاعات
ابو متعب ماقصر والميزانيه كويسه وماعلينا خلاف لكن والله من شين الدبره عند وزرائنا ومن تحتهم



قبل المخرج /"ّّّّ


اللي كل ماجاهم رئيس يسترفد عطووووه
خخخخخخخخخخ الله يخرب حنيشك من جد ضحكتيني بسالفة يسترفد ذكرتيني بشغله


مخرج"""
سبحانك اللهم وبحمدك استغفرك واتوب اليك

باااي شمووخه وعالبركه التميز وانشالله دائما بالعلالي (( يااختي شكلتس واصله توسطيلي بالاداره ابي مثل النجوم اللي تحت اسمك يانقيب)))

عيوووف بدون رتبه

[شمــــــــوخ]

::

آهليييين أخوي شامخ
حياكـ اللهـ ,,

مــاعاد نبغــى بالرواتب زيـــاده @@ اللي نبيه اليوم تخفيض الاسعـــار

8

والله هالبيت بالصميم ..:confused:

ماعادنبي زيادات نبي تخفيض الدنيا طايرهـ :sm25:

::

مشكور ع الحضور

[شمــــــــوخ]

::

حياك الله يالسيف القادم

نورت الموضوووع

هذي هي مشكلتنا كل ميزانيه يخصصون مبلغ وقدرهـ لتعليم البنات ,, لكن مانشوف شيء :cool:

المدارس تعبااانه وجدرانها تشكي وماشفنا جديد..!!

الله المستعان بس

كل الشكر لك

[صالح الجطيلي]

ولاجت الميزانيه زينه قالوا صرفنا كذا وكذا للمدارس ولاشفنا شيء منها للأسف ..!!

مدري وين تروووح ؟

الاخت --- شموخ كلام واقعي ومنطقي وحاصل

يجب ان يولى التعليم اكثر اهتمام من غيره لا أهميته على الفرد والمجتمع

وعسى الله يوفق الجميع

دمت بود

[شمــــــــوخ]

::


آهليييين فهد الشافي وانت طيب

مدري والله ليشش معصبه :(

المشكله ان ميزانيتنا تهببببببببببببل :D وهذا اللي قاهرني لأنهم مقصرين بتعليم البنات كثييير
بعديين وشدخل أشرافي بالمنتدى على الأنشطه :sm9: :D

هذي انشطه تمسكها معلمه بكل نشاط مدرسي بالأضافه لشغلها الأساسي وشرحه

::

مشكور ع الحضووووور

[شمــــــــوخ]

::

هلا ومية غلا بالعيوووووف

تدرين اني آحبتس الله لايحبتس :D<< صورة قلب يقرقع

آدري انوو صحيييح مالت عليهم بس شنسوي نفضفض بالكلاام علشان مانقدم آستقالتنا :sm101:

اما سالفة يسترفد آدري ذكرتس بواحدٍ جاي ابوتس يسترفد :Dمنه

وآي تميز انتي يبيلتس جلسه تعالي للديوانيه مو هنا مالت عليتس قال نقيب قال :confused:

::
شرفتيني ياسبع صنايع والبخت ضايع :more2:

::

[شمــــــــوخ]

صالح الجطيلي

حياك الله

آشكر لك حضورك الراقي

[محمد الدلماني]

سياسه ياشموخ ومعناها مفهوم خليها على ربك بس المشكله في الناس اللي تقل مشفوحه على الاكل وماتقدر تصبر عندنا السابقون من الصحابه ليش مانتعلم منهم ففي عهد الخليفه الفاروق رضي الله عنه اشتكى له الناس من غلاء اللحم فقال لهم ارخصوه انتم اي اتركوه لهم وسيعود لكم كما كان فلماذا لانقاطع ونصبر ام اننا تعودنا على الرفاهيه ونريد الافضل دائما


ودمتي بكل خير

[سعود المسعودي]

اختي شموخ

جميل هو اسلوبك في الطرح لك جل الشكر والتقدير

[شمــــــــوخ]

سياسه ياشموخ ومعناها مفهوم خليها على ربك بس المشكله في الناس اللي تقل مشفوحه على الاكل وماتقدر تصبر عندنا السابقون من الصحابه ليش مانتعلم منهم ففي عهد الخليفه الفاروق رضي الله عنه اشتكى له الناس من غلاء اللحم فقال لهم ارخصوه انتم اي اتركوه لهم وسيعود لكم كما كان فلماذا لانقاطع ونصبر ام اننا تعودنا على الرفاهيه ونريد الافضل دائما


ودمتي بكل خير

أعتذر عن تأخري بالردود ..

آهليين محمد وربي صدقت مانقدر نصبر او نسوي مقاطعه ع الأقل ..

كل الشكر لك

[شمــــــــوخ]

صقر الصقور
آهلييييين فيك ومشكور ع الحضور كلك ذووق

:

[البحتري]

الأستاذة شموخ

تحية طيبه وبعد


مقال رائع و عرض و تحليل أروع


سلمت الأيادي


تحية وتقدير

لروعة قلمك

[شمــــــــوخ]

القدير أحمد

كل الشكرلك ولحضورك في متصفحي




تقديري وأحترامي