ديوان الشاعر::: خلف الغريب ::: [الأرشيف] - °~*¤®§(§ شبـــكة ويــلان العـربـيـه §)§®¤*~ˆ°

خلف الغريب

04/02/08, (01:20 AM)

من باب تلطيف الجو إليكم هذه القصيدة المهداة إلى كافة زملائي المعلمين

ومنهم أخوي السيف القادم مع وافر التحية ...

و أقول الأجر أعظم إن شاء الله : ...

يا مهنة التعليم .. عزي لراعيك!=من اولٍ مهنة .. وتالي مهونة
دخل بك اللي جاهل في بلاويك=يحسبك راحة مير خابت ظنونه
سياتك اكبر يوم قارن حسانيك=بلشة من البلشات .. يالله بعونه !!
من قبل لا يدخلك شغله تماتيك=واليوم لازم للشغل ينتعونه
يعيش كل اليوم عيشة صعاليك=وبالليل مايرقد ياما يدهنونه
يصيح وسط المدرسة كنه الديك=حتى لسانه صار يكره سنونه
بين الفصول وبين الاشراف تحريك=يدور حتى تقلب الشمس لونه
ودفاتر التحضير مامنه تفكيك=الدرس لازم بالورق يكتبونه
صرنا تقل طلاب مافيه تشكيك=وزارته بالشرح ما يامنونه
امس العصر شاهدت ( بايع مساويك )=مبسوط!! بالتحضير ما يطالبونه
والا المعلم كل يوم وهو هيك=الصبح علة والمسا به صخونة
من شاف وجهه قال ماجور وش فيك=متجعدٍ وجهه وذبلت عيونه
والله ما ادري يا عرب ويش تاليك؟=خليتي العاقل تناقز جنونه!!

تحياتي للجميع ..

خلف الغريب

04/02/08, (01:22 AM)

يا زمن وش باقي عندك مخفى؟=ليش تعلن حرب وتوجه قذايف؟
ما كفاك تقدم الضيم المصفى؟=ولا كفاك العيش في ظلم وكسايف ؟
وش بقا لي من بعد حب توفى؟=ما على الدنيا عقب موته حسايف
كنت اخاف البعد لين البعد لفى=وبعدها : ماني من الايام خايف..
يا زمن بالهون ما سويت كفى=ماصبرت ايلين فرقت الولايف
اشهد انه بالرهن كفى ووفى=واشهد اني رحت خسران وعايف
اسحب اذيال الهزيمة ويتشفى=وذقت مر الغبن من كاس الكلايف
آه ياوقت مضا ياليت غفا=ليت ما وقته مع الايام طايف
لذة الدنيا ثواني ما تكفى=وردة هبت بها رياح عصايف
ولمعة شهاب سطع لحظة وطفا=وانطوت عني مثل طي القطايف
والاماني زرعها قوس وجفا=لافها من لايف الايام لايف
ول ياوقتك ليا اعطاك المقفى=عقب ركب الكور تنزل للسفايف
تلتفت عن بعض شانك واتخفى=وتترك حقوقك لغيرك ..وانت شايف
والسيوف اللي بها الكيل الموفى:=اصبحت عصيان ..ورماحي سنايف

وسلامتكم

خلف الغريب

04/02/08, (01:24 AM)

بعد التحية :
سؤال وجه لي وهذه اجابته العاجلة
المهداة الى الجميع من ابناء قبيلة عنزة الكريمة وغيرها من القبائل الكريمة :

كل القبايل زاينت وعنزة وين؟؟=ما شفت بالساحة مزاين سباقه ؟؟
سألتني وافتيك يا بارد العين=اسمع من المسؤول زبدة مذاقه :
المجد ماهو في جمال البعارين=وطيب القبايل ما نقيسه بناقه
والمجد ما ينباع وسط الدكاكين=ولا هو على زين الشكل والرشاقة
المجد يا باغيه في خدمة الدين=في طاعة الله وابتعد عن نفاقه
والمجد في سنة ختام النبيين=نتبع هداه ولا نخالف وثاقه
والمجد باكرام الضيوف البعيدين=وكم حايل للضيف نرمي شناقه
والمجد باكرام الخوي لو بعد حين=ونرفا خطا الصاحب ولو كان عاقه
والمجد بتفقد حوال المساكين=والمجد في لمة وجيه الرفاقة
والمجد باوفاي العهد والعهد دين=يوم ان ولد اللاش قصر وباقه
والجار منزاله على الراس والعين=ولو غاب عنا ما هتكنا رواقه
والمجد يوم انه بكسب البعارين=كم ذود شيخ من يدينا نفاقه
ناطا وصوت الملح مثل البراكين=ليا ما نتخير بين ناقة وناقة
بالمعركة نقلب ثقيل الموازين=وكم فارس صارت حياته شفاقه
عقيل وان جات الحرايب مجانين=نهدر هدير الزمل وقت اصطفاقه
( عيال وايل ) لا تلاقا القبيلين=كم جيش قوم جيشنا الذرب عاقه
الكيل وافي يوم نقص الموازين=يفرح بنا اللي جاير الوقت ضاقه
جنود كسرى كسروها ( الشيابين )=واهدى لهم ( هاني ) من الموت باقة
لجت بنا اللي شافت الظلم والبين=يوم الردي ما له على الطيب طاقة
وما حد يصوت بالعشا للضعيفين=يا كود حنا والخلايق بفاقة
نعطي العطايا للبعيد وللادنين=والله كفل رزق الخلايق وساقه
عن ( السبيعي ) تم دفع الملايين=والسيف جا له من سببنا الاعاقة
شلنا الحمول الكايدة بين يومين=وسجين بعض الناس يبست ارياقه
واليوم في ظل الملوك الميامين=كل العرب عاشت بعز ورواقه
نعيش واقعنا ملوك وسلاطين=ونعيش ماضينا رجال العراقة
الزين هذا الزين يا طالب الزين=طيب الفعايل عاشقينه عشاقة
وياللي سألت وقلت وين المزايين=المجد هذا ما نقيسه بناقة

1 ) الشيابين هم بنو ذهل بن شيبان الذين اجتمعت عليهم وائل في معركة ذيقار الشهيرة
بقيادة بطل العرب هانئ بن مسعود بن قبيصة الشيباني ..

وسلامة الجميع

خلف الغريب

04/02/08, (01:26 AM)

تقبلوا متواضعتي ...

ما عـاد باقـي لـك مشاريـه وعتـاب=مـا دام بالعشـرة عتـاب ومشـاريـه
( ان كان هذي فعلـة احبـاب باحبـاب=ما عـاد باقـي للعـدو مـا يسويـه )
ما ارضى بعيش الحب في شرعة الغاب=الله ولا عـشـق جـلـب ذل راعـيـه
شمس الغلا غابت ! وبدر الغلا غـاب !=يعنـي نهـار الحـب يشبـه لياليـه!!
اول اقـول: الهجـر عـادة للاصحـاب=لو مـا يجينـي تالـي اليـوم لا اجيـه
اخفض جناح الوصل من باب الاعجـاب=ويخطي واعاتب مـن يحـاول يخطٌيـه
واقول : يا ما احلا خطا تلـع الارقـاب=واعـد سيـات الغضـي مـن حسانيـه
لكن صحيت وكل غلطـة لهـا حسـاب=( بعض العرب لا تمونه تبتلـش فيـه )
يحسب سكوتـي ذل واعجابـي ارهـاب=فاهم غلط و( العقل من حـظ راعيـه )
وش جاب لين الحب للذل؟ وش جـاب؟=صحيح (كل إناء ينضـح بمـا فيـه )!!
روحي بدربـك جعلـه ورود واعشـاب=وانا طريقـي جعـل الازهـار تكسيـه
( لا انتي مثل نوت .. وانا ماني عقاب )=كلـن عسـى الله فـي طريقـه يهنيـه
لو ما بقا فـي كوكـب الارض جـذاب=بدري عليـك انكـس الـراس واحنيـه
عزي ومقداري وراسـي وانـا شـاب=حتـم علـي مـن المـذلات لا احميـه
طبـع مـن الله , لا تطبـع ولا اكـذاب=( والسيل ماله غير سابـق مجاريـه )

وسلامة قلوبكم يا بعد راسي

خلف الغريب

04/02/08, (01:27 AM)

تحياتي للجميع ... وتقبلوا متواضعتي :

اسهرت عين القلـم حتـى غفـى الدفتـر=وخيـل القوافـي تعـب خيالهـا الماهـر
السرج خالـي ومـات حصانـي الاشقـر=وغابت عن اسمـاع قلبـي دقـة الحافـر
السيف طايح عسى ماشر يـا ( عنتـر )=ماهـي عوايـدك تغمـد سيفـك البـاتـر
من بعد ما كـان سيفـك باللقـا مشهـر=خـاض المعـارك وعـود بعدهـا خاسـر
حبر القوافي نضب مـن بعـد مـا نـور=وبستـان الاشعـار ذابـل ورده العاطـر
سمعي قصر عن عتابك ليـه مايقصـر ؟=والعيـن دونـك يعـود طرفهـا الساهـر
لـو حـاول يعاتـب الاحبـاب مـا يقـدر=اثـر الغـلا يتـرك القـادر ماهـو قـادر
اشوف مغربك مشـرق . وايمنـك ايسـر=واشـوف آخـرك أول . واولـك آخــر
صارت عيوبك مزايـا , والبـلا الأكبـر:=انـي اشـوف المزايـا عيـوب بالآخـر
قلـب منحـك الغـلا والحـب مـا قصـر=ضمد جروحه وغنى ( لا متـى صابـر )
اغمـدت خنجـرك فـي شريانـه الابهـر=ونزعتها وانت فـي ليـل الجفـا سامـر
ما اطيعهم لو حكوا عـن غـدرة الخنجـر=الغـادر اللـي طعـن بالخنجـر الـغـادر
ملتك الاسفار مـن مهجـر إلـى مهجـر=متى تبطل عـن الأسفـار يـا مسافـر ؟؟
يا ( قيس ) : طش الشداد و نوخ الضمـر=( ليلاك )خانت , وراحت مع ( بني عامر )

وسلامة قلوبكم

خلف الغريب

04/02/08, (01:31 AM)

من عادتي لا قسى وقتـي تساهلتـه=ربي على الصبر بالشدات معطينـي
ومن عادتي لو يزود الحمل بي شلته=صابر ولا تشكـي الاثقـال متنينـي
الا مـن الثقـل ثقـل مـا تحملتـه=الحاجة الـي علـى مثلـك تودينـي
النذل لـو ان جـدي جـد عايلتـه=عن حاجتي له رفيع العرش مغنينـي
برق على ديرة الانـذال مـا خلتـه=لو يثمر ورود واعشاب ورياحينـي
العـز طبعـي ولا عمـري تمثلتـه=من ورث جدي بكاس الطيب مسقيني
ادرس على يديه واجاوب على اسئلته=كذا قوانيـن وايـل هـي قوانينـي
واذا غدر بي رفيقي قلت : مشكلتـه=والضربة الـي ماتذبحنـي تقوينـي
ما اعامله لا تـردى بـي معاملتـه=لاني لفعل الردى مـا تقـدر يدينـي
كـذا اعرفـه دون اقنعـة مجملته=الاولـه فيـه وامـا الثانيـة فينـي
وان قال بي شين فيه الشين ما قلتـه=ذنبـه يكفيـه وذنـوبـي تكفيـنـي
اخذت طبع النخل لو مـا تطاولتـه=بالطوب يرمى وينزل تمره الزينـي

خلف الغريب

04/02/08, (01:34 AM)

إهداء إلى أعضاء شبكة ويلان العربية ...
.
.
.

سلام يا درة الامجاد والطيبه=واحلى تحية وتمجيده وترحيبه

يا مجمع العز يا بيت الفخر شامخ=يا شجرة في ذراها العز والهيبه

ياعيال وايل عساكم للبقا دايم=يا كعبة الطيب يا قبلة محاريبه

سلام من قلب شاعر واحد منكم=بدعت جزل القصيد وجيت بادي به

ما هو كثير لو امدح لابتي والله=يستاهلونه وكل الناس تدريبه

ان كان مايمدح اللي مثل هاللابه=يا آخر زمن وش بقى في جعبتك جيبه

ساس الفخر قبل ما يبعث رسول الله=والطيب يبنى على سابق مجاذيبه

تشهد لها الجن قبل الناس ما تشهد=فعل كما الشمس من يقدر يماري به

رقوا سنام المكارم واعتلو كوره=ذلول ما يتعب الركاب تدريبه

طاوعهم الطيب والله يعطي ويمنع=اطوع من السحب يوم الريح تقفي به

ترزمت واستهلت في مرابعهم=واثمارها العز والامجاد والهيبه

رجالهم ما حسب للنفس لو تذهب=من دون عزه كريم النفس يصخي به

المنذرية لجت بحصون ابن هاني=وعيا عليها ( ولد شيبان ) من طيبه

يقول كسرى عليه كسرة احلامه=ومن دونها راح كسرى ربحه الخيبه

شرب ثرى الارض من دمانهم واروى=وعظامهم مع هبوب الريح تومي به

بنوا من المجد صرح شامخ عالي=وفي غرة المجد مجد كنه الشيبه

وكل القبايل نعم من دون عانيها=كل العرب دون عانيها تعيي به

قبايل مدحها والله يشرفني=سجل لها المجد في زاهي مكاتيبه

وسلام في تالي القيفان ينصاكم=والورد والند ياخذ طيب من طيبه

خلف الغريب

26/03/08, (10:12 AM)

حصان عربي : هدية من اخي وصديقي وسميي خلف بن محيميد بن رشيد الرشدان وفقه الله....

لا احاول أن أكافأه بهذه المتواضعة فقدره عندي فوق مستوى الشعر عموما ..

أبياتي على عجل أتمنى أن تتقبلوها بصدر رحب .

الطيب حبله من ذهب بين الاخوان=ودرب المراجل عسر ماهو لياني
والمجد مايقواه تباع ما لان=سيف ومنسف من قديم المعاني
ما يقدره يا كود ذربين الايمان=لا قصرت بالطيب بعض اليماني
والمرجلة تبغى لها قلب ولسان=قول وفعل ماهي مجرد أماني
وانا لو امدح , ما امدح النذل لو كان :=يملك ملايين الذهب والمباني
احاول اجزا بالثنا طير حوران=رفيقي اللي بالهدية نصاني
( كحيلان ) مهدي والهدية ( كحيلان )=( حصان ) من يمنى الكريم ( الحصاني )
شبل الاسود اللي على ماض الازمان=ما ضر ماضيهم طويل الزماني
يوم المراجل سيف وسنان وعنان=يشهد على الماضي سهيل اليماني
نعم ونعم نعم ونعم يا ( ابن رشدان )=(خلف ) خلف مروي شباة السناني
حفيد مجباس الوغى يوم الاكوان=يثنون لا هج الذليل الجباني
( رشيد ) و ( مطلق ) ستر مدعوج الاعيان=لا فرعن بالكون بيض الثماني
ملكادهم يشبع به الذيب سرحان=يوم اختلط حس النعا للغواني
كم فارس من ضربهم طاح منهان=يبكن عليه المترفات الغواني
تركض على الصابور والجو دخان=بياعة للروح , والعمر فاني
يوم العرب خايف , وجايع , وعريان=ببيوتهم تلقى الذرا والاماني
طيب قديم وحي فيهم إلى الآن=نطح العديم , وذبحهم للسماني
عاشوا وماتوا عيشة ابطال شجعان=والسيرة العطرة ترا عمر ثاني
ويوم الجزيرة طاوعت ( لابن مرخان )=شالو لوا التوحيد مابه تواني
عسى لهم من مالك الملك غفران=وبالآخرة من ساكنين الجناني
وماهي غريبة منك لو تهدي حصان=جدانك اهدوا عمر ماهو حصاني
واقبل تحيات الوفا يابن رشدان=بجزل البيوت اللي نطقها لساني

تحياتي للجميع ...

خلف الغريب

06/04/08, (12:03 AM)

صباح الثلج من دفء المشاعر ذاب في دربي=صباح يشبه شعور الاحبة عند فرقاهم

وأنا يالي تعبت ولاحصل من قربهم قربي= برودة هالمشاعر شبت النيران تنعاهم

بعد ليل سريته والنجوم البيض تسخر بي= تلحفت الظلام وقلت ياربي متى القاهم

اجر خطاي ودروبي خذتني دون مااشعربي= ومع باب الاماني الواسعة ذي جرة خطاهم

انادي واتلفت والرياح الهوج تغدر بي= واثرهم في الصحاري المجدبة شدوا مطاياهم

رفعت الصوت من جور الفراق وشدة الكربي= وزما رجم الجفا العالي واشوف البعد غطاهم

دقيقة قبل لا تفارق تمهل لي وناظر بي= سيوف الهجر في صدر المحبة وانزع اتلاهم

وش اسوي بحبك وانت خابر ما تخبر بي= وابي اسأل وين مقبرة الغوالي بادفن اغلاهم

تحياتي لحب غرد بسرب ما هو سربي= خلاص اقبل تعازي الشامتين وضحكة شفاهم

انا خليت وابل هالسحايب قبل تمطر بي= وانا عطشان لكن ماطلبت الري من ماهم

بعد ما كان حبي لك بدل زادي بدل شربي= نويت اصوم عن حب الحبايب و ارجع انساهم

خلف الغريب

06/04/08, (12:08 AM)

لا تقاطعني ترا ما اقوا القطاعة= مد حبل الوصل والهجران خله

خانني قلب الشجاعة بالشجاعة= بعد هجرك صايبه خوف وذله

ما على الهجران يا الترف استطاعه= ( والهجر فوق الثلاثة لا تحله )

ما اتحمل لو يطول الهجر ساعة= كيف لو قاطعتني باليوم كله ؟

ضاعت علوم الشجاعه والبتاعه= وحل بعد الامن خوف في محله

اولٍ ما للهوى سمع وطاعه= وبعد حبك سامعٍ له طايعٍ له

دام هو راعاك فانت اليوم راعه= وامسح الخط الحمر باوسط سجله

و هرجة العاذل ترا ما هي مطاعه= والسموحة واجبة لو جات زله

ارحم اللي لايع الحسرات لاعه= ولا يلام الخل لو ما شاف خله

عاشقك بالحب يملا كل صاعه= عاشقٍ لامن عشق : يعشقك كله

من عيونه , من فؤاده , من ذراعه= من ابهامه , لين هامه , لين ظله

جالبٍ صدقه على سوقك بضاعة= ومن صدق بالعذر .. عذره ينقبل له

( والخوي اللي يواخذ بالاشاعه= بعد مدة ما يخاوي غير ظله )

حط من دون الحسد سد ومناعه= و لا تسمع هرج واشي فيه خله

ومن رفع في عالي المركب شراعه= تقلعه صلف الهبايب عن محله

وما خسر من يمتلك كنز القناعة= والصحيح الموت.. والموت المذلة...

خلف الغريب

06/04/08, (12:17 AM)

هذه القصيدة وردتني من اخي وصديقي العزيز الراوي المشهور فواز بن يحيى الغسلان البقعاوي

على اثر موقف معين دار بيننا وهي من مساجلات عدة بيننا :

شكواي بالبرق والقيفان مشفوعه=للي ( بتيماء ) صنوف الطيب في داره

يمناه تطرد ظلام الجوع بشموعه= وطيبه مرابع محول الوقت بامطاره

بيت ( الغريب ) بذار الطيب وزروعه= من فضل رب رفع طيبه ومقداره

دارن بها منقع الفزعه وينبوعه= اسقت خلف من نبوع الطيب وانهاره

فيها بيارق هل الطولات مرفوعه= ريفن للاضياف مع سترن على الجاره

ويلان تطفي كبودن تشتكي جوعه= يشهد لهم ماضي التاريخ واخباره

( فقير ) بأسمه غناة الخلق بطبوعه= وبالمجد ثروة بني وايل ومعياره

حمولتن جعلها ماهي بمقطوعه= من شان تبقى زمول الناس واخياره

من شان طفلن يتيمن ضاق بدموعه= فرخن ضعيفن ولا يغنيه منقاره

يلقى بهم راحة الخاطر ومطموعه= وعلاج كبدن شكت بالقيظ مصهاره

هذا خلف صاحبن نمشي على طوعه= ونفرح بمسيارنا والا بمسياره

بحدود تيماء صخى الدنيا ومشروعه= وحصن المراجل ينوش الغيم باسواره

مفاتح الطيب في يمناه مجموعه= روضن وريفه جمع عشبه ونواره

اجواد قومن لدرب الطيب مدفوعه= وتشهد على طيبهم عبده وسنجاره

ياشوق بنتن بنقش الملح مردوعه= ريمن هنوفن بياضه تقل جماره

عين اشقرن يرهب الصيدات بطلوعه= اسرع من النار بالبارود لاثاره

يمناه فيها رماح الموت مشموعه= كم صيدتن جاه في روضه ولا طاره

صفقات كفه بجوف الخرب مسموعه= ظفره شطير حديد تقل سناره

تلقى الثنادي بوسط الروض مجدوعه= من مخلبن يطعن الصيده بمسماره

ومهرة عقيدن تبوج القوم وجموعه= لاثار ثاير رصاص القوم وغباره

لاصاح صايح نذير الخيل وفزوعه= تدخل جموعن بقاعن ضاق معباره

يفداك عفنن يشح بنصف جربوعه= لاشاف ضيفه تطيح الروح منهاره

الصدر ضايق ووسط الروح مفجوعه= والقلب يرجي صليب الراي واشواره

وكان ردي عليه :

هلا هلا وامتلا الخفاق وفروعه= ترحيب بالذيب والاشواق فوارة

( تيماء ) تهلي وتوقد حفلة شموعه= والليل مثل النهار وزاد بانواره

يا مرحبا عد صبح بان بطلوعه= وعداد كوكب بدا ونجوم سيارة

وعداد رمل ووبل صب في قوعه= وعداد عشبه مع أشجاره ونواره

باللي نصاني قصيده واذهب الروعه= عقد من اللول مجلوب بمحاره

سبايك من بنات الفكر مصنوعة= من بطن مهد الذهب جابوه تجاره

امواج لا هاج شاطيها حسب طوعه= ما يقدر السير فيها كل بحارة

( فواز ) لا هاز صيد الشعر بطلوعه= مخلاب كفه تقول سيوف بتارة

يهوي ويدلي وياخذ منه مطموعه= والخرب حول وعاقه ضرب شنكاره

فواز يا حافظ التاريخ بضلوعه= وياخالط الدر والمرجان باشعاره

يا حي قافك عسى الجيات بتبوعه= لحيث نشفق على مثلك ومسياره

خوة رجال الوفا يازين طالوعه= وخوة هلوس الردا ياشين مصداره

الطيب اشفق على لاماه واجوعه= والعفن مسهوج لو هو باول الحارة

ارفع مقامي عن المسهوج واربوعه= واعز نفسي عن الهلباج وافكاره

ورفقتك عندي شرف واروع من الروعة= ولرفقة الناس عندي فن واداره

بناية الصدق عندي غير مصدوعه= اتعب على ساسها واطول جداره

واذا نواها خبيث الساس بجموعه= يبطي عظم ما وصل من عالي اسواره

وسلعة صداقه صديقي غير مبيوعه= لو زود الطامع السوام باسعاره

في خزنة من ( حديد الترك ) مصنوعة= وفراشها من حرير ودونها ستارة

وبعض العرب تنتهي رفقته باسبوعه= زبدة وذابت وملح طاح في ناره

وشكواك بالقلب قبل الاذن مسموعه= شبت بوسط الضماير نار كراره

ان يسر الله لتشرب حلو قرطوعه= ( هداج ) يروي ظما الظامي عن امراره

ابشر بعز يهز الخصم بسنوعه= وش الطلب ؟ قل , وانا ملزوم باحضاره

اضرب بكف على النوماس باتوعه= واجلب لك الروح ما راعيت لآثاره

المال والجاه لك مرهون وفزوعه= والقوة اللي تخض الخصم في داره

( عيال وايل ) سنايد من هم ربوعه= اطرفهم اللي رقا في طيبه القاره

مير اعتبر حاجتك يالقرم مشلوعه= لو هي بوسط البحر لاجيب بحاره

وانا لو ازرع من الابيات مشروعه= ما جيت معشار معشارك ومعشاره

وهرج بليا فعل ما بان منفوعه= سحاب صيف سرا ما هلت امطاره

وان كنت غلطان فالغلطات مرجوعه= كم رامي للهدف ما صوب الشارة

وسلامة الجميع

خلف الغريب

17/04/08, (02:26 PM)

بدون مقدمات لكن احيانا يجب ان تكون صريحا...

*
*
*

عارفك معجب بـس مـا تقـدر تقـول=يمنعك عنهـا كبـر , مـدري تجاهـل
وانا لك الله : عنك مشغول .. مشغـول=آصـل مداهـل..... واتحاشـا مداهـل
أصول في دنيـا التجاريـب ..وأجـول=و أرد على ( هـداج ) عـذب المناهـل
واذا حصانك طاح , ما نيـب مسـؤول=أنـا حصـانـي فالميـاديـن صـاهـل
مالي حدود ... وطولي أطول من الطول=وانظر إلى الموضـوع نظـرة تساهـل
ساكن ببـرج الشعـر وفراشـه زلـول=وكـم زرتنـي مـرة وعـودت ذاهـل
اعطيك حق الضيـف والحـق مدبـول=لا ضاق لي خلـقٍ , ولا انضـام كاهـل
من يشتم ( ابو الهول ) ماضر ابو الهول=و ( فرعون ) عاهل بس ما دام عاهـل
لكن على ما صار , خذ زبـدة القـول :=( انت امتجاهل , بس انا فيك جاهـل )

أحيانا تظن أن ما يحدث لك من عقبات مجرد صدفة ثم تتأكد أنها متعمدة ثم يجعل الله فيها خيرا كثيرا ..

أترككم مع قصيدة موقف ..

اي والله اني مشيت الدرب لو هو عسير=قدام قدام يا رجلي وصلنا المرام
سيري ..وياقلب مهما صار بالدرب سير=اسرج جوادك نبي نطارد فلول الظلام
شب القصايد على قلب المنافق سعير=الصبر درعك , وعزمك فالملاقى حسام
واكرب عزومك , ولا ترضى بحبة شعير=قسمك مع القوم يوم القسم راس السنام
كن مبتسم بالنهار الكالح القمطرير=وفصل ثيابك من اجمل لون واعز خام
لا تركع الا لمن كونك تبقى الكبير =واذا أقيمت صلاة الفرض خلك إمام
انهض جناحك ترا القمة ماهي لأي طير=ثم اصعد بهقوة المطنوخ متن الغمام
اكيد خلفك من أعداء الطموح الكثير=سيوف , ورماح , وان عجزوا تجيك السهام
بس انت واصل وتاصل للهوى فالاخير=وان طحت قدام لا تاصل : غشاك الملام
واللي طعني وانا مقفي حسابه عسير=لو كان به خير كانت طعنته من امام
اصبر ولك يوم ياالغدار ترجع صغير=والله لازين لك علاجك علي الحرام
لا اثرت فيني ولا وقفتني بالمسير=ولي يوم باطا على راسك وابعطي التمام
صدري شمالي , ولكن معك باصير غير=مااغفر ذنوبك مدام انك تبيها صدام
( الحلم مع غلطة الجاهل رسالة نذير=والحلم مع غلطة العاقل دليل انهزام )
تبي بزعمك تهز الضلع؟ ياشيخ طير=كبر وسادك واذا تنعس تغطى ونام
مادام قرنك من الفخار وش بك تزير؟=ضربة والاخرى تبى تصبح قرونك حطام
والريح مهما تقوت بالعوا والصفير=يبقى الجبل شامخٍ نايف مهيب المقام
ولو يحجب الغيم نور الشمس حزة عصير=الموعد الصبح لا صحيت عيون الانام
لاانت اول اللي طفش مني ولا انت الاخير=أبو جهل حارب الهادي عليه السلام
يكفيني اني كسبت اعجاب شيخ ووزير=وأخذت قسمي من الكعكة بكل احترام
ورجلي ليا وفق الله عمرها ما تحير=ان كان تحت النظام او كان فوق النظام
وعيبٍ على راسي الراسي يجاوب حقير=مجرد اني اناظر به له اكبر وسام
سويت به مثل ما سوا بمثله ( جرير )=خلى احتقاره (لذي الرُمة ) اشر انتقام*
ومادام أبو الهول عن مبناه ما يستدير=فالصمت حزات أبلغ من كثير الكلام
ولو كل كلمة ليا جتني تحك الضمير=صارت ضلوعي على طول الحكايا عدام
ولو كل ما بان لي مثلام جيتك مغير=ماكان باقي من اطلاقي طلق فالحزام
ولو كل رجلي يواصل فالطريق ويسير=ما صارت الجنة لمن حج وآمن وصام
واما نزولي عن القمة حشا مايصير=لو صارت الشام هند وصارت الهند شام
ومع كل هذا عسى في باطن الامر خير=مرات يطلع دوا المرضان من بطن سام

وسلامة الجميع

*للتوضيح .. أثناء معركة النقائض الشعرية بين الشاعرين الفرزدق وجرير
كان الشاعر ذو الرمة صغيرا فهجا جرير ولم يجبه جرير احتقارا له فكانت أشد عليه من رد جرير ..

خلف الغريب

01/07/08, (02:27 PM)

النعـــم كـــايــد

النعم كايد ولا ينطال بسهوله=كم واحد حاول يطوله ولا طاله

دربه عسير وفيه احراش مجهوله=وان جزت واديه لازم تطلع جباله

والنعم حكم على الرجال وفعوله=ولا كل من قيل له والنعم يزها له

اللي يبا النعم لازم يسرج خيوله=ويصبر على شدته ويقاسي اهواله

يمشي على الشوك ما هابنه رجوله=ويسهر بعين ما هي للجار ختالة

بير عميق وتلقى الظامية حوله=ولا يشرب الا هميم يدلي حباله

اما كريم لضيفانه ليا جوا له=يضحك حجاجه كفوفه وبل هطاله

والا شجيع يدوس الموت بنعوله=يبيع عمره رخيص يوم نادا له

واليوم هم البنادم ينقل حموله=مستورة والجميع يعيش في حاله

نعمه وامان ورخا في ظل هالدوله=الله سترنا وزاد الستر بافضاله

برعاية اللي كفوف الشعب تدعو له=كم دعوة في ظلام الليل تسعى له

وكم عقدة صبحت بيديه محلولة=وسحاب خيره على الاوطان هماله

اللي يمينه على المعروف مجبوله=يعيش ابو متعب الله يقبل اعماله

بحر الكرم واختلط مرجانه و لوله=موجه عطا وين حاتم ضاع في جاله

واد من الغيث ما حد ينطح سيوله=عز الشريعة و نصر الدين ورجاله

خلف الغريب

23/08/08, (05:18 PM)

اهدي لكم هذه المساجلة مع اخي وصديقي الشاعر والراوي المعروف فواز الغسلان واتمنى ان تنال اعجابكم وكانت البداية من عنده وقد التزمنا في قافية العجز خمسة احرف ..

عذابي ياخلف شوفة ثمانـن كنهـا الياقـوت=مع اللي ياخلف توقد بجوفـي مـن لهايبهـا
لغمها ياخلف سلكه على وسط الحشى موقوت=واخاف ان اللغم يقبس بجوفي مـن سبايبهـا
اذا هاجت بي الذكرى رمتني في طريق الموت=طريحن من بواريـد العساكـر فـي كتايبهـا
طيوف الليل غاراته تجي مع سابقات الصوت=وانا اللي ماهقيت الريـم تفجانـي حرايبهـا
مواعيد الغلا كانت ضحى ثالث بروج الحـوت=وراح الحـوت والميـزان ماجتنـي ركايبهـا
وعذر الزين برج الحوت دايم بالوعد مسحوت=مواعيده شكى العشاق مـن جمـرة كذايبهـا
وقالت ثالث العقرب تجي في شارع الحتحوت=سفيه اللي مع العقرب رجى شوفـة حبايبهـا
اشوف الظلم والخافق يعاني مثل عاشق نوت=واداري خاطر الغالين وابعـد عـن طلايبهـا
اقاسي ياخلف رمشن سحر قلبي مثل هـاروت=ترك روحي بوسط الليل تشكي مـن غلايبهـا
علاج الروح برموشه واخاف انه يفوت الفوت=ولا يشفي صواب الروح غير علاج صايبهـا
لك الله ماهقيت الريم برموشه تشوتك شـوت=لما شفت الحشى تومي غصونه في هبايبهـا
غدى جسمي من هموم الليالي ذابلن منحـوت=تجيني من طيوف الزين في ليلـي غرايبهـا
تراني ياخلف وسط الهبايب مثل غصن التوت=فزوعك او دنى يوم المقابـر مـع نصايبهـا

وكان هذا الصدى المتواضع

دخيلك ... خل ميت الحب ثـاوي داخـل التابـوت=وانا جثة غرامـي مـن زمـن , راكـز نصايبهـا
ولا تشكي غرام مـن لهيبـه ذقـت حـر المـوت=ترا الشكوى على ( مجنون ليلى ) ويش ثايبهـا ؟
تبث الوجد يا ( الراوي ) وانا ادفن وجدي المكبوت=ابيـن مـن مشاعـر نكبتـي : معشـار غايبهـا
بعد سافرت في رحلـة غـرام وحجزهـا مثبـوت=ذهـاب بـلا إيـاب... ورحلتـه ماشفـت آيبهـا
لعنـود مـن بنـات أم الغزيـل مرتعـة بخبـوت=رعت عشب الفياض اللي حمـا الحاكـم عشايبهـا
جمع فيها المصور كـل زيـن , وخصهـا بنعـوت=وش آصف ويش أخلي من وصوف طاب طايبهـا ؟
اشوف الورد في خده ..واشوف بشفتيـه التـوت=واشوف الصبح فـي ليـل تدلـى اعلـى ترايبهـا
رعى الله عودها الغض النشاش و خصرها المنحوت=وعيـنٍ كلمـا لـدت وانـا اسبـح فـي غبايبهـا
وريقٍ بـز مطعـوم الحـلاوة واذهـل البسكـوت=مظنة ... والا والله مـا شرهـت الحـق ركايبهـا
شريفة جـد , عـد بعـد , مـا تنقـاد للسربـوت=حفظها الله عن يديـن الخبيـث : بحفـظ شايبهـا
سلالـة مـن يفكـون التوالـي طيبيـن الصـوت=حديهـم لا دعتـه المعركـة مـاقـال : هايبـهـا
شيوخ افعال , نسل ابطال , ماهي شيخة اهل بشوت=يهـدون الصعايـب والصعايـب هـم صعايبـهـا
حوت خَلقٍ على خِلقٍ , كمال اخلاق , زين سمـوت=عذية عن سمـوم اهـل الفسـاد وعـن لهايبهـا
سبحت بحبها دربٍ حدرني وسـط بطـن الحـوت=ولا ادري وش نهاية مـا شبكنـي مـن نشايبهـا
اشوف ان العرب حلوا مشاكلهم علـى ( بيـروت )=وانا مشكلتـي الصغـرى عجـزت القـى طبايبهـا
قصفنـي فـي سكـود ولا قـدر يقـواه باتريـوت=وبنت ( تمثال نصـر ) بخافقـي وانكفـت خايبهـا
وهـذي ثامـن سنيـن العـذاب بسيلـه المفلـوت=عجز سـدي يقـاوم مـا تهملـع مـن سحايبهـا
دخيلـك لا تعذبنـي بذكـرى فراقهـا لا امــوت=بقي شعرة عن جنـون الهـوى والقـى عقايبهـا

وسلامتكم

خلف الغريب

18/12/08, (01:00 AM)

صدى لرائعة الرائع حمدان المطرفي ..

يا برق قل لي : وش سبب دمعة الغيم ؟=دام الوطـا يضحـك لنـا ديدحانـه !!
( السين ) مات وما لقى خانة ( الجيم )=والقاتـل المجهـول يعـزف كمـانـه
ما هو شهيد , وعاش من ضيم في ضيم=خانه لذيذ العيـش ... والمـوت خانـه
مظلـوم يشكـي واقـعـه للمظالـيـم=راهن , وبالتالـي خسـر فـي رهانـه
خصم الزمن عود مـع العالـم خصيـم=واثبـت لـه القاضـي دليـل الادانـة
جـلاد وينـفـذ جمـيـع المراسـيـم=سيفـه عشـق دم الـوريـد لمعـانـه
ورمـت خشـوم مكبريـن الملاطـيـم=تقـول معهـم مـن زمنهـم ضمانـه
شف فرحة التاجـر علـى كـل مليـم=وشف حزن فاقد عطـف الام وحنانـه
ثليـم طـاح وغيـره ثليـم وثلـيـم*=مـا باقـي الا سيرتـه فـي مكـانـه
مقسوم , يا الله فـي خيـار المقاسيـم=ماعـاد يـا ( حمـدان ) فيهـا ميانـه
من دون برطم ما قدر ينفخ ( شريـم )=بـس يتمـنـى والمـنـى بوبهـانـه
يبغى نفس يحيـا بعـد طـول تكميـم=ويلعب مع الغريـد ( يـا ليـل دانـة )
لاتطيح يـا لابـس شمـاغ المراسيـم=دامك رضعـت العـز وقـت الحضانـة
مزاجها لو كان مـا هـو ب( تسنيـم )=مـاء الكرامـة فـي إنـاء الأمـانـة
وان عودت بين العـرب علـم وعليـم( لنـا السنـام ..وبالله الاستعـانـة )
نقرا على الشيطان ( عم ) و ( حـم )=ونجلـد عشيـر ابليـس بالخيزرانـة
كذا عرفنـا وش سبـب دمعـة الغيـم=والله يحـيـي شـوكـه وزعفـرانـه

خلف الغريب

18/12/08, (01:07 AM)

ليت في درب الهوى قلبي عصاني=تجربة مرت عسى بالامر خيـره
وش بلاني بالمحبـة وش بلانـي=ليش نام الناس وعيوني سهيـره
ليش نار الحب شبـت بالمحانـي=من شرارة ولعت قلبـي سعيـره
حط مشهابه على القلب وكوانـي=وانثنى عني وانا يديني قصيـره
مارحمني . ماتركني . ماعطانـي=استميحه . واستجيره . واستثيره
صب حبه داخل عـروقً تعانـي=من هموم الوقت شداتً عسيـره
هزنـي هـز الـزلازل للمبانـي=ولفني لف البحـور المستديـره
مالـك قلبـي وحاكـم فـي جنانـي=حكم ( أبو تركي ) على شبه الجزيره
وكن عينك لا ارسلت سهم ورمانـي=مثل شلفا ( جديع ) في وسط الكسيره
وكن صـدك يـوم سليتـه وجانـي=مثل سيف ( عقاب ) ينزع من جفيره
وكن رمشك يـوم سلهـم وابتلانـي=رفة ( ابن مهيد ) عن حر الظهيـره
وكن هجـرك للحبايـب لـو تعانـي=ردة ( الشعلان ) لصفـوف المغيـره
مصدر همومـي ومنظومـة جنانـي=مثل ( برجس ) منقع الموت وغديره
والوفا مطلوب فـي نطـق اللسانـي=مثل ( ساجر ) راع الافعال الشهيـرة
والدخيـل النـاس تعطيـه الامانـي=واذكر ( ابن سمير ) زبن المستجيّره
ومنك أنا داخل عليك ..الموت جاني=مايصير انخاك وانت بدون غيـره
فكنـي هالحيـن ماجانـي كفانـي=الهوى اولها .. وتاليهـا جريـره
شلت من حمل المحبة حمـل ثانـي=وعادتي حمـل المثاقيـل الكبيـره
ما تلفـت ارتجـي منـه الحنانـي=شلت حملي واحتملتـه دون حيـره
في بحر حبك غدت كـل الموانـي=بين موجه ضعت وازعجني هديره
ياعقود اللول .. ياحـب الجمانـي=ياعذاب القلب .. ياراحة ضميـره
ياسعادة خافقي لـو كنـت جانـي=ياسفيره .. ياوزيـره .. ياأميـره
ياقريب أبعيد .. ياقاصـي ودانـي=حرت فيك من اليسيـره للعسيـره
رد لي قلبي وانـا ماعـود ثانـي=أوعدك وعـد انهـا مـره أخيـره
ليت قلبي قبـل ماحبـك عصانـي=صح كانت تجربه .. لكـن مريـره

خلف الغريب

06/06/09, (12:10 AM)

تحياتي للجميع واهدي قصيدتي لإخواني من الجعافرة عموما ومدحهم مدح لعنزة كافة واعتذر منهم فلم أوفهم حقهم..

ليه زمن ودي بمدح الجعافرة=واليوم دقت حزة المدح صافرة
لو كان ماهم باحتياج لقصايدي=افعالهم شمس بالامجاد سافرة
جعافرة عز الرفيق وسعادته=ولزلة الاصحاب والجار غافره
جعافرة للضد علقم يجرعه=بالعز مؤمنة وبالذل كافرة
جعافرة وان صاح للكون صايح=يصيح وسط النزل : وين الجعافرة؟
ليا اختلط من شدة الهوش واحتدم=حس المعدد للحصان وحوافره
يبشر بعز ياصلنه عزومهم=بشيب وشبان للامجاد نافرة
يبرا لهم طير السعد في مسيرهم=وياويل من هي بالملاقى تعافره
تبيع في سوق المنايا وتشتري=ابطال لابطال الاضاديد خافرة
الطيب بين بيوتهم شاد منزله=والنعم حازوا كلمته من حذافره
رضاعهم من درة الديد مكرمة=وطيبة حديهم من نعومة اظافره
حازوا سنام المجد من ضمن قسمهم=وخذوا من الطيب المسمى مخافره
مضرب مثل بين القبايل بطبعهم=قروم على درب المعالي مسافرة
وعيال وايل بالمدايح نعمهم=اقسامهم من منهل الطيب وافرة
ان كان هم من بشر والا لمسلم=جهودهم لاجل الصعود امتضافرة
وكل القبايل وافية في لزومها=اللي على النوماس شفقة وظافرة
واليوم انا كلي فخار ومسرة=لاني ببساطة قلتها بالجعافرة

خلف الغريب

06/06/09, (12:23 AM)

استجابة للصوت الجميل والشعر العذب الذي تشرفت باستقباله من اخي الشاعر الجميل والمبدع

حمدان بن ربيع المطرفي

وهو على الرابط التالي :

http://www.weelan.com/vb/showthread.php?t=15280

جاء هذا الصدى آملا أن يرتقي إلى مقام الصوت أولا وإلى ذائقتكم الراقية ثانيا مع عذري الشديد لتأخري في الرد ..

يا صوت حركت الصدى .. ويا قاف جا وقت الطلب=دام المشاعر راقية يا هاجسي بالله تعال
هزيت جذع القافية حتى جنيت من الرطب=وانا احمد الله عن هجير الشمس جالس فالظلال
يهزني حرف الشجا ..وافز وافرح واضطرب=حرفك جمع مر وحلا ..كيف اجتمع مرٍ وحال ؟.
يا صاحبي يا ابن الرجال اهل المكارم والادب=اللي بنوا صرح من الامجاد عمره ما يطال
اسأل مجرب خابرٍ ..لو ما قرا لو ما كتب=والنصح يشرى من قديم الوقت في خشم الريال
كم شمس غابت قبل وقت الليل بقنوف السحب =بس النهاية دائما للشمس.. واما الغيم زال
والليل مهما حارب الاشراق لازم ينسحب=دام الهدى بنهاية المشوار هو موت الضلال
قال المثل عش في رجب ترا من الدنيا العجب=والبدر في جو السما لا بد ما يرجع هلال
وشف كيف غيّر وقتنا المفهوم واصبح منقلب =صار اكبر عيوب الرجل انه يكون ( ابن حلال )
ما عاد باقي رتبة تفرق على باقي الرتب=شف الشمال اصبح جنوب..شف الجنوب اصبح شمال
وما دام هذا وضعنا .. خل الملامة والعتب=لومك على اللي يارد العد الطويل بلا حبال
(نار الكرامة شبها لو تصبح ضلوعك حطب=ما هو لنا صبر الذليل اللي يسميه احتمال )
أبعد عن السير بمتاهات الغياهب واجتنب=الله خلقنا للعلا من عال نطلع فوق عال
حنا غواليب العجم ..حنا سلاطين العرب=لو ما كملنا من البشر لا شك نسعى للكمال
واللي بنى بيته بليا سقف ..قل لي وش كسب =؟أكيد ما يفرح متى ما اقبل من المنشى خيال
واللي حياته سايرة مع درب حامض يا عنب=قل له : هنيا لك براد الصبح مع نوم الليال

خلف الغريب

06/06/09, (12:30 AM)

أهديها للجميع واخص بها من تسبب بولادتها ..مع تحيتي للجميع مقدما ..

سهيل غاب .. وغاب من يرجي سهيل=والوادي الظامي من سنين ظامي
لا تحتري للسيل يا راجي السيل=دار جفاها السيل مابه مقامي
يا ( شْعيل ) ما الومك من الحمل يا شْعيل =ومن شال حملك ظنتي ما يلامي
( المشكلة موقفك بين المشاكيل=العذر عن بعض المواقف حرامي )
الصبر عيب ليا طفح طافح الكيل=ليا صار مسماره على القلب حامي
وش فايدة لا قالوا العالم : ( حْليل )=بعض الجباير هي تعيب العظامي
واذا تفرعن بالقطين اشهب الذيل=على القطين وساكنيه السلامي
ودام الحمير اسعارها ساوت الخيل=وش فايدة كلمة : عريب العمامي ؟
وان كنت ما تسكن على ضفة النيل=مالك غنى دون الرشا والمقامي
وليا صرت بين الغربلة والبهاذيل=اكفخ بجنحان السعد لا تنامي
اشهر وخل الارض لـ(غراب قابيل ) =ماعاد فيها مطمعة يا ( القطامي )
مادام لك جنحان لا تقبل الميل=الرزق مابه دون بابه محامي
اشعل ظلام الليل قنديل قنديل=واعلن على يدك انتحار الظلامي
وان شفت هالدنيا تبي تميل الشيل=بعها على اللي بأول السوم سامي
وان شح نفط ( اربيل ) لا تقرب اربيل=النفط في ( كركوك ) زامي وطامي
من بعد ما ينباع برميل برميل=اليوم يهدى في ( ولاية ميامي )
اذا ( تعدى الفعل ) حظ المفاعيل=وش حصل( اللازم ) من الالتزامي*
حتى متى تجترنا ( كذبة ابريل )=وجروحنا مع كل كذبة دوامي
وبالمال ما ينقاس طيب الرجاجيل=الطيب في خوض البحور الزوامي
و أحدّ من ضرب السيوف المصاقيل :=كريم يدعى مع طعام اللئامي
و أشدّ من شلفا عقابٍ ومنديل : =لئيم تحت يديه رزق الكرامي
واخاف من سود الليال المقابيل=تاكل ايدامي قبل لا اكل ايدامي
كثر العلل ماعاد يحتاج تعليل=الرزق ماله عن يدين الحرامي
والموجز ابلغ من طويل التفاصيل=لا شك خذ بوحي و زبدة كلامي

* تعدي الفعل ولزومه مصطلحات نحوية ...

خلف الغريب

25/02/10, (03:03 PM)

صباحك من خزامى , من نفل , من شيح , من نوار=بروض من مـزون الوسـم الاول طالـت أعشابـه
صباحك فجر عاشق سامـر النجمـات بالاشعـار..=صباحك مبخرة مـن عـود جـاوة فاحـت اطيابـه
صباحك صبح خير , وجو غيم , وهلت الأمطـار :=على ساحـل بحـر حـب الحبايـب هـل سكابـه
صباحك فرحـة الشيـخ الكريـم بحضـرة الـزوار=تهلل نـور وجهـه واختلـط مـع سيـل ترحابـه
صباحك فرحة العـود الكبيـر برجعـة ابـن بـار=شرب مـر الزمـن والبهذلـة مـن سبـة غيابـه
صباحك فرحة اللي طـال صومـه واقبـل الافطـار=نهاره صيـف آب و وصايـم للفـرض فـي آبـه
صباحك ضحكة الطفـل الصغيـر بلعبـة المزمـار=مابيـن يبعثـر ألعابـه .. مابيـن يرتـب ألعابـه
تمنيت لصباحك كـل خيـر وجيـت لـك محتـار=على زورق ظنونـي , واليقيـن اشتالـت ركابـه
انـا سابـح بدوامـة لغـوز تحـيـر البـحـار=متاهة مـن متاهـات الغـرام , وعايـش بغابـة
سجين بمعتقل هجر الغوالي ضمـن نـاس كثـار=سجنته فـي غرامـك طـول عمـره دون بوابـه
فتح بيبان قلبه للضيوف وصـار لـه مـا صـار=غرامك , لوعتك , هجرك , وصالك , قال : حيا به
ذي ديارك ليا ضاقـت ببعـض العاشقيـن ديـار=تربـع فـي خفـوق مـن حيـاه يعاتـب عتابـه
مصيبة : لا تغلى اللي غلاه بوسـط قلبـك نـار=و مصيبة : لو هدرت العمر خلف بروق خلابـه
مصيبة : لا وقع راع المحبة بيـن نـار وغـار=ومصيبة : لا دخل بين الحبايـب نـاس نصابـة
مصيبة : لو نزل قدرك بعين اللـي لهـم مقـدار=مصيبة : والمصيبة كم كريم أخـلاق يبلـى بـه
( انا اظن الصدوق احسن لنفسه يقطع المشوار :=اذا ربك بـلا هـذا الصـدوق بنـاس كذابـه )

خلف الغريب

25/02/10, (03:12 PM)

حبيبي : ما سرى حبك معاك ولا ذبحـه النـور=غدا شمسي , وبدري, والنهـار, وليلـة قمـره
صباحك. يا صباحك يا صباح المسـك والكافـور=تنسم لك سحابة مـن سحـاب الحـب منهمـرة
تخيلتك وانا بوهـم الحقيقـة غايـبٍ بحضـور=معك ما احلا الحضور , ولمة السمار , والسمرة
عرفت بطلتك معنى التواضـع للهوى المغـرور=وعرفت بغيبتك معنـى الغيـاب بنكهـة الجمـرة
يا أول عشق في سلم حيـاة العاشـق المأسـور=يا نبضة قلب جاهِل ما درى عنهـا ولـي أمـره
يا عنق الريم . يا عين المهاة . ويا شبيه الحور=يا قلبٍ جال بضلوعي.. يانورِه , يا بعـد عمـره
غدا صدره بعد جرب غـلاك ولا كفـاه صـدور=مضيفه بينها , ومـن الحنـان الغامـر تغمـره
وانا الغصن اليباس اللي فرح في مقدم العصفـور=سرت به خضرة افراح الحياة وفـارق الحمـرة
عسى الله يلبسك ثوب الحياة الضافي المـزرور=وعسى عمرك طويل وبالسعادة والهنـا تعمـره
الا ليتك تحـس ولـو ثوانـي لوعـة المقهـور=تحس بروح صب من الفـراق اطـلال مندمـرة
ترا ما عاد فـي دنيـا المهـازل للبطولـة دور=على كثر المشاهد شف بطلهـا مضيـع النمـرة
يدينـك نـادن النخـل المكابـر والليالـي بـور=وتدلى عذق حبي في يدينـك يـا بخـت تمـره
تدلل, آمر, احكم, خذ, تواضع, حب, واصل, زور=تأمر, والفـؤاد مـن الغـلا لـك مذعـنٍ أمـره
وانا لو كنت مالك من هوايه فيك ربـع الشـور=لاصد ولا علي من الهـوى بيضـه ولا سمـره
ولكن لك محبة دونهـا الشريـان بانـي سـور=حصانة عن مراسيـل العـذول وباقـي الزمـرة
ترا .. ما عاد نروى من عطشنا وكاسنا مكسور=امانة معك : لا تكسر هوانـا وينسكـب خمـره

أحبتي في ويلان

السلام عليكم ورحمة الله وبركاته وكل عام وانتم بخير

هذه القصيدة عبارة عن وجهة نظر خاصة بي تجاه الاعلام الشعبي وانا اوجهها لأخي العزيز الشاعر المبدع خلف المشعان
حيث تطرقنا ذات مرة لهذا الموضوع , وهنا أحببت أن تشاركوني هذه القصيدة :

يا سمي : غطا على التبر الغبار=كلما جيت انفضه يرجع اليه
ودرة البحار في وسط المحار=ما يجيها النور واضحت ما تجيه
يا خسارة ضيع البدر المدار=بعد ماهو كل ضايع يرتجيه
اختفينا بزحمة الناس الكثار=يوم كلن صار عراف وفقيه
صار جو الشعر : ( بارد جاف حار )=وصار وجهه جامد وفظ وكريه
طاح سوقه يوم خشوه الصغار=وقللوا قدره كريهين الوجيه
ذا يبيع , وذاك شعره مستعار=وصار كيلو الشعر يشرى بالجنيه
والله ان الوضع صاير ( خنفشار ) =قص لصق وسرد حكي وآه إيه
( الخليل ) ببحرها الهايج يحار=ويجهل اعراب المواقع ( سيبويه )
لعب كورة من يمين ومن يسار=شف ( مرادونا ) قطعها من ( بيليه )
جابو العالم تصفق بالإجار=وقالوا الشاعر فلان ومعجبيه
مسرحية حاكها خلف الستار=تاجر وفنان وشويعر سفيه
صوروه وطبلوا له واستزار=وصدق المسكين ما قالوه فيه
ومبطي الجاهل : ليا غاروه اغار=ولو لقى له صقر يمكن يشتويه
واعلن الشعر الجزيل الانتحار=والسبت حالة كآبة تعتريه
عالجوه أول بمستشفى شهار=بس كان الوضع ما يمدي عليه
واما انا .. باعطيك علمي باختصار=عند مثلك يصلح الشعر النزيه
الجزالة والإجادة لك شعار=تسبك بيوت الذهب ماتشتريه
ياسمي : ماضرنا الا الاحتكار=سوق سودا باعت الشعر وذويه
قلب الريموت ويصيبك دوار=لعنبوا شعر عرفهم لعن ابيه
ما لعبنا بشعرنا لعب القمار=ولا نعرف شيخ البلد ومساعديه
ويوم قلنا : يا معالي المستشار=ليه ضعنا ؟ قال لي : من غير ليه
ودامنا ما نعرف اصحاب القرار=اعتقد لازم يتوهنا و نتيه
يا ظهورِ مثل وضاح النهار=يلفت الانظار , والا ما نبيه
ودام غزة ما خذا منها الحصار=ما على راس ابن وايل ما عليه
ومن بغانا نصافحه ذل وصغار=قبل ما نفكر نقطع له يديه
ما خُلقنا الا لتكريم ووقار=وكل جامح للمكارم نمتطيه
من خلقنا الله كبارِ من كبار=نصنع التاريخ للي يحتريه
وكان حجينا وجا رمي الجمار=نرمي الشيطان ونلعن والديه

خلف الغريب

25/02/10, (03:15 PM)

http://www.weelan.com/vb/showthread.php?t=17914

تشرفت بالاسناد الجميل من اخي العزيز الشاعر فواز الغسلان على الرابط اعلاه وهذا هو الرد آملا ان ينال استحسانكم وان يرتقي الى مستوى جمال الصوت الغسلاني ..

انا البارحة مع ساهر النجم شلت غناي= اهيجن لحوني لين جيش الظلام انزاح
ولا الوم راوي نجد لو شال عود الناي=وغنا على رجم الهوى لاح يالي لاح
عفا الله عنك انكيت جرح بوسط حشاي=طيوره على اغصان الحشا بالجفا صداح
وانا لي ثمان سنين دايه بوسط رداي=اجامل ضحوك السن واجزي المزاح مزاح
وبعد ما لفى قافك تنبهت .. واثر دماي:= تتالى , وراع الجرح من حر مابه صاح
الا يا عشير الغوش لا تبتحل بالراي=لفتك البيوت اللي بها الشور نوره ضاح
(ترا عمر رفقات الرخا عمر جلسة شاي )=ويروغون وسنون الدهر بالغضب كلاح
رفيق الضحى والعصر صاير زعيم عداي=لحا الله من يرجي من النذل زود ارباح
صديق .. ليا منك تجي يمهم شكاي=عطوك القفيا يوم سرك بدا وانزاح
شموت اذا جالك.. واذا غبت بك حكاي=يزين لك الطيحة وهو محتكم ماطاح
ولو طبت فيه يقول : حقي على اخوياي=يجدد علوم المغربي هو وابن طلفاح
وترا الحنظلة لو كان تسقى بعذب الماي=فلا قيل جذع الحنظلة مثمرن تفاح
وانا امشي بحاجة من نصاني بطول خطاي=كذا الله خلقني لا منافق ولا مداح
وانا من قريت الخط والنار وسط شواي=لان الهوى نار تسبب فنا الارواح
ابا اسوق في شكواك ما تملكه يمناي =تدلل وما تطلب على المتن , وانت ارتاح
واذا هي بجاه شيوخ قد حلها مولاي= هذولا بني وايل لما ينغلق مفتاح
واذا هي بحرب وضرب والراي ضد الراي=نهار الحرابة عند ربعي نهار افراح
نبي ناصل المطلوب والترف عده جاي =وتبي ترقد عيون غدت للسهر مسراح
وهذا انا ادري كل ابن آدم خطاي=وانا استغفر الله كان بالقاف صار جناح

السلام عليكم ورحمة الله وبركاته
تشرفت بإلقاء هذه القصيدة في حفل أهالي محافظة تيماء المقام بتاريخ 24 / 3 / 1432 هـ
بمناسبة قدوم الملك حفظه الله من رحلته العلاجية

حبيب الجزيرة مرحبا والقلوب شهود=تباشر بك القمري وغنا وهلا بك
فرح بك كبير العمر والشب والمولود=وهتف لك ضمير الشعب مرحى وحيا بك
هلا ما غرست من الفرح بالقلوب ورود=وهلا ما مسحت دموع من لاذ في بابك
هلا كثر حسناتك , هلا يا زعيم الجود=هلا كثر ما سولف بك الشعب بغيابك
هلا بك كثر ما هب فوق البسيطة نود=وكثر ما ازهرت واصبح بها الورد متشابك
قدومك قدوم النور يالكوكب المفقود =وحضورك حضور الغيث يا زين تسكابك
سيول المحبة جتك تمشي بدون سدود=من اقصا شمال المملكة ودها ترابك
شف افراح تيما واهل تيما تشوف حشود=يشارك بها هداج واعلن بترحابك
لك بقلب شعبك حب خالص بدون حدود=ملكت القلوب وصابها الذعر بمصابك
حملت الهموم هموم شعبك , وفوقه زود=وتألم جسدك ومن سببها الالم صابك
كذا طبعك الاخلاص للواحد المعبود=جحدت الصواب وقلت يالعرق نرضا بك
كلامك يبل كبود , وايضا يعل كبود=يدٍ تبذل احسان .. ويدٍ تحتمي غابك
محنك عطاك الله حكمة وقو زنود =دحرت الصعيب وقلت يا صعب ما اهابك
اذا ثارت شعوب الممالك وفود وفود=وقفنا وفود وفود ندعي لمن جابك
عسى الله يعطر تربته راس ذاك العود=ومادام انت حي له فهو دوم يبقى بك
جدودك جدود العز يا حيها من جدود=واذا انت الحفيد فيا زمن نوخ ركابك
ولانا لحكمك ما نشهد عليه شهود=من طريف لحدود الوديعة رضينا بك
تناخت قبايلنا على عهدها المعهود=ولا فيه حزب , احزابنا هي هي احزابك
رزقنا بك الله , وابتلابك عدو مقرود=والا واتعاسة من بالايام يبلا بك
كفوفك سيوفٍ حدها للقا مجرود=واللي ماهداه الله يبي يقضعه نابك
دحرت الفتن واخزيته الفاسق النمرود=وهذا الله معاقب من نوا يحرق اعصابك
امام الهبايب صرت طود حمى له طود=رياح المشاكل ما قدرت تشلع اطنابك
تمسكت بالقرآن وبسنة المحمود=ووقفت بطريق الشر , وتوزع اطيابك
ولاهو غريبٍ منك هالمجد يا ابن سعود=جدودك بنوا هالبيت والبيت يزها بك

وسلامتكم