ديوان الشاعر ::: سلامة الجعفري :::

[سلامة الجعفري]

ديـوان الـشـاعـر : سلامة الجعفري

[سلامة الجعفري]

الحمد لله رب العالمين والصلاة والسلام على خير المرسلين
وبعد ففي البداية شكر جزيل وامتنان لكل من كان له يد في انشاء هذه الديوان

واتمنى ان تحوز قصائدي ـ او ماتسمونها قصائد ــ على رضاكم واستحسانكم

كما اني سأحاول ترتيبها تبعا للغرض وتبعا لتاريخ كتابتها


هذا وان حصل نقص ـ وهو لاشك حاصل ـ فإني استميحكم العذر

وبالله التوفيق

[سلامة الجعفري]

القصيدة الاولى



الالف اولف من شجـون القريحـة=واكتب بيـوت بالمعانـي فصيحـة
ماهب بسب ولاهي ايضـا مديحـة=مثايـل ٍ قامـت تهيـم بخيـالـي

البا بداية مابتـدي ذكـر مـولاي=وارجيه يغفر لي ويستـر خطايـاي
هو الذي يمـه رجايـه وشكـواي=سبحـان خالقنـا عزيـز الجلالـي

التـا تمنيـت بحيـاتـي ولافــاد=اكثر حياتي كلهـا هـم وانكـاد
لكن مادمت بعافيه عـاد وش عـاد=حـرام ماتصفـق يمينـي شمـالـي

الثا ثـراء الانسـان ماهـو بمالـه=ثـراه لاصلحـت لربـه عمالـه
وكل ادمـي لابـد يـوم زوالـه=دنيا نبـي عنهـا نشـد الرحالـي

الجيم جـور المعتـدي لـه نهايـه=مهما تجاوز فـي حـدود الطغايـه
لابـد ماترفـع للاسـلام رايــه=وتهدم صروح الشرك هو والضلالي

الحا حيـاة ٍ كلهـا ذل وخضـوع=وشلون معها العين ترتاح بهجـوع
موتك ليامن مت والراس مرفـوع=احلى من الذله لـو العمـر طالـي

الخـا خويـك لاتكـدر مزاجـه=مادامه بجنبـك لـو انـه خواجـه
واليا اشتكى لك لاتزيـد انزعاجـه=خله يصير مـن الهواجيـس خالـي

الـدال درب ٍ ماتدلـه لحـالـك=خذ لك دليله لاتخاسـر حلالـك
خل التهور عنـك مالـه ومالـك=الغيب عند اللي على العرش عالـي

الذال ذل النفـس تصبـح رفيعـه=نفسك هواهـا خالفـه لاتطيعـه
ترى الذي نفسه خنـوع ودنيعـه=شرى لها سب العـرب دون مالـي

الراء رجوعك بالعطية ليا اعطيـت=ماهو بقولـة هاتهـا ذاك لاطريـت
اخير لك لو كان ماكنـت مديـت=ذكر الرجل للـي يسـوي خمالـي

الزاء زيادة كـل نعمـه بشكـران=هذا لنا مذكور في وسـط قـرآن
من لاشكر ربه ولو كـان شبعـان=لابـد ماتقلـب عليـه الليـالـي

السين سم الله علـى الله ماتسويـة=يبارك لك ويعطيك ماكنت محريـه
ورجل ٍ يجيب الهرج لك لاتخاويـه=حيثه يودي منـك هـرج ومقالـي

الشين شم عـن ذاك راع النميمـه=واحذر من الغيبـه تراهـا عظيمـه
لو كنت تنظر بك صفات ٍ ذميمـه=الكامل المعبـود مـر س الجبالـي

الصاد صاحب من يقـدر مقامـك=اللي ليا جيته تشـوف احترامـك
وابوك طع رايه وحشـم عمامـك=واكرم مقـام اقاربـك والخوالـي

الضاد ضحك سنون بعض الرجاجيل=ماهـو دليـل ٍ للمعـزة وتبجيـل
كم واحدٍ لاجيت رحـب بتهليـل=ويطعن بظهرك كـل ماجـا مجالـي

الطا طريق الحب هالوقـت منقـود=ياما وياما طش مـن ناعمـة عـود
يجرها اللي نيتـه غـدر وجحـود=وتطيع لامره غصب مابـه جدالـي

الظا ظلمها بصورة وصوت سجـل=دايم يهددها الـردي يـوم دجـل
والبنت بالتصديـق دايـم تعجـل=حتى ربطهـا فـي وثيـق الحبالـي

العين عيبـت الشبـاب بسوايـاه=لكن ترى بعض العـذارى مخـلاه
بالسوق تمشي وان حكت صوتها آه=لو يسمعـه شايـب يجيـه الهبالـي

الغين غوت كـل منهـو نظرهـا=متعطـره ولباسـهـا ماستـرهـا
وبيدنها الجـوال ترسـل صورهـا=ولاارسل لها مرقـم يجيـه اتصالـي

الفا فريه كـان عميـت بالقـول=مقصودي اللي مالقى عنه مسئـول
الخير مثل الشـر ماهـو بمجهـول=مااجاوز بما قلـت حـد العدالـي

القاف قولي مامحى صـادق الحـب=اللي على وضح النقا ماالحقه سـب
كم واحد بالحـب قلبـه تعـذب=يشكي من الفرقا ومن صـد غالـي

الكاف كمل نص دينـك ستيـره=مطيعـة لله وتحـفـظ سـريـره
تصير جنبك فـي حياتـك نصيـره=بالدين والدنيـا وحفـظ العيالـي

الـلام لومـك للرفايـق ليـا زاد=الغى الصداقة وانتهى الملح والـزاد
لكنّ خلـك للعجاريـف جحـاد=مادامت العشره بـدون احتمالـي

الميم ممشى كـل شخـص برايـه=ومن لاقـداه الله فـلا لـه قدايـه
ومن طاب بالنـاس الردييـن تايـه=حيث الردي مايفيد في كـل حالـي

النـون نـاوي مابقلبـي ابـديـه=لكن كتمته خايـف ٍ مـن تواليـه
قالو ترى مـن لايجيـك بمشاريـه=لاجيت له شرهـان ماهـو مبالـي

الهاء هوايـة جنـة الخلـد بـادي=وان الولي يرفـع مكانـة بـلادي
والشعر والقيفـان ماهـو مـرادي=عطاي من معطي العطايـا الجزالـي

الوا ولد عمك ليااحتجت موجـود=مهما حصل من بينكم هجر وصدود
احذر تسولف لاجنبي عنه بحقـود=لاابغضت ابن عمك هو يصير سالي

اليا يطول القـول لكنـي انهيـت=والعذر كان اني تجاوزت واخطيـت
يالله صلاتك عد من طاف بالبيـت=على الذي موصوف باحلى الخصالي

[سلامة الجعفري]

القصيدة الثانية


ابني بيوت الشعـر وارفـع عمدهـا=ولا اقـدم الا الطيبـه والجزيلـه
ماالذ من حاجه تجـي فـي وعدهـا=ولا افضل من التفضيل لاهل الفضيله
والليله الفرحه عجز مـن رصدهـا=لاشـك راع الحمـل لازم يشيلـه
نقيـت قيفـان ٍ تكـامـل عـددهـا=امدح بها ربعـي رجـال النفيلـه
هرجه تكـذب ليـن يطلـع وكدهـا=وهرج يصدق لـو تخفـى دليلـه
وحنا هل الامجـاد مبطـي سندهـا=عيـال وايـل مابهـم قـول قيلـه
امجادنـا حتـى الاعاجـم شهدهـا=من قبل دور المصطفى وقبل جيله
ويلان في سـود السنيـن وجهدهـا=نرقى مقامـات الفعـول الطويلـه
نـار ٍ لنـا بخـزاز يشهـد وقدهـا=وذي قار يوم الفرس هجت ذليلـه
من سالـف الايـام حتـى جددهـا=عادتنـا مانرتـضـي بالهزيـلـه
والمرجله ماكـل شخـص صمدهـا=وحنـا نتكـي للحمـول الثقيـلـه
ومنـا شيـوخ ٍضـدهـا مافنـدهـا=تسند لهـم كـل الامـور الجليلـه
كليـب للـعـزه مـثـل مافقـدهـا=مروي حدود المرهفـات الصقيلـه
وحتـى الشجاعـه سلمتنـا عهدهـا=بفعل اخو نمشه عز من يلتجي لـه
وفعايـل الاكـرام ماحـد ٍ جحدهـا=لكن مصوت بالعشـا مـن مثيلـه
وان كان للطولـه زعيـم صعدهـا=مايخفـي التاريـخ مجـد القبيلـه
منـا مخمـدة الفتـن فـي مهدهـا=آل السعود ان ضاع نـور الدليلـه
وال الصباح عـدود كـل ٍ وردهـا=وال الخليفـة بالسنيـن المهيـلـة
قلتـه وراع الطيبـه مـن وجدهـا=ويستاهل التكريـم منهـو حصيلـه
كـل القبايـل مخطـي ٍمـن نقدهـا=النـاس كـل ٍدون حقـه كفيـلـه
والحمـد لله عايشـيـن برغـدهـا=يالله تعـز اهـل البيـوت الظليلـه
وقـتٍ بـه العربـان تفعـل بيدهـا=قفى وجا من فضـل ربـي بديلـه
لكن تـراث الخلـق يبقـى مددهـا=لتشييد حاضر عـزة ٍ تنتمـي لـه
ياعيـال وايـل لابتـي ياسعـدهـا=ابيات شعـري فـي ثناكـم قليلـه
الجمعه اللي عـاش منهـو عقدهـا=عسـى يباركهـا منـش المخيلـه
ويالله ياعـل الخيـر دايـم بعـدهـا=ونبقى لبعضنا عز عن كـل ميلـه
عندي علوم ٍ مـن سمعهـا حمدهـا=النصح لدروب السنع تحتـوي لـه
الدين هو طـب النفـوس ورشدهـا=والعلم يرفع من مشى فـي سبيلـه
ونار الفتن مذمـوم رجـل ٍ وقدهـا=وترى العدا تفـرح بشـب الفتيلـه
واليا ظهرت ملزوم نسعى لركدهـا=من شان ماتفـرح قلـوبٍ عليلـه
عبرت عن غايـه بقـاف ٍ سردهـا=وانا مـن الويـلان مانـي جهيلـه
ربعي هل الجدعا ذرى من قصدهـا=تاريخهم بالمجـد كـل ٍ دري لـه
والختم ماارزم بالسحايـب رعدهـا=اهـدي تحياتـي لـكـل القبيـلـه
والجمعه اللي عاش منهـو عقدهـا=عسـى يباركهـا منـش المخيلـه

[سلامة الجعفري]

الحياة دروس




الحياة دروس للجاهـل مثـل مـر الكـرام =لو تمره خـص ماهـو مستفيـد دروسهـا
من يدقق نظرته لو شاف سرب ٍ من حمـام=غير تطلع لـه قضيـه يشتعـل فانوسهـا
الغبي يبقى غبي لو جاوز التسعيـن عـام=والرجال رجـال ماتمـدح علـى ملبوسهـا
الفعول حبال توصـل لامتهـان ولااحتـرام=وكل ناس ٍ مالها الا نـاس مثـل جنوسهـا
ولاني اذكى الناس واكرمهم وعداني مـلام=شاعر ولي عين تبصر والامـور اقوسهـا
بس والله مااتكلـم غيـر انـا قـد الكـلام=ماهي بقولة ربابـة جـر قاضـب قوسهـا
عيبي اني دوم اجامل واحتمل رمي السهـام=وفخري اني لي نوية ماهرجـت عكوسهـا
ولاني بدنيـاي ضايـع لاحـلال ولاحـرام=ولاابلش بنقد الذنب لامن مدحني روسهـا
وكثر مادققـت بالدنيـا لقيـت ان السـلام=ترك ناس ٍ ماتونـس خاطـرك بجلوسهـا
وانك ليا صرت بين امريـن ملـزوم لـزام=تاخذ اللي به عنا نفسـك وبـه هاجوسهـا
نوب اللي يسعدك تاليته عليك اكبـر نـدام=ليا لمحت شفاه يقراك الـردى برموسهـا
ثم جيت بآخر اللحظات فـي وقـت الختـام=ليا السوالف رايحه وانته بعثت عسوسهـا
الصبر خيره وخير من الف ثورة وانتقـام=ولامس العبرة بغيره خير مـن ملموسهـا
واجتماع الشمل دايم حصن عن ذل انقسـام=وعادة ً شكوى السنون بجملته من سوسها
لكن الله ماينـام ان كـان مخلوقـه ينـام=يالضعيف ابشر بحقك لاانكشف مدسوسهـا
وانت ياللي كنك الخفـاش يفـرح بالظـلام=اشهـد انـك ماتخليهـا علـى ناموسهـا
مار لاهبت عواصيف الزمن فـوق الخيـام=يتضح لك مسلمين الناس مـن ماجوسهـا
وادري ان الله على امره كل تصريف الانام=والعباد بحكمتـه خالـف طبـاع نفوسهـا
بس ماطـاب لحيـاة انسـان مايلقـاه دام=فيه ساعه تضرب الاخطار فـي ناقوسهـا
ينتهي حلم الخيال وماعمـر يصبـح هـدام=شجرة ٍ خضرا وجفت واوقعـت بيبوسهـا
ليت من يسعى على زرع التشاحن والخصام=يفطن لها الغاية اللـي رجلـه الا تدوسهـا
قلتها والشعر ماعندي به شفـوف ومـرام=مـدة اللـي عالـم ٍ بالخافيـه وحسوسهـا
ولاقصدت الشهره اللي عند أكثرهم غـرام=لي مبـادي والرديـة ماشربـت بكوسهـا
الرجل لاصـار طيبـه مايعلـي بـه مقـام=الشعر تلقاه مع عفـن العـرب وهدوسهـا
وانا شايف كم عيون ٍ كنها بـرق الحسـام=ناس لاقلت القوافـي حكحكـت بضروسهـا
لكن الله مدته لـي خيـر مـن مـد اللئـام=واشهد ان الناس بلواهـا بفعـل نجوسهـا
والنهاية مااتكلـم غيـر انـا قـد الكـلام=ماهي بقولة ربابـه جـر قاضـب قوسهـا

[سلامة الجعفري]

راس مشراف


يامحلا وان جيت في راس مشراف= مشراف نابي فوق كـل المشاريـف
ترقب تقل ماشفت لك شي ينشـاف=تمد عينك فـي جميـع الاطاريـف
تضيع من قلبك هواجيس وخـلاف=وتقول يادنيـاي مامـن تحاسيـف
شوف الفضا ياراعي الضيقه اسعاف=يزيل عن متنـك جميـع التكاليـف
لو انت واحد دجت مع كل الاطراف=كنك مع ربوع ٍ نشامـى عواريـف
ثم ابتديت علوم وافيـن الاوصـاف=اللي لهم ذكـر ومكـان ومواقيـف
شبيت نارك ثـم قلطـت الاصنـاف=وسويت لك كيف ٍ على غاية الكيف
ليا اخذت لك فنجال والكيف لك كاف=حسيت في شي ٍ يفوق التواصيـف
ويازينها لاقمت تبدع علـى قـاف=يترجم شعور ٍ بالاعمـاق ماشيـف
ياقلبي اللي شاف بالوقـت ماعـاف=شفت الحقيقة شوف ماهي سواليف
نظرت للدنيـا بميـزان وانصـاف=وفرقت بيـن اقبالهـا والمناكيـف
تجري بتقدير الولي قـدم وخـلاف=وكل ٍ لقا ساعة فرحها هي الزيـف
من حيث ماتقبـل توجـه للانكـاف=دار الكـدر والهـم دار التكاسيـف
حتى ولو هي سايرت حين تنعـاف=مادامها تفنى وكـل ٍ بهـا ضيـف
ربحانها اللي سالك ٍ درب الاشراف=ماينخدع مثـل انخـداع الملاقيـف
مطيع ويصاحب رجاجيل الاعـراف=اهل الوفا اللي مبعدين ٍعن الحيـف
ماهم هل اللجـة مطافيـق ٍ خفـاف=واليا حداك الوقت راحـو تناتيـف
بيحت عن سدي وغنيـت محـراف=ولالي على دنياي قدرة وتصريـف

[سلامة الجعفري]

يامن ضحك سنه على فلان وفلان=انظر لنفسك زين واعـرف خللها
مالك بحال الخلق رابح وخسـران=لاصار نفسك ماانت عـادل ميلهـا
تضحك تقل نفسك لها غير ميزان=والا ضمـنـت الله يغـفـر زللها
تراك انسان " مثـل كـل انسـان=محـدودة" دنيـاه بآخـر أجلـهـا
اصله من النطفه ويكـرم وينهـان=يوم البشر تاخذ صحايـف عملهـا
مافيه قولة تاجـر ٍ جنـب فقـران=تهدى النفوس اللي كبيـر ٍ زعلهـا
واللي حقر بالناس يجزي بحقـران=يصبح دباة ٍ من مشـى ماحفلهـا
الله ماميـز عبيـده بـالالـوان=لاشك بعض الناس تتبـع جهلهـا
بعض العرب غاوي ومغويه شيطان=نفخ بنفسه ليـن صـدق دجلهـا
وان جيت للواقع لو يسام باثمـان=ارداة عمـلـه مايـسـاوي هللها

[سلامة الجعفري]

دورنا وامتهانه


قال الذي شاف البلا من زمانـه=اصبحت والهوجاس قلبي مكانـه
الله يحل جدودنـا اللـي تـوارو=تحت الثرى كل ٍ يجازى بشانـه
تحت الثرى لاشك لو قيل عودوا=وعادوا وشافوا دورنا وامتهانـه
والله ليرجون الولي موت ثانـي=ولاعيشة في ظل عصر اللعانـه
صحيح هم كانو حروب ومعـارك=لكن زمنهـم مايعـرف الخيانـه
من قال عاهدتك وفا في عهـوده=عهد عليـه الله وامنـه وامانـه
نية سليمة يرسل الرجـل بنتـه=مع ابن جاره مايـدور ضمانـه
يمشون في وسط الخلا ولامراقب=غير الذي يخشون يوم امتحانـه
لو تنشده عن ثوبها بعد يرجـع=يظـن ماهـو جـازم ٍ بوكدانـه
الله ياذاك الوقت لو كان عشتـه=رغـم قسـاه وقلتـه واحفيانـه
انا اشهد انه يستحـق المدايـح=وتغلب مافيه من المساوي حسانه
لكن قسـم ربـي وكـل بوقتـه=وانا احمده على الطرى والليانـه
وقت ياكثر الخير به بس يتـرك=بالقلب هوجـاس يزلـزل كيانـه
هم كتمته بين الاضـلاع ساكـن=وياكبرها بيـن الرجـال ابديانـه
صحيح انا لابس ولابي مجاعـه=مار الضمير بجرح يارب اعانـه
اصل السعادة ماهي بلبس طيـب=ولاهي بكثر المـال ولا افقدانـه
كم من فقير بخير مرتـاح بالـه=وكم من غني مهموم فاقد حنانـه
والفقد فقد اللي تشاكيـه همـك=الصاحب اللي مثل سـره علانـه
ماهو صحيب المصلحة والقمـارة=اللي لياحتاجـك يزيـن لسانـه
حتى يحصل منك عوزه ويقفـي=ولايستحي يمكن قريب ارجعانـه
مرة ومرة عنده الوضع عـادي=كنه عليك آخـذ جميـع الميانـه
واكبر بلية شفتهـا فـي زمانـي=ناس ٍ يحسبون التحيـل ذهانـه
وعوايد العربان ماهـي تهمهـم=وقلوبهم من دون خوف وديانـه
ياوقت في بالـي علـوم طويلـه=لكن وش المنتوج غيـر الادانـه
والهرج دام الوضع مابـه تغيـر=ماغير فيه الشخص يحرق جنانه
وانا لي اسباب ٍ على القول تدعي=اللـوم يمـي مايـقـدم بيـانـه
شاعر ولي شعور والناس مثلـي=اشباه بسرور الزمـان وحزانـه
اليا قلت كلمه جاوبتهاالمشاعـر=كم شخص يحسبني انا ترجمانـه
قصايدي باحساسي وحس غيري=احرق فتيل الفكر وانظم جمانـه
ياما جرىموقف ويامـا رسمتـه=من عالم التخييل ضبط اقيسانـه
لكن وكثر القـول مااحـدٍ يحبـه=اباختم بكلمـة مثـل فيـه بانـه
اليا غدت مابين شـارب ولحيـه=مغبوط من بالعمـر زاد افتتانـه

[سلامة الجعفري]

ياصاحبي مابخيـل الا بخيـل الكـلام=اليا متى محرق اعصابي على شانـك
ادور الكلمة اللي منك فيهـا انسجـام=وانا ادري انك محبسها على لسانـك
تبغى تذوقني انواع الشقـا والسقـام=والا تخـاف ابتعـد لابـاح وجدانـك
ماهو كذا ياحبيبـي يامنـى المستهـام=واللي علم في خفياتـك مـع اعلانـك
انا بلياك هـذا الكـون عنـدي ظـلام=مالي عناوين لـو غيـرت عنوانـك
احس حس السجين اللي بليـا نظـام=من كثر ماشفق لك اليا اجفيت بيبانـك
ولا بحس الوحيد بلا خـوال وعمـام=بالله تفكـر شـوي بحـال ولهـانـك
راح اللحم ياحبيبي مابقـا الا العظـام=متى بقولـك ترجـع حـال جيعانـك
ماغير اسامر طيوفك في حلاة المنـام=اتخيل انـك بجنبـي تعـزف الحانـك
تقول لي كل مابيحـت لـك باالغـرام=انـا جنانـي بحبـك زايـد جنـانـك
انته مرامي وغيـرك مابغيتـه مـرام=ريح ضميرك ولاتطري لـك احزانـك
وفجاءه افيق اثرها الدعوى حلام بحلام=وانا بخيالي صور مبسمـك واعيانـك
الله على وجهك اللي مثل بدر التمـام=وياتل قلبي علـى عطـرك وريحانـك
وياويل حالي ليا جت لحظة الابتسـام=والنفس ذابت علـى درك ومرجانـك
شفايفك قصـة ٍ تـروى بليـا ختـام=لو كل حين ارتويهـا عـدت ظميانـك
عطيتني مااظلمك لو كان جودك لمـام=وانته قليلـك يطفـي نـار حيرانـك
قالوا قليل ٍ من المحبوب عالـي مقـام=شف كيف مقنوع في زودك ونقصانك
لكن ماباقي سوى كلمه وانال الوسـام=مدري متى الوقت يبهجنـي بتحنانـك
من كثر مااشتاق تنطقها علي الحـرام=علقت بعيني صور شفتـك واسنانـك
قلها وريح من يحبك واكـف المـلام=وافديك بالروح وارخصها على شانـك

[سلامة الجعفري]

مليت من شوفتك يالصاحـب الجافـي=ياللـي تواعـد وعـود ولاتوفيـهـا
كنت احسب انك تجي في يوم لي وافي=سواة ماتاخـذ مـن النـاس تعطيهـا
اثريـك مالـك خواتـم يالله الكافـي=وحبك لنفسك عن الاخلاص معميهـا
ياشين لاصار مالك شـف واهدافـي=وش حدك الله على العالـم توازيهـا
لو كان قلبك نظيف ومذهبـك صافـي=مااجبرت نفسك على الضحكه تسويها
غريتني بالكـلام وزيـن الاوصافـي=واقشر طبايعك عنـي كنـت تخفيهـا
وانـا بذيـك الليالـي كنـي الغافـي=حقايق الشخص حاجه كنـت ناسيهـا
لكن حياة البشر عرضـه للاصدافـي=والنار ماتحـرق الا رجـل واطيهـا
بالامر خيره وانـا رجـال وسنافـي=من باعني صحبتـه مانـي بشاريهـا
مثل ماكنـت اول احييـك باسرافـي=فرقـاك هلحيـن تطربنـي واحييهـا
غادر والايام تلقـا منـك الانصافـي=وتشرب من الكاسه اللي كنت ساقيها
وتذكر زمان ٍ مضى يوم انت متعافـي=وشلون فـرق اول سنينـك وتاليهـا
هذا هو الوقت يمشي قـدم وخلافـي=لو طالت الفرحه اللي منغمـس فيهـا
والا صحيبك من اكبر جرح متشافـي=ماعقب مـر الليالـي غيـر حاليهـا
ياجعلها الروحه اللـي دون منكافـي=كلمه بهـا يختـم الابيـات راعيهـا

[سلامة الجعفري]

لو كل شاعر مايجوز النصح في شعره يكون = إلا إذا هوملتزم والحق دايم منهجه

مااظن احد يبغى يقدم نصح للي يغلطون = غير الذى يبغى يوقف في مواقف محرجه

اصلا - وهذا فضل لله - كلبونا مسلمون = يعني بلاش نحاصر الشاعر ونقعد نزعجه

ونردد انتم دائما تحكون مالا تفعلون = تقل ان به عن دائرة هالمجتمع من يخرجه

الشاعر من المجتمع إنسان وانتم تعرفون = المجتمع دايم إلى الإصلاح ياما أحوجه

إذا السفينه شقها واحد من اللي يركبون = من دون لايمنع فهي إلى غرقها تتجه

فيا مجتمعنا المسلم اللي للنصايح تسمعون = هل وضعنا هذا يسر الحال أو نستسمجه

يعني لو اسأل اسئله وانتم عليها تجاوبون = ماهو بأنتم بس .أنا. و.الكل. وش نستنتجه

كم واحد يطلق لسانه بالحكي من كل لون = يكذب ونادر ماصدق في كل هرج يهرجه

كم واحد سيفه على الغايب وسيع بالطعون = ياما طعن باقفايته والسن قدمه يبلجه

كم واحد ياما تفرق من وراه الأقربون = نمام يسعى للمشاكل والكلام يمنتجه

كم واحد لامه وابوه اسباب ونات وغبون = عقاق مايرعى مشاعرهم ولايعطي وجه

كم واحد نصاب ياما فوق ظهره من ديون = وان جاه راع الحق دور خيط عذر ينسجه

كم واحد ربى دقن واثره من اصحاب المجون = من شان مقصد يحسب ان الدين شكل وتفرجه

كم واحد خلى الصلاة اللي بها إذهاب الحزون = عايش على اللذه حصانه للمعاصي مسرجه

كم واحد شح بزكاته والفقارا يطلبون = مايدري ان اللي عطاه المال يقدر يحوجه

كم واحد شاف اليتيمه مانظر فيها بهون = لو لبسها بالي ودمع العين قامت تدرجه

كم واحد سلم أمانه مايحسبونه يخون = خان الامانه واحترف بالمشيه المتعروجه

كم واحد يشرب من المسكر وياخذ (كبتاجون) = حتى قضت حاله من اسباب السهر واللجلجه

كم واحد يستتبع العورات ويلد العيون = ياما هتك من عرض بنت جابها بالدبلجه

كم واحد سهران يوم ان الخلايق يرقدون = كله عشان مسلسل ماجن وماجن مخرجه

كم واحد يسمع أغاني ويتمايل ل-اللحون =وكتاب ربي تاركه والذكر نادر يلهجه
كم باقيه من كم لو جيتو ورايه تحسبون = احسن اوقف وادري ان الحق ماحدن يفلجه

لكن قبل انهى كلامي في رجا الرب الحنون = لابد اذكر في حدث صاير بجمله مدرجه

زلازل العيص الاخيره ترشد اللي يفقهون = ماجت كذا والعالم اللي كل كرب يفرجه

يالله تصلحنا ولايغضبك منا المذنبون = إليك مدخل امرنا ومنك ربي مخرجه

[سلامة الجعفري]

أكذب اذا قلت بدري بالسما غايب = مازلت اشوف السما عيني على بدري

أكلّــمه عن عناي وحلمي الذايب = وهموم عيت تنام الا على صدري

لقت لها بالحنايا مسكن ٍ طايب = يزعل بضحكي ويستانس على كدري

كنه يقول احتمل تجزيمة الهايب=اللي رميته بصحرا التيه ماتدري

حتى اقترفت الذنوب وجيتني تايب = ماتقل جيتك هذي وقتها بدري؟

الله مااقسى العتاب بنظرة الخايب = كان الأمل قال متوقعك ياغدري

لكن على ويش يامودي وياجايب = صح القدرصاب ... لكن مانزل قدري

مادامني فارق المخطي عن الصايب = نظرت فوقي وخليت الوطا حدري

اهدرت تاريخ ماني حاسبه ثايب = حتى لقيت اني اخذ درس من هدري

مافيه شي ٍ كذا يجري وهو سايب = عقل الذكي يبتصر ,, والا الغبي مدري

ياللي يسرك ليا ناب العرب نايب = من يدري انه يبي ياصلك من يدري؟

انا شباب وحظيت بمعرفة شايب = من كثر مافاح من نار الزمن قدري

المشكله كلها جذر السدر عايب= والمشكله كيف ابالقى سدر عن سدري

[سلامة الجعفري]

شي غشا الساحة ولوث جسدها

الالف أولف لي قصيده جديده = واناالقصيد بفضل ربي اجيده
شاعر ليا مني نهيت القصيده= كل" يقول من الجماهير عدها

الباء بنيت القول هذا على ساس = ان اغلب الشعار عاشو هالاحساس
كل يقول اني فريد مع الناس = لو كان من يسمع بيوته نقدها

التا ترى ماهو بتقليل شاني = ولا بشان مكملين المعاني
وجهة نظر واللي عليها حداني=شي غشا الساحه ولوث جسدها

الثا ثلاث ارباع مانسمعه هوش = كل يزوم ويجمخ ويبعد الطوش
واثر المراجل كلها داخل الحوش = والسالفه ماهي طوال عقدها

والجيم جالس هالوليده ومرتاح = ومن بعد ماهب الهوى فكره انساح
واصبح يذبح بالقلم كل الارواح= مامن سيوف للمعارك جردها

الحا حمانا الله من بعض الامراض= اللي لها وان صابت الشاعر اعراض
يقوم يعبد له غرض بين الاغراض = وتمره احداث الزمن مارصدها

الخا خرق كل العوايد والاعراف = يفخر بذاته فخر من فوق الاوصاف
واليا مدح ربعه تجاوز للاهداف= تقل انه افعال النشامى جحدها

الدال دور الفخر ماني بملغيه = ولاني موطي شخص فعله معليه
كل على ساسه يجود مبانيه= تبقى الحقايق لو تخفى سندها

الذال ذميت الفخر بس من شان = انه يسبب عنصريه وبهتان
واصل الفعايل مع قديمين الازمان =يوم السنين اللي كثير جهدها

الراء رحل وقت السيوف الشطيره = من عقب مادانت لصقر الجزيره
اليوم كل مستريح بديره = وانعام ربي مايحسب عددها

الزاء زمنا فيه شرطه وقاضي =يوفى الرجل حقه بليا تغاضي
وش السبب نتعب على هرج فاضي = ماهو مزيد الشعر حاجه فقدها

السين سقت اللي يريح ضميري = واللي زعل من هرجتي يستخيري
قدام لايزعل علي ويغيري= ابااخبره بعلوم كل " حمدها

الشين شيال الحمول الثقيله = ماقال جدي كان شيخ القبيله
هو يفعل بيمناه وادرك حصيله = واللي تعب من شان حاجه وجدها

الصاد صامت ماتفاخر ولا زام = ولامدح نفسه كما طبع الاكرام
لن المثل معروف من ماض الايام = مداح نفسه ماوفا في وعدها

الضاد ضم الشعر اغراض عده = ياللي تجيب العلم ياللي ترده
لازم على الشاعر ينوع بمده= واليا بنا ابياته يجود عمدها

الطاء طلوع القاف محلاه طايع = يوم ان عسره مايحقق طمايع
الناس ماتجهل دليله وضايع = كم كحل عين صار سبة رمدها

الظاء ظهر بعض الملاقيف يدعون = إلى أمور هم بها مايعرفون
قالو نريد الشعر رمزي ومدفون=تلقا النفوس بفهم قصده نكدها

العين علم مانفع يوم بدوه =يبغون نفع الشعر لاشك ضروه
ادخل لبابه عالم تو عرفوه=اكثرهم اخفى قصة ماقصدها

الغين غالب مايقولون سامج= والمشكله ياكثرهم فالبرامج
يقعد يولف بين عامج ولامج=مرة يحدرها ومره صعدها

الفاء فهيم ان كانها بحر واوزان = مار اللغوز يجيبها دون برهان
وان قلت هذي حلها ياكحيلان = قال المعاني خلها مع ولدها

القاف قول فهم معناه باحراج =راعيه ليته يحفظه وسط الادراج
مالله دعانا للتكلف والازعاج=ياهل النفوس اللي تدور رشدها

الكاف كل الشعر اصلا وسيله = لاخراج هوجاس النفوس العليله
ماعز رجال يجيب الفشيله = ولاكل من قاله يسمى فهدها

اللام لومي خص ماهو بمعموم =اخص به قوم واعديه عن قوم
اليا شملت الكل يلحقني اللوم= عند الرجال اللي توفي عهدها

الميم ماني عادل كل مايل= ولابغيت ازعل عيال الحمايل
لكن ديوان العرب له دلايل=ناس تهينه جعل يقفي رغدها

النون نبغى الصدق للشعر عنوان = ونصور الواقع بروعه وإتقان
حتى الخيال يطير من دون جنحان = ونطور الالفاظ ناخذ جددها

الهاء هبط منهو يوصف حبيبه = بزين الحلايا والوصوف العجيبه
هذي بشرع الحب حاجه معيبه = غير ان من عنده حيا ينتقدها

الواو واجب من يسوي له ابيات = يخلص لها لو ظل سهران مابات
حتى يجنبها دروب المتاهات= يوم ان بعض الناس ربي قردها

الياء يمكن قالوا الناس لازال=صغير وش يعطي دروس بالامثال
واقول لو العمر بالعرف دلال=أكثر هروج الناس مانعتمدها

[سلامة الجعفري]

عالم هامت بحب الكتابة

ياقايل ٍ عني لك ايام مفقود = ماامطر علينا من سحابك سحابه
نصف الذي في ساحة الشعر موجود = من عالم ٍ هامت بحب الكتابه
ماله اسم عندي سوى دبلة كبود = يخلي الرجال يفقد صوابه
حتى الذي مايطلب لشعره لشهود = مغلفه باحساس صدق وذرابه
مما حصل لو كان ماهو بمحدود = ماكان تعب للمعاني ركابه
مليت صورة عاشق الكاعب الخود = اللي كلامه صار كله رتابه
يبدى يوّصفها بلا شرط وقيود = ماهو بحاسب للمروءه حسابه
ثم يتمنى ليت ماكان مولود = من بعد ماشاف الجمال وشقابه
يقول وابلواي من ناعم العود = عزالله انه مسرف في غيابه
ماهو بحب ... الحب مافيه منقود=كم طيب ٍ مبطي شكا من عذابه
هذا غلاه مغامره مابها زود= ومرادها الخيبه وفيها الخيابه
ماغير صاحبها عشق وجه ونهود= ومصرح ٍفيما جرى لاغرابه
دام الحيا ماهو على وجه نمرود= يمكن على الجمهور يفصخ ثيابه
والمشكله سيفه ورا الوصف مجرود = كانه سأل والخل عيا جوابه
يرسم معارك بين طارد ومطرود= ويحط نفسه فارس ٍ ينعدابه
وأنا وأنا ... وصلنك ايامك السود= صاحبك كل ٍ بالملاقا يهابه
تقل يتعزوا ضد رجال معدود = ماهي بحرمه ماتعرف المجابه
ياقايل ٍ عني لك ايام مفقود = ماامطر علينا من سحابك سحابه
تلومني والوضع هلون موجود = من عالم ٍ هامت بحب الكتابه

[/quote]