سوؤال؟

[فيصل الرسلاني]

عندي سوؤال يالحبايب ...يمكن يكون غريب ...لكني بحثت عنه في التاريخ ولم أجد جواباً له ..

السوؤال: وش سالفة لبس العقال في العالم العربي والخليجي خاصه؟

بحثت وإنتهيت بأساطير لم أتقبلها.. قيل انه في إحدى المعارك خسر المسلمون فلبسوا العقال حزنا أو ليروا حزنهم
وقال أنهم كانوا يعقلون الإبل به ويثبتوا به العمامة التي تقيه من حر البادية ..طيب ليش السودانيين ما سوها تقريباً نفس الجو واللغه..

على العموم ..علُي أجد جوابا عندكم..

[**masha3el **]

والله يافيصل فتحت اكثر من موضوع وما اقنعني اي شي
بس اتصور ان تطور العمامه ومع الزمن تحولت الى عقال كوجاهه للشخص اللي لابسه
لانهم اول كان عيب الرجل يكشف راشه يعني لازم يلبسون العمامه وبعدين الطربوش والقبعه وحنا العمامه تطورت للشماغ والعقال لان بلدنا حاره ويلبسون الشماغ ويحطون العقال يثبته من الهوا حسب بيئه الجزيره العربيه
يعني هذا تحليلي لان لو نرجع للتاريخ كانوا الصعاليك هم اللي يكشفون روسهم والوجهاء والاعيان والطبقات المتوسطه كانو لازم يغطون رؤسهم من ايام الجاهليه
اما حكايه حزنهم على الاندلس احسها سخيفه وماتنبلع

تحياتي وبنتظار الراي السديد

[فيصل الرسلاني]

:rolleyes::rolleyes::rolleyes::rolleyes::rolleyes: :rolleyes:
أممم هذا نفس ما لقيت في خرافات الإنترنت ..نريد العلم اللي يجمد على الشارب ...وين شيبان المنتدى ..لا يتحفونا شوي...ترى ما عاد ألبس العقال إن ما عرفت سالفته...
وليش أغلبية الملتزمين لا يلبسون العقال ..وأذكر مرة كنت في أحد مراحل العمر كنت منهم...وأتشرف بذلك
لكنني أحب لبس العقال والتكشخ والتمسح :)
فكانوا يقولون لي (من لبس العقال عن الحق مال) ...إنت بديت تنحرف من يوم لبست العقال ...وكانت تحز في خاطري..وكنت إذا شفت واحد من إخوياي أدس العقال تحت مقعد السياره ولا راحوا لبسته ...:)

ننتظر شيبابننا الأكارم

ألف شكر كاتبتنا القديره والعزيزه مشاعل .

[بدرفهد الجعفري]

الاستاذ القدير فيصل الرسلاني

بالحقيقه السؤال مهم ولاجابه عليه ليست شافيه

انا لن اكتب لك هنا ماسوف تجده في النت لاني لم ابحث لاني متاكد انك قمت بالبحث عن ذلك قبلي

لكن ما كنت اسمعه من الشيبان انهم كانوا يقولون في البدايه كانوا يضعون "عقال الابل" اللي هو الحبل المصنوع من الوبر لتعقل فيه الابل , يضعونه فوق رؤؤسهم لتثبيت العمامه والافتخار بأن لدى هذا الشخص ابل واستمر الوضع على هذا الحال وصار اللي ماعنده ابل يضع اي عقال وتطور الامر الي ان تغير من عقال الابل الي عقال مصنوع

وحتى وقت قريب هناك بعض الشيبان من يضع عقال الابل !

اما عن عدم لبس بعض المشايخ او "المطاوعه" للعقال فلم اجد اي تفسير لذلك مع اني كل ماسألت واحد منهم يقول عادي مافيه شيء , يعني الظاهر الشغله صارت موضه بس

تحياتي لك استاذنا القدير

[فيصل الرسلاني]

أتحفتنا يابوفهد بهالطله ...وما ذكرت الله العالم إنه أقرب لصواب مالم يأتني أحد الشيبان بسالفة طيبه :)

أنا وجدت صور في النت لبعض العبٌاد اليهود والنصارى ...يلبسون شيئا زي يشابه لبس الملتزمين عندنا للغتره أو ألشماغ....كرم الله أهل الطاعه عن االكفره والمشركين.
وهذا أثار فيني تسائل هل هذه الطريقة في اللبس الغتره والشماغ دليل خشوع وخضوع في العبادات كما وجد عند الأديان الأخرى... أم أنه فقط تميز يتميز به عن العامة من الناس..


وأشكرك مره أخرى وأهلا وسهلا بك

[صالح الأسود الجعفري]

الاخ فيصل الرسلاني
سؤالك مهم وانا اتفق مع
اخوي بدر فهد الجعفري
دمت بخير

[فيصل الرسلاني]

حي الله صالح...مرحبابك

ولا زلنا ننتظر كتاب "الشيبان العقُال في بيان لبس العقال";)

صدقوني هالعكال (باللهجه العراقيه) يبيله من يؤلف فيه كتاب...

ليش وشلون:confused:

أنا اقولكم وشٌوله ...
بالمختصر والموجز ... العقال
في لبسته القبائل لها أشكال وألوان..منهم من يميله يمين ومنهم من يميله يسار ومنهم من يفهقه ورى(أي يرجعه إلى الخلف:)) وإلا يكبسه قدام..
والدخيل له لبسه ..والطالب بالفزعه يحلته (يحذفه أي يزته :)) على المفزوع إليه..:D
وعلى طاري حذف العقال ...يخبرني أخي ..يقول دخلت أنا وعمي على سلمان بن عبدالعزيز وسلمنا و جلسنا في مجلسه ...يقول شوي وإلا دخلوا شيبان لهجتهم لهجت يام...ويحذفون ن عقلهم على سلمان ..يقول وسلمان بس يتصدد بيده عن العقل لا تجي في وجهه...يقول ويزعل الأمير ويطردهم ..وطرد اللي بالمجلس كله..
وهم طالعين عمي يقول لأخي: يوم يرفع هذا صوته علينا وش بلاه وش جاه ...قال ياعمي هو عقب هالعقل اللي جاته طايره عقل...من عذره

نرجع للموضوع العقال

والقطريين لهم عقال خاص والكويتيين كذلك والعراقيين عقالهم يبيله رجالين مايشولونه ..والجنوب عقالهم غير الشمال سواء في السعودية وإلا في العراق وإلا أي بلد عربي
ولا ننسى الفلسطينين والأردنيين كذلك...فيه منهم يلبسه على بدله :)
ومنهم شابهنا باللبسه..
وعلى هالموال يغنٌى للعقآآآآل :)

طبعاً أنا طمرت إستخداماته الخاصه والبروفشنل عند شيبانٌا إستخداماً خاصاً وراقياً في عملية التأديب والتعبير عن الغضب ...وصوته الرنان لا مر من جنب إذنك طاير له وريررر.
وكيف أنه من العار أن يكون عقالك يضحك (أي مفتوح من الأمام) ..طبعاَ هذا عند اللي توهم بادين يلبسون العقل ...وإلا الشيبان ما ضربوله حساب

ولو بسردلكم سوالفه ما إنتهينا ...لكني أرجع لسوؤالي وأقول
وش سالفة العقال الصجيه(الصحيح):more70:


العذر والسموحه على الإسلوب الجديد في الكتابه اللي مدري والله وش يبي..لكن الظاهر إنه من مفعول الريد بول اللي قردعت منه على الطريق

[فيصل الرسلاني]

للكاتبه القديره مشاعل:

فقط للتوضيح وحتى لا ينزغ الشيطان في النفوس.
.أنا لم أنتبه لما كتبت إلا قبل قليل عندما رجعت أقرأ الردود مرة أخرى ....أحسست أن ردي لم يكن مناسبا أو قد يفهم على غير مقصده.
ولا أعلم إن كنت إنتبهتي لذلك أم لا ولكن

أرجوا أن لا تفهمي ردي على ما كتبتي بأنه إساءه ..أنا قصدت بالخارافات ماجاء في الإنترنت من معلومات التي لاتقبل منطقياً
أما مشاركتك وردك على العين والراس..

العذر والسموحه وأنت كاتبه قديره لك مكانتك في هذا الصرح وأخت للجميع
ولا يعجبني أن اسيئ لأي عضو وزميل لنا في هذا المنتدى أيا كان ومهما كان.

إن شاء الله أن ردي لم يفهم على غير مقصده ولكن حرصاً مني أردت التبيين.


وللجميع الشكر وكلم إخوه وأخوات لم نرى منكم إلا كل خير

[**masha3el **]

هلا فيصل
وفعلا انا تحسست من ردك على مداخلتي وتضايقت قليلا << احلفي قليلا


بس بعد التوضيح زال العتب ولك مني الشكر والتقدير