كوكتيـــــل شمــــوخ

[شمــــــــوخ]

مسيناكم مسونا
عالبوابي لائونا
وان زئفتوا كتير كتير ..
بتكونو بتحبونا.. :D

على طاري ذا الاغنيه من شاف صباح باخر فيديو كليب لها قسم خلاااص مايصير المفروض تعتزل الله يحسن خاتمتنا بس
المهم ماعلينا منها مرحبا فيكم كل ابوكم
داخله المجلس تكفون ابي قهوه وبسولف عليكم شوي
وبقعد كذا لين تخلص دلتي
الله يعينكم علي بس لكن تذكروا انه تكفير ذنوب انشالله
حمدلله خلصنا من المقدمه ..

.
ببدا سالفتي بقصه سمعتها وحبيت انقلها لكم ..

كان هناك رجل عابد زاهد أطال الله عمرة فظل عاكفا يعبد الله ليل نهار وعندما قبض الله روحة سأله هل ستدخل الجنه برحمتي أم بعملك؟؟
العابد تراهى ورد بل بعملي..
فامر الله الملائكه ان يضعوا كل عمله في كفه ونعمة البصر في كفه فرجحت نعمة البصر على كل عمله بالدنيا..
فسأله الله تارة أخرى هل ستدخل الجنه برحمتي أم بعملك فقال له العابد : بل برحمتك يا رب العالمين وأدخله الله الجنه برحمته..
.
.
.
.
سبحان الله هذا الرجل العابد الذي قضى عمره في عبادة الله
جمييييييييع عمله في الدنيا لايوازي نعمه واحده من نعم الله عليه..
فاين نحن منه
اللهم نور مضاجعنا في التراب.. وثبت ألسنتنا عند السؤال بحسن الجواب.. اللهم أرحمنا إذا انقضت آجالنا.. وانقطعت أعمالنا.. ولبسنا أكفاننا.. وفارقنا منازلنا.. وأختم بالباقيات الصالحات أعمالنا.. اللهم كن معنا في دار البلاء.واعفو عنا وارحمنا.. برحمتك يا بديع السماوات والأرض.. يا ذا الجلال والإكرام.

تجيني احيان اقعد افكر باشياء تقهرني
اولهم_ ليه احنا عندنا بطاله ؟؟!!
بجد وش السر في ارتفاع نسبة العواطليه اللي يبون الوظيفه ومايحصل لهم
يعني معقوله تكون المجالات الوظيفيه مو قادره تستوعب ولا تغطي اعدادنا الكبيره !!
والا الوظايف كلها محجوزه لاصحاب فيتامين (o)
والا كل اللي قاعدين هذولا مب كفو وضيفه ؟؟!!
والا وش القصه بالضبط ؟
طيب اذا جيلنا الحين ثلاث ارباعهم عواطليه اجل بكره عيالنا وعيال عيالنا وش بيصير فيهم !!
طيب وش رايكم لو نصير كلنا نشتغل بالاسهم مب احسن
والله جد شي يدخل لك فلوس ويعطيك ارباح واحيانا خساير عادي هذي التجاره مره ربح ومره خساره :D
بس المقابل شي واحد حرق اعصابك
بس انها بالنهايه وظيفه تشغل وقتك وتدخل لك فلوس ..
.
.
.
والشي الثاني_ يقهرني ويفرحني بنفس الوقت
لما اشوف واحد معاه بكالريوس واخرتها يشتغل بكاشير بسوبرماركت والا سيكيورتي
والحجه انه مالقى له واسطه تخليه يتوظف ..
اللي يفرحني هو طموحه يعجبني هالشي وبقوه بعد
بس يقهرني لاني احس انه تحطيم واحباط له
بكالريوس ويشتغل كذا!!!
والله حرام : (

.
.
الشي الثالث اللي قاهرني <=انتي وشوله عايشه انتحري وفكيهم تكفين :D
لا جد والله مره كنت اتفرج على مسلسل قطري وجت الحرمه وفتحت الباب لحق الكهرباء
المهم انها قالت له احنا قطريين مواطنين ماندفع فواتير
وش ذا غرت منهم صراحه
ليه هم اللي معهم الجنسيه القطريه مايدفعون فواتير
واحنا معك جنسيه والا مامعك دافع دافع الله لايعوق من شر بس انتبه لاتنصب عليك هالشركات وتقعد تزود والا تنقص بالفاتوره :d

.
.
.
.
فقير وعندي المال الكثير..فقير وملبسي غالي حرير
ويا صاحبي الحافي الفقير..ابنشدك ابسألك وشهو الحصير !!
وابسألك وشلون انا امر وانهي..واذا حكيت قبل انتهي من كلمتي
يقاللي سم ويصير
ولاشكيت من غفلتي طوّل زمنها
يقاللي لاتشتكي .. ماخلقت الشكوى لأمير
وابسألك وشلون انا مع كل ذا .. اقول عن نفسي فقير ؟؟؟
ياصاحبي لاصار للضحكه ثمن..وصاروا اصحابي كثير بس بثمن
والوفاء مابه وفاء الا بثمن..ابسألك ماني فقير ؟؟؟
..

يعني شلون يابو مساعد
لا الغني مرتاح ولا الفقير مرتاح
وهن يارحلة الدنيا : (

.
.
.
مره وانا بالكويت كانت وحده من البنات توها مستلمه وثيقة تخرجها من الثانوي
زبدة الموضوع انها قالت لنا ان نسبتها 82 % <=بالضبط ماني متاكده بس في هالحدود
قلت يووووه الله يعينك اجل على التسجيل والحوسه ويبي لك واسطه
ياحياتي ياانا احسبهم مثلنا : (
قالت ليه ذا كله انا معاي قبول فوري
قلت وش قبول فوري وانتي نسبتك كذا
قالت نسبتي هذي اعطتني قبول فوري بالجامعه مستحيييييل مايقبلوني
سكتت صراحه بس ضاق صدري وماحبيت اقول لها لانها فشييييله من جد : (
تخيلوا عندهم هالنسبه تعطيها قبول فوري
ووحده معاي ماسنجر برضو كويتيه و تقول ان اللي قسمهم علمي عشان مناهجهم صعبه هذولي القبول الفوري بيبدأمن 75% والادبي من 80%
واحنا عندنا بعض الاقسام توقف عند 95% وتراني مااقصد الطب اقصد الاقسام الثانيه
وش السبب ؟؟ المشكله انهم يقولون الطالب ماله كرسي
وش اللي ماله كرسي؟؟!! طيب يعني لو جاب معاه كرسيه من البيت عادي !! قسم بالله عذر يجيب الهم :D
طيب وسعو الجامعات خلوها تستوعب اكبر عدد
افتحلو كذا فرع للجامعات خلوا كل كم قسم بمبنى لحاله ووسعوه وخلوه يشيل اكبر عدد من الطلاب
مب كذا ازين من ذا الاسواق اللي ذابحينا بها
ولاتقولون لي الجامعات الاهليه على قفا من يشيل
ترى مو كل الدنيا قادره تدفع عشان تدرس;)
من جد حراااااام على الاقل خلو ذا الشباب الضايع اللي لاشغل ولا مشغله يلهون بشي
مب يوقفون عند الثانوي وخلاص بحجة ان مافيه قسم يستقبلهم..

.
.
يموت الشجر واقف وظل الشجر ما مات&&&رياح الدهر تصرخ وهي تجرح جنوبـه
لك الله شجر للموت ما ترخي الهامـات&&&بقت وقفتك يـا رافـع الـراس مهيوبـه
شموخ الشجر عبره لمن يفهم الشـارات&&&والإنسان في غفلـه والأيـام محسوبـه
أرد النظر لاشك يـا نظرتـي هيهـات&&&أبستوعب العبـره بالأشجـار مكتوبـه

*خالد الفيصل*

.

طاحت يدي مره في كتاب عن الابراج الصينيه وقعدت اقراه لقااااافه :D
اول شي قعدت اضحك على مسميات الابراج
(الفار_الكلب_العنزه_القرد_الديك......الخ.) <=كل اسامي الحيوانات موجوده الله يقدركم بس
المهم قعدت اشوف وش قصة هالابراج وعلى اي اساس تستند
لقيتها تعتمد على السنوات
يعني مثلا من 1900_1901 <=هذا برج الفار
1901_1902<=هنا يصير برج الثور
1912_1913 <=هنا نرجع لبرج الفار :D
وبعدين تدور السنين وتختلف الحيوانات اقصد الابراج
واذا جت سنة 1924_1925 رجعنا للفار مره ثانيه
ههههههههههههههههههههههههههههههههه
ياااااااااااااااربي عفوك انا اخبر الصينيين اكبرمن كذا

بصراحه عجزت استوعب
بدور اساس علمي والا واقعي والا حتى خربوطي استندوا عليه مالقيت
وش ذا الشي اللي ياثرعلى سنه كامله ؟؟!!
وبعدين مولود هالسنه غير مولود السنه اللي عقبها بس ممكن يصير زي مولود السنه اللي عقب اللي عقبها <=انقلب راسها لاتلومونها

واتوقع اذا خلصت المسميات قاموا يعيدون بالاسماء القديمه او يخترعون اسماء جديده كيفهم الفاضي يعمل قاضي
انا كذا استنتجت صراحه
لاني عجزت استوعب العلم حقهم ذا مدري هو عقلي اللي خربان والا هم اللي مخرفين مااعرف البلا بمين فينا بالضبط
بس ايا كان
حمدلله والشكر اصحاب العقول في رااااااااااااحه
مساكين كل سنه بيحددون لها برج
بيقعدون كذا طووووووول عمرهم
الله لايشغلنا الا في طاعته..
.
.

ترى حلاتك لاحملت لصاحبك كلمة عتاب
.......................ان مانطقت بها بوجهه ماتذمه بظهره


ياحلو هالبيت..وياحلونا لو نطبقه..
كان لانشوف احد شايل على الثاني..ولا الحش هو فاكهة كل مجلس :D

.
.
.
.

تراي ماخلصت ودي أقولكم أقلبوا الصفحه بس بكتفي بجزء ثاني للموضوع بعدين : )
وخلصت دلتي بروح :D

اتوقع بتقولون طويل الموضوع نسيت أقولكم قبل أفصلوا الأتصال

معليييييش العذر والسموحه انا كذا لاقمت اسولف ماعاد اعرف اسكت

انا خلصت قهوتي وهذرتي وبمشي
.

ـ" سبحانك اللهم وبحمدك ، أشهد أن لا إله إلا أنت أستغفرك وأتوب إليك "ـ

شمــــــــــــوخ

[محمد الدلماني]

هلا شمووخ


في البدايه اسلوبك رائع في الكتابه جدا


وبالنسبه للنسبه بالكويت او السعوديه شي عادي جدا وانا بقولك ليش


في السعوديه انا درست الصف الثاني ثنوي والثانويه العامه ومنازل ودارسهم متاخر ولا كان لي نيه ولكن قلت انا زياراتي لعرعر كثيره ليه ماتكون منها زياره ومنها دراسه وسجلت منازل بالثاني قالولي ماراح تنجه لان كل سنه لم ينجح احد

العاده انا اوصل قبل الامتحانات بثلاث ايام وعلى ماتخلص العشيات يكون باقي يوم لاعندي لاملخصات ولا غيره افتح الكتاب واقرئ ومع هذا فعلا لم ينجح احد سوى طالب واحد وهو محمد الدلماني :):)<<<<<امش يالعبقري


وكذلك الثانويه العامه اللي نجحت وكنت فال خير على ربعي ونجحو معاي اربع تقريبا مع ان العاده لم ينجح احد

في الكويت المنازل صعبه للغايه وحاولت مرارا وتكرارا ولم افلح لانها تبي مواظبه حتى يكتمل النجاح

وفي الكويت يبون اجابات نموذجيه مثل اللي بالكتاب وان نقصت كلمه تعتبر خطا

وامتحان الثانويه العامه من 19 صفحه وكلها متروسه ترس اساله لكن في السعوديه صفحه وحده فقط شوفي الفرق


يعني معادله عادله على صعوبة الدراسه


لي عوده:)

[مصلح النشمي]

.



شموخ بطلي شرب قهوه وشاهي زياده:( كل هالموضوع يبي لي ثلاث ايام اقرى فيه خخخخخ

صباح وفديوها الاخير زي شعرها الاصفر بس ياحلو فديو تسليبها الاول يانا يانا



لي عوده يوم الربوع بعد ما اخلص من القراءه

[عبدالكريم العنزي]

اللهم نور مضاجعنا في التراب.. وثبت ألسنتنا عند السؤال بحسن الجواب.. اللهم أرحمنا إذا انقضت آجالنا.. وانقطعت أعمالنا.. ولبسنا أكفاننا.. وفارقنا منازلنا.. وأختم بالباقيات الصالحات أعمالنا.. اللهم كن معنا في دار البلاء.واعفو عنا وارحمنا.. برحمتك يا بديع السماوات والأرض.. يا ذا الجلال


الاخت الفاضله / شمووووووووووخ


لاهنتي على هذا الطرح



تقبلي تحياتي

[سندريلا]

انا زئفت كتير كتير



اولا مشكوره على الطرح الممتع ولو ان الموضوع عور عيوني بس الحلو فيه انه متنوع ومو على وتيره وحده فيه اسلوب تشويق واثاره

:more74:
المهم مالكم بالطويله


بالنسبه لنا حنا القطريين الحمدلله عايشين عيشة دلــــــــــــــــع لا كهربا بفلوس ولا ماي كله مجانا من الدوله الله يعزها لازم الحكومه تميز المواطن عن المقيم هذا شي لا بد منه وماقصد من كلامي تحيز او عنصريه لا طبعا

وعلى طاري الكهربا حنا متعودين من الحر اللي عندنا ان مكيفات البيت ماتطفي ليل نهار سواء كنا موجودين او طالعين عاد يوم رحنا للسعوديه خداماتي يحسبن مثل قطر المكيفات 24 ساعه مشغلاتها وامي تمشي وتطفي وراهن .


نجي للجامعات حنا عندنا اللي يجيب 85 يودونه بعثه خارجيه يدرس على حساب الدوله اي تخصص بأي مكان يختاره وربي قلبي يعورني على السعوديين يجيبون نسب بالهبل واخرتها مثل ماقالت شموخ ماله كرسي ولو لقوا له كرسي بعد التخرج ماله كرسي وظيفي وين يروح وش بيكون مصيره شلون بيتزوج شسالفه ياجماعه ؟

عندنا بقطر مسمى الخويا هذا مثل الحرس الوطني عندكم شغلة الخويا هم الحرس الاميري او الحرس الخاص هذولا قسم بالله رواتبهم توصل 12000 و10000 واقل شي 8000 وهم ماكملوا الابتدائية انا احس ان هالشي يشجع الشباب انهم مايكملون دراستهم وهذا اللي صاير عندنا .

المهم شكلي استرسلت بالكلام صحيح الحريم هذرتهم واجد استحملونا

تشااااااااااااو

[بشاير]

غاليتي شموخ

موضوع رائع جميل ومتنوع أظهرتي العديد من المشاكل الي نمر فيها وما خفي كان أعظم

أشكرك من الاعماق على تألقك وتميزك الدائم في أطروحاتك

لاهنتي يالغلا

دمتي في رعاية الله

[محمد الزناتي]

الأخت : شموخ

ألف شكر على موضوع الرائع

سجل أعجابي

[شمــــــــوخ]

هلا محمد

يسعدني مصافحتك لموضوعي أولآ :) ومداخلتك ..

محمد تكلمت عن نموذج الأجابه عندنا هنا وهنااك بالكويت ..

بقولك شيء بالنسبة عندنا بأختبارات الثانوي الأجابه النموذجيه الكامله مانتقيد بها أهم شيء تكون وافيه بالمطلوب

أما الأسئله 19 صفحه :eek:

واجد على طالب الثانوي ..هو يختبر ثانوي والا دكتوراه ؟ :D

أجل بهذي الحمدالله أسئلتنا وريقه وحده وينجحون بس المشكله في النسبه ودخول الجامعات

.

مشكور محمد لحضورك

[شمــــــــوخ]

هلا مصلح منور

ياشين العجز بس :D

هذا وأنا مأجله باقي سوالفي وهذرتي بغيت أحط لكم أقلب الصفحه بس هونت

قلت طولت عليهم <<<<<<<< تخبركم ماتحبون المواضيع الطويله :D

.

بأنتظر عودتك

لاتطول علي همن أقفل الموضوع <<< تكفين :D

[شمــــــــوخ]

هلا عنزيه :)

أسمحيلي سندريلااا هذي ماتعودت عليها :D

مشكوره لأطراءتس وذوووقتس ...بس الخط مكبرته عيونتس تعورتس ليه ؟

..

بالنسبه للفواتير هذا أنا بس شفتها لقطه بــ مسلسل قطري ..

بس أعتقد الآن بيحطون لكم فواتيرعلى حسب ماسمعت <<<<<<<< مانظلتكم تراها :D

بعدين ترا بعذركم فيه فرق شاسع بين عدد سكان قطر وعدد سكان السعوديه :D

يعني لو بحسبكم يمكن أهل الرياض أكثر منكم يعني بعذركم يعطونكم ببلاااش

فيه مقوله ذكرتها الآن على طاري سكان قطر قالها الشيخ زايد الله يرحمه وعلشان ماتزعلين مانب قايلتها :D

تسلمين لحضورتس دايم منورتني

.

[شمــــــــوخ]

بشوره هلا وغلا ياحبي لتس بس :D

دايم منورتني وربي



تسلمين لحضورتس لاهنتي


..

[شمــــــــوخ]

حياك أخوي محمد الزناتي


مشكور لحضورك لاهنت

..