سلام يا (ابن معيض) ويا آخوي (جلعود) = وسلام يا أهل الطيب يـا عيـال وايـل
سـلام لا يحصـى ولا هـوب مـعـدود = زود(ن) على مـن قـال هـب المخايـل
أطيب مـن المنثـور والمسـك والعـود = وأحلـى مـن السكـر بـدر الجـزايـل
أصفى من البلـور وأنعـم مـن الخـود = وأجزل مـن بيـوت الشعـر والمثايـل
أهدا من الذعـداع وأقـوى مـن النـود = وأندى مـن عـروق الزهـر بالخمايـل
ومن عقب ذا يالله نبـي نكسـب الفـود = ونقـول كلمـة حـق فيـهـا دلايــل
اعيال وايل عـز مـن بـات مضهـود = يصبـح بعـز(ن) مـا يـدوّر بـدايـل
اعيال وايل حـد مـن مـا لـه حـدود = والحـد حــد مدهـمـرات النصـايـل
اعيـال وايـل بالفعـل حاشـوا الـزود = وتشهـد لهـم بالفعـل كـل القبـايـل
صغيرهـم يبـري ثمانـيـن ملـهـود = وكبيرهـم فعلـه سطـم كــل قـايـل
أرداهـم اللـي مـا لقـي فيـه منقـود = وأطيبهـم اللـي نـال كـل النفـايـل
انشـد وتلقانـا هـل العـز والـجـود = غصب(ن) عن الحقران واهـل الرذايـل
تاريخنـا نـار(ن) علـى راس مسنـود = وأقوالـنـا دايــم تتـرجـم فعـايـل
ردي على من كان أضعـف مـن الـدود = يبـي يـشـوّه أو يـحـط الدغـايـل
حنا على وضـح النقـا ننطـح الكـود = ومـن قـدم الجزلـه تجيـه الجـزايـل
وأنـا أقولـه فخـر والـرب محـمـود = واللي يبـي يزعـل فـلا نيـب سايـل
سلام يا (ابن معيض) ويا آخوي (جلعود) = وسلام يا أهل الطيب يـا عيـال وايـل

شياهي مزينها عن الي يريدها = زحول الرجال اهل الفعال المطارفه
يافون بالشطات ويدلهون بالرخا = يومن بعض الناس ينكر معارفه
ياويل منهو بالملاقا يضدهم = ينهج كما وادا غثا السيل جارفه
ماقول قول ايقال شوفي ابعيني = في ساعتا به دمعت العين ذارفه
حامو هل العشوا على حق جارهم = في موقفن فيه المنايا امشارفه
لاوردو عدا يبشرونه بالروى = يروون لونه تصافق مغارفه
من لابتا لاقيل يضرب بها المثل = هني منهو بالصداقه ايحالفه
كل قوم ولاعناز ياجاهلن بهم = اهل ناقتا بالكون بالخوف واقفه
سكان دار الخوف مرهبة العدا = بكل ديره جيتها شفت طارفه
وفريسهم يوم اللقا يندعيبهم = من لانعرفه عرف نسمع سوالفه

ياراكب حيل ٍ بروسه لجاجه = امضريات ٍ للمساري والادلاج
لا روح ٍ بالدو كن انزعاجه = سفن ٍ حداهن بالبحر بعض الامواج
سفن البحر سود ٍ بروسه عجاجه = وارقابهن يبّـاس من زعج الامواج
تلفون شيخ ٍ نازل ٍ بالفجاجه = اجديع اللي للمجاويخ زعـّاج
مودع على ( المطران ) كدر العجاجه = ( هجيجهم مابين ابانات وسواج )
خلاّ ( المريخي ) طايح ٍ في مداجه = وخيالة الجبلان رحّـم ومن راج
سلم على اللي راح للحول ماجه = وقله خويك ضايق الصدر وعلاج
انخه (بوايل ) كان ودك احراجه = القيض زل وبارق الوسم لعّـاج
حطيت لك ريش النعايم ولا جه = والبطن لك يامدبس الخيل مسهاج
امي توصيني عن الانزلاجه = وقلبي ليا جا طاري البدو ينفاج
امي تقول ان التمني سماجه = واقول انا بعض التمني به افراج

من البارحة بالقلب هجـس ٍ وتعبـار = هجـس ٍ وهاجـوس ٍ تعاقـب نـكـيـفــه
الصبر مفتاح الفـرج هـو والافكـار = من لاصبر تصبـح حـوالــه كـسـيـفــه
يالله يالمـطـلــوب يـــاوال الاقـــدار = انــت الــذي مــدات جــودك لـطـيـفــه
يالله يالـمـعـبــود عــاون هــل الكـــار = تــحــل شـــدات عـلـيـهـم كـلـيــفــه
اللـي مجالسهـم بهـا بـن وبهـار = ونـجــر ٍ يـصــوت لـلـمـسـيــر رجـيـفــه
ومكارم ٍ للضيـف عجـلات وكبـار = ومـفـطـحــات فــي صـحــون نـظـيــفــه
تقليطهـم للضيـف قعـدان وبـكـار = وحيل الـغـنـم وقـت السنيـن الـحـفـيـفــه
اكرام ضيـف البيـت حـق وتعبــار = والـكــل مـنــا يـفـتـخــر فـيــه ضـيــفــه
يا مزنةٍ غــرّا مـن الـوســم مــبـدار = اللـي جـذبـنــي مــن بـعـيــدٍ رفـيــفــه
هلت مـن القبلـه هماليـل الأمطـار = مـن سـيلهـا الــوادي غـدالـه وحـيـفــه
تمطر من الهدرا اليـا خشـم سنـار = وتسقـي ديـار مـحـقـبــه والـحـتـيــفــه
وتضفي على كل المفالـي والاقطـار = وتصبح بهـا خــدان ربـعــي مـريـفــه
عقب الحيا فاحت بها ريـح الازهـار = وتعاقـب الـنــوار مــثــل الـقـطـيــفــه
وترعا بها الغرا وتبنـي لهـا طـار = عقب الضعــف راحــت ردوم مـنـيـفـــه
اذوادنــا مـايـرتـعــن دمــنــة الـــدار = ولا يـرعــن الا بـالـفـيـاض النظيـفــه
يرعـن بعـبـدالـلـه وجـبــر ٍ وجــبــار = خـيــالــة يـــوم الـمــلاقــا عـنـيــفـــه
ترعـى بها الوضحا من الذود معطـار = غبوقـة الخطـار عـجــلٍ عـطـيــفـــه
يبنـي عليهـا بنيـة اللُّبْـن لجــدار = عـقـب الـضـعــف راحــت ردومٍ مـنـيـفــه
اذوادنـا يرعـن بنـا سـر وجهـار = من دونـهـن نــروي الـغـلــب والـرديـفــه
ترعى بضف الغوش بقصاف الاعمار = تقطف زهر مرباعهـا مـع مصيفـه
ما هي سوالف مسرد ٍ عقب ما نـار = اللي هرب واطراف رمحـه نـظـيـفــه
إن سوهجوا عنهـا قليليـن الابصـار = من دونها نـروي السيـوف الرهـيـفــه
ان سوهجوا عنها معاميس الابصـار = حنـا نـرد اللـي يـبـيــهــا نـكـيــفـــه
خطو الولد مثـل البليهـي اليـا ثـار = زود ٍ على حمله نـقــل حـمــل ألـيـفـــه
بشدا هديب الشـام شيّـال الاقطـار = واليـا كـبــر حـمـلــه تــزاود زفـيـفـــه
وخطو الولد مثل النداوي اليـا طـار = صيده من الجزلات ماهـي ضعـيفـــه
ترجي العشا من مخلبه وقـع وطيـار = حسه على صيد الخـلا لـه وحــيـفــه
وخطو الولد يصبر على موتـة النـار = صفـر علـى عـود تضـبــه كــتـيـفـــه
وخطو الولد يامال قصـاف الاعـمــار = لانـافــع ٍ نـفســه ولا مـنـه خــيــفـــه
ورجل ٍ بلا ربعه على الغبن صبــار = يمنـى بلا يـسـرى تـراهـا ضــعـيـفـــــه
واليا بخصته ماسـوى ربـع دينـار = مع العـرب يشبـه خـطــاة الـهـــديـفــه
حنا فريـق ولا نغبـي سـنــا الـنــار = مـا نـنــزل الا بــالــديــار الــمـخـيــفــه
ودار ٍ به الحقـران ماهـي لنـا دار = حتيش لو صــارت خـصــاب مـريــفـــه
وحنا لك الله مـن بعيديـن الاخبـار = والنفس مـا نلحـق هواهــا حـسـيــفـــه
حلويـن للصاحـب وللخصـم قهــار = وعـدونــا لــو هــو بـعـيــد نـخــيــفـــه
حنا كما المشخص عن الصرف ما بار = بالوزن يرجـح والمصـاري خفـيفــه
وتلقـى منازلنـا رفيعـات واخـيـار = والرجل عن دوس القصايـر حـفـيــفــه
لابـد مـا نـسجـلهـا تواريـخ واذكـار = وتبقـى لـدسميـن الشـوارب وظــيـفــه
الا ومـع ذلـك لــك الـلـه لـنــا كـــار = عــن جـارنــا ماقـط نخفـي الـطـريـفــه
نرفا خمال الجار لو هـو بنـا بـار = ونضحك حجاجـه بـالـعـلــوم الـلـطـيـفــه
ولا نبدي الخافي لاصار مـا صـار = وندمح خمال الـجـار لــو بــان حـيـفــه
ونرفا خمالـه رفيـه العـش بالغـار = ونودع لـه النـفــس الـقـويــه ضـعـيـفــه
والجار له قيمـة وحشمـة واعتبـار = وجارتـنــا عــن كــل عـايــز عـفـيـفــه
ما زارهن مـن يـبـغــي الحـيــف زوار = الا ولا عـنــهــن نـــدس الـغـريــفــه
نـبـيــه إلـيــا بــدل الـــدار بــديـــار = وكــل بـجـيـرانــه يــعــد الـوصـيــفــه
نكرم سبال الضيـف حــقٍ وتـعـْبــار = لا مــن ولــد الـعـفــن شــح بـرغـيـفــه
أحد ٍ علـى جـاره بختـري ونــوار = و احـدٍ عـلـى جــاره صـفــاتٍ مـحـيـفــه
وصلاة ربي عـد ماخضـر الاشجــار = على الرسول اللـي عـلـومــه شـريـفــه

يابحـر جـده ياعـذاب المحبيـن = يامدعي طبـع الهـوى والسعـاده
بيني وبينك حلف حسب القوانيـن = والغـدر ياهـدار يعلـن فـسـاده
بعشره ثلاثه عـام ستـه والفيـن = رقم ثلاثـه جيـم تقسيـم صـاده
تحت اسم صلح البحـر والبلاديـن = وقعت انـا ويـاك عقـد وافـاده
فحواه كله ينـدرج تحـت بنديـن = اعيدها لـك كـان تبغـى اعـاده
البنـد الاول واضـح بالعنـاويـن = حسب الشروط المرفقه بالشهـاده
من يوم عشره لين سته وعشريـن = هدنه وكلـن عايـش فـي بـراده
والبند الاخر نخفي الزين والشيـن = وكل علـى ماقيـل ياخـذ مـراده
وباركت لي يابحر بين الصلاتيـن = وصافحتني واعلنـت نيـة سـداده
وطلبت لي شـي يبـل الشراييـن = وطلبـت لـك فنجـان سكرزيـاده
واليوم اشوفك تحترق بيـن ناريـن = تقفي وتقبل لي على غيـر عـاده
من وين رايح وين رايح على ويـن = تعـال عنـدي ياضعـيـف الأراده
ماني مسيحي من جنـوب الفلبيـن = ولانـي بحكمتيـار شهـيـد زاده
ولاني من البشمر ولاني من الصين = ولاني كمال حسين حمدي حمـاده
اسمي محمد وايلي من هل الديـن = وكـل حسـب حريتـه واعتقـاده
انا من الشملـي شمـال الجبليـن = داري وكـل يفتخـر فـي بـلاده
ديرة بني وايل كـرام وعزيزيـن = اهل الكرم واهل الفخـر والريـاده
يومنها بالسيـف والرمـح ذربيـن = عدوهـم يعـاف لــذ الـوسـاده
ربعي وليا نخيتهم جـوك عجليـن = كلن يكاهز فـوق صهـوة جـواده
ناس على شقر الاصايل سلاطيـن = مثل العقاب الصيرمي فـي هـداده
على ظهور الخيل مثـل المجانيـن = ولا حولو رمز الوفـاء والرفـاده
منهم عقاب الخيل ذعـر المعاديـن = والشيخ ساجـر يستحـق الاشـاده
والشيخ بن هـذال راع الدواويـن = شيخ الشيوخ الصيرمي في طـراده
ومنهم مريبد من زحول العداويـن = عقيد ربعـه يـوم هـي بالنكـاده
ومنهم خضير اللي رجح بالموازين = من رد بسهـوم العباريـد صـاده
ومنهم مصوت بالعشـا والشعاليـن = المـوت عنـد وجيهـم واهجـاده
ومنهم غدير الموت والناس داريـن = كـم راس شيـخ بالمياديـن بـاده
اعطيك نبـذه والمعانـي نياشيـن = من كثرهم عجزت لوفـي عـداده
لاشفت فوق الورك اليمن هلاليـن = تراه سيف الموت يعنـي حصـاده
نيرانهـم تاتيـك مثـل البراكيـن = لاشذ سلطان الهدى عـن رشـاده
ركبوا على قب سـواة الشياهيـن = وعقيدهـم علـق وسـام القـيـاده
النادريـن القاطعـيـن الميامـيـن = مال للعدو في وجه الابطـال راده
طشوه بوجبه الذيـاب السراحيـن = واركوا على ارقاب المعادي حداده
سربة هل البلهـا تـدك المياديـن = يهتـز منهـا اللـي قـوي فـواده
الخاشعيـن التايبيـن المصلـيـن = يرجون مـد اللـي كريـم مـداده
للسيف غمـد وللبطولـه عناويـن = وحنا عناويـن الفخـر واعتمـاده
وان كان عندك يازرق الموج قولين = يغنيك عن شعـر المعنـى وكـاده
فلا تهددني مـن اللحيـن للحيـن = بالموج واسرار المحيـط وعتـاده