السلام عليكم ورحمة الله وبركاته
اشكر كل من واساني بفقيدي الغالي
رحمه الله تعالى
لاأراكم الله مكروه بعزيز

ليله يابن سابل طويله عصيبه=ياطول ساعاته معه عذبتني
والوقت جاير والليالي كئيبه=وبقعاء يابومصعب بجوره رمتني
نجمي هوى واظلم سماي بمغيبه=وطفت شموعٍ بالفرح لازمتني
اداري العبره بصدري نحيبه=وصرخة ألم تفجرت وجرحتني
والنار في جوفي تزايد لهيبه=والحزن خيم يوم بقعاء افجعتني
والضيم خنجر والضلوع الضريبه=مع عبرةٍ بلعتها واشرقتني
فارقت شبلي والمفارق مصيبه=ودّعت (هيثم) والدموع اغرقتني
عقب اتصاله في دقايق عجيبه=كلمه وكنه صاعقه وصعقتني
تأكدوا بعض الاسامي قريبه=ورسالته يادوبها واصلتني
دقيت رقمه قلت صامت بجيبه=عندي امل لو العلوم اذبحتني
خايف عليه وخوفتي ماتعيبه=حرٍ صغير وطلعته معجبتي
تقفّل الجوال بالوضع ريبه=ولاني قريب وحيرتي كبلتني
صرخت بوجيه الرجال الشحيبه=قالوا عوضك الله قلت ألزمتني
قالوا توفى قلت ربي يثيبه=صغير والدنيا عليه اعجلتني
دعيّت ربي خالقه يعتني به=وانا رضيت بقدرته وحكمتني
وهللت باسم اللي عليمٍ بغيبه=وكبّرت له تكبيرةٍ عززتني
عين الولي فوقي وفوقه رقيبه=ويعلم عن اللي بالحشى ضايقتني
لوانها بالهوش محدٍ يصيبه=احط روحي درع وادحم بمتني
اضفر بهيثم وانتخي واعتزيبه=ولا انضام لو كل العرب حاربتني
والله ما يقفي طليب بطليبه=روحي فدا ولجل فداه ادفعتني
بس المنايا نوخت بالغصيبه=غصبٍ علي يابوك ماشاورتني
غليبتي مامثلها من غليبه=وكل الزوايا عنك ياما اسألتني
عزاي بالفرد الصمد نلتجي به=جرحي عميق ولوعتي جرجرتني
خذاه من فرق صحيب وصحيبه=مكتوب والفرقا معاها اكتبتني
كتبت اسمه فوق ذيك النصيبه=لجل الزيارة كان رجلي قوتني
جوني يعزوني جموعٍ مهيبه=وشوف يده بينهم صافحتني
ماني مصدق وانتظر من يجيبه=وكلمة توفى بحدها شرحتني
ومن قالي ماجور بذهول اجيبه=اجامله لو كلمته خانقتني
امنتك اللي كلنا نلتجي به=ربٍ رحيم ورحمته واسعتني
يروف في قلبٍ توارى حبيبه=عساه يشفع به ليا داهمتني