سلمت يانسل الشيوخ العريقه = اللي لهم في ساحة المجد ميقاف
ياسعود ياحافظ معزة رفيقه = بك الأمل معقود ماحوله اخلاف
بقلوبنا يكفي ملكت الوثيقه = ونزهت قافك عن مواضيع الاجحاف
من نهج جدك ماخذٍ لك طريقه =سعدون لا من قلت وش توفي اوصاف
شيخِ يلم الطيب وازكى رحيقه = ونفحة شذاه تفوح مالمّها اغلاف
طيبه تشكل بالجزيرة حديقه = اشجارها ظلٍ بها زين الاصناف
قوي باس وكل فعلٍ يطيقه = ريف الصديق وللمعادين سياف
له بالشعر ديوان يسطع بريقه =ينحت على صم الصخر راهي القاف
ياما غطس وسط البحور العميقه =واستخرج اللولو من بطون الاصداف
الشعر ضمه ضمن صفوة فريقه = ماهو بعاله مكسبه وصف الاضعاف
الشعر بعده ماتهنى دقيقه= ينعى الجزالة كل ماستوطن وطاف
هذا العواجي يوم تذكر حقيقه = فعلة مشرفنا من ايام الاسلاف
واليوم ما تستدرج النفس ظيقه = دامك هنا ياسعود بالمنبر تشاف
تسير وسط البحر تعبر مظيقه = لوان سطح البحر مترامي اطراف
شامخ وتشبه للجبال الشهيقه = وثوب المعزة ظافيٍ كنه الحاف
شاعر مميز تملك احرف انيقه = وتنثر شعور يطرب اسماع الاشراف
شرفتنا بالمحفل اللي تليقه = ورفعة راية مجدنا فوق الاكتاف
كملت مجدٍ له جذورٍ وثيقه= مجدٍ عظيمٍ ماتهدم به اضفاف
كسبت من فعلك علومٍ طليقه = وكفخت باسم الوايلي فوق مشراف
وان جت على الفزعات ماهي عويقه =ربعك حزامك بالمواقف لها اطياف
ابشر بفزعه يابن عمي رشيقه= ماعاقها طول الصحاري والارياف
لجلك ندز الصوت لا مانعيقه= ندعم به اسمك يالعواجي ولا نخاف
وخذها عهد قدام كل الخليقه = واجب اقبل خشمك بكل ميقاف

من اول اسمع بنار البعد واقفّي =واتجاهل الامريوم يحل طاريها
مااستوعب إن المفارق ناره تصفّي = الين ماشفتني في وسط واديها
والنارقامت تلم الجسم وتضفّي = وانا اتألم واحس بحر مافيها
مالي بقدرة اصد اشوي وانكفّي =متمكنه مني بقبظة اياديها
ماكني الا حطب ولحضنها زفّي = ورضخت غصبٍ لها واقبلت أغذيها
واصبحت جمرة غضا من حرها((اتدفّي))= آهات صدري مع الزفرة تقويها
وجيت اتحامل على بلواي واخفّي = واقول بقوى على الحرقه وطفيها
لكني اقبلت اصفق كفي بكفّي= من شفت حالي ونارالبعد تزويها
ماكنّها الا قنابل دمرت صفّي = رادار حسي عجز إنه يجاريها
وشفت الفرح في خفوقي راسه يذفّي = ومواطن الانس جيش الحزن واطيها
وعروق قلبي بدت في جسمي تجفّي =من عقب مانش ميٍ كان يسقيها
وحتى المشاعر تأن ولالها شفّي = ولافيه منهو على البلوى يواسيها
انا اشهد اني من اول كنت متعفّي= من قبل ماشعر بنار البعد واشكيها
واليوم ماكني الا شخص متوفّي = الروح ماهمها كم عين تبكيها
الله اكبر على الدنيا ولاتوفّي = لوزانت بعين صاحب لا يزكيها
لا بد ماتكشّر بهالناب وتقفّي = وتبين ان الغدر صفوة مباديها