شاش الفكر والقاف من شوشتي شاش=فاض وتزبد وانحدر من مسيله
اروى قوافل وافقت وبل ورشاش=تارد بحور الشعر تنهل جزيله
اكتب عن الهقوات كيف الغثا راش=واسرد حقايق كاشفه للهميله
هبيتي ياصحبة ردى دربها ماش=بانت بواين جهلها من رزيله
جذره عميق وزادها النبت بخشاش=ماتنتهض مادام روحه قتيله
ترضى تعيش العمر واسمه مع اللاش=من ضيعته عيت تسوي جميله
كل الفعايل عندها نقص واقراش=في سلمها بالطيب محدن يجيله
ودك تركه بالخفا داخل خياش=ترمي بها عرض البحر مع طويله
دام الشجر مايل وسيقانه هشاش=مابه ثمر وان قلت مابه ظليله
جث الجذور اوفق من مقابل اكداش=والغرس حرثه يجلب اللي تخيله
وشاش الفكر والقاف من شوشتي شاش=هاض وتزبد وانتثر من مسيله
من صحبتن شاشت وشوّش لها الجاش=عند اللقا تسوى ربوع وقبيله
حياكِ ياخوة غلا نهجها عاش=على النقا والطيب دايم حصيله
تاقف مواقف ثابته مابها غشاش=عكس الجموع اللي تبور بعميله
ثله ولكن عن طوابير واجياش=صملاتها تبري الجروح العليله
اولهم اللي جاشه ابيض من الشاش=عند اللقا بالحق يوفي قبيله
والثاني اللي مدته ماهي طشاش=يكفيك لوهي ظاهره من قليله
والثالث اللي ماهو نجسٍ ونباش=يفرض عليك الود قدره تشيله
الكل منهم ماخذن طيبه وحاش=مع الكرم والجود يمنى صهيله
والكل منهم لا لفى ميل وغباش=ينزل بكتفه للحمول الثقيله
خالد وماجد خصمهم دوم منداش= وسالم معاهم بالفعل مانزيله
متكاملين(ن) دون تفنيد ونقاش=حازوا على الطولات من دون ميله
هذي حقيقة ماوصل قلبي وناش= من صحبةٍ شافت بصدري نثيله
ظللتهم مار الردي فض وانحاش=عند اختباره صار قلبه دليله
ذل وتخبى مارفع راسه وهاش=محدن بقى ياكود نسل الاصيله
فيهم كتبت الشعر تقدير وانعاش=للرفقة اللي مانمت بالهزيله
ومنهم فرقت الطيب عن شلة ادباش=عاشت حياته ظاريه لـ الذليله
وختامها صلوا عدد خفقة الجاش= على النبي هادي البشر للفضيله