من لا عرف مدخله يضيع مخراجه=والناس ماهي سوا يمكن تصدقني
والكذب سلعه رديه عند هراجه=وحبٍ من النوع هذا ما يوافقني
لا صار حبك مزيف في رجا حاجه=من غير تمثيل خذ حاجتك واعتقني
في نعمة الضوء ما نحتاج لسراجه=والنور نور الضماير يا موهقني
خدعتني بابتسامه يوم نتواجه=وصدقت عينٍ بنظراته تلاحقني
وغرّقتني بالكلام العذب وأمواجه=وصبحت بيّدك على كيفك تغرّقني
ولبست ثوب الحرير وسلك ديباجه=ومثّلت دور الحبيب وقلت عاشقني
ماكنت داري عن التمثيل واخراجه=وانتي بطل فلم والتمثيل شوقني
وخلف الكواليس والمكنون بادراجه=بانت حقيقة غرامٍ كان حارقني
واليوم يا زارع البستان وانتاجه=هذي محاصيل حبك لا ترافقني
ولا عاد تشكي ولا تبكي وش تواجه=الله يوفقك وادع الله يوفقني
ومن لاعرف مدخله يضيع مخراجه=ويديّك ماهي سوا .. يازين صدقني

أخوكم:رابح الغضيان