بستان من تفـاح والطلـع زيتـون=لاتندهـش هـذا زمـان الدعايـات
والجو غايم ونمزج لون مـع لـون=ومدرّس التاريخ يصرف علاجـات
والكون واسع يافتى الجود هالكـون=لوضاق في عين الردي كل الاوقات
ماضاق كوني يوم غيري يضيقـون=طلعي سماء ورجلي تروم الطويلات
ومن يدعي في شي من غير مضمون=يضحك على نفسه ويرسم خيـالات
عمايـرٍ تبنـا ومـن ثلـج يبنـون=والشمس فضّاحـه وللثلـج بالـذات
والفرق بحرف التاء نقطه عن النون=لواختلفنـا بالجـمـل والعـبـارات
ومثلك يابن سابل رجـالٍ يعرفـون=لك بالشعر نظره ولك فيه بصمـات
نبذه من ابياتك عن الغيـر يكفـون=تشبع شعر ماتشبع اهياط كشخـات
والشعر لوله راس والسان وعيـون=كان اشتكى مـن عابديـن القنـوات
الشعر ماينساق فـي سـوق تكفـون=ولاثابت إلامثل اجـاء والسـروات
بغداد تحلم فـي فتوحـات هـارون=وهارون مات ولابقي بـه فتوحـات
سميتنـي بالعـذب شكـراً وممنـون=شهـادة معلّـم تفـوق الشـهـادات