شيخنا العاجز يعجـز دولتيـن=قصة التاريخ بـدروس وعبـر
ما ثنى عزم المجاهد عاجزيـن=لا صلاح الدين مات ولا عمـر
ما تنسينـا اليالـى والسنيـن=يوم صلى الشيخ ركعات الفجر
الله اكبر يوم سووا لـه كميـن=حيلة الكفـار باسلـوب الغـدر
قصتـه لـو يتفطنهـا فطيـن=كان شاف انه يموت و ينتصر
ورث ابغزه شبابـا مـا تليـن=قوم ذو بأس اشد من الصخـر
شوفهم على ارض غزه مرتكين=والاصابع بالشهـاده تحتضـر
ما طفت نار العرب والله يعيـن=والرماد ليا حرثتـه بـه جمـر
وكان هالامه تبى النصر المبين=ينصرون الى على دينه صبـر
مثل ماكانواعلى غزوة حنيـن=ومثل ماكانواعلى غـزوة بـدر

الوضع ياساده ماهو حمـل تاجيـل=ان مادرسنـا وضعنـا مـا قـرانـا
اول عدوتنـا الوحيـده اسرائـيـل=واليوم حتـي مـن بعضنـا عدانـا
ضعنا ورا زيـف القيـم والتماثيـل=حتى الدعا نبخـل علـى الله دعانـا
نص العرب تهوى السياحه على النيل=يالله من بعـض الذنـوب اتحمانـا
تقليد لاهل الغـرب بالحـط والشيـل=لا لبسنـا.. لا مشينـا.. لا هوانـا
والله لو انـا نواخـذ علـى القيـل=كان ارضنا يطبـق عليهـا سمانـا
لكـن ربـي يدفـع الجيـل بالجيـل=ونبقى عبـر لاجيالنـا مـن ورانـا
يـا امـة الاسـلام شبـوا قناديـل=على طريـق اللـي لهديـه هدانـا
ماعـاد ينفعنـا الغنـا والمووايـل=ياناس فنان العـرب وش عطانـا؟؟
ارض العرب ساحه لكـل البهاذيـل=كلـن يجـرب قوتـه فـي فنـانـا
والموت باطراف العرب يحسب الميل=تخطيط من ياهـود مـدري سولانـا
وراع الغنـم بالمختبـر والتحاليـل=وان ماسقانـا سـم غيـره سقانـا
والزول مابين الئشبـك والمحابيـل=حلمـه يـدور لـه ذرا فـي ذرانـا
ياعرب هبوا لا تضيـع المحاصيـل=كـل الفتـن ديـروا عليهـا رحانـا
اما حمينـا الـدار هـي والمعاميـل=ولا نـمـوت ولاتحـلـق لحـانـا

لو البحر ياخذ همـوم المخاليـق=نثرت همي فـوق شاطيـه كلـه
ياكثر ما سليت نفسي عن الضيق=اثره معي مثـل المبـاري لظلـه
تمشي بي الدنيا علي غير ما اطيق=كن السعاده درب ماصـرت ادلـه
واحيان تصفقني مع الوقت تصفيق=واعيش في صدمـة حيـاةٍ مملـه
شرعت بيبـان الوفـا للمواثيـق=ولقيـت بيبـان الغـدر مسفهلـه
وانا لو اني للغدر ناشـف الريـق=امـوت حلقـي بالـردى ماأبلـه
( صحيح شي يشقق القلب تشقيق=لا شلت هم وصاحبه مافطن لـه )
صديـق لكنـه قليـل توافـيـق=ذيب وخاوا له مع الـدرب علـه
اشعلت له شمعت وفـا بالمعاليـق=واقفيت عنه وخاطري فيـه غلـه
ويلومني خبـلٍ يحـط المساحيـق=مثل الفتاه الـي بصـدر المجلـه
هذاك ما طبعه طبـوع المطاليـق=وده ابطينـي صاحبـه واستغلـه
مايدري ان جبال نفسي شواهيـق=ومعانقة صـدر السحـاب بمحلـه
تقراني حروف القصايد طواريـق=ونفسي تحاسبني على كـل زلـة

لا يازمـن لا تقتـل الحلـم مقهـور=خلـه يعيـش ويظهـر البـحـر دره
بالك تكون بصدمة الوقـت مبهـور=ولا تلتفـت للـي يطـيـح وتـجـره
وليا انبلـج فجـر كسـا الليـل بالنـور=قل للشتا يطرد عـن الصيـف حـره
شف كيف شعبله غدا شخص مشهور=رويبضـه واصبـح نجـم بالمجـره
اغرس امل فوق الورق تطلع زهـور=وخل الحلا يطرد عن الكـاس مـره
ماكل من غاص البحـر جـاب بلـور=ولا كـل مـن نـادا احروفـه تبـره
لا صار ما تلفي مشاعر على اشعـور=ماينبنـي بيـت القصـيـد بمـقـره
لو ينعرض حرفك على كل جمهـور=بانت عـلا مـات الحـزن والمسـره

اشيل حملي لو غدا كبر الاهـرام=كني هزمت بوجه الايـام دولـه
والفقـر لا منـه تشكّـوه الازلام=عزيت نفسي وانتصرت ببطولـه
تكفيني العزه على دين الاسـلام=( حياتنا ماهى مجـرد سيولـه )
صحيح خانتنـا مفاهيـم الايـام=لان الزمن هذا ( زمان المقوله )
المسأله صارت دعايات واعـلام=وصار البطل باكبر كـلامٍ يقولـه
لحروفنا ياما مشت روس الاقلام=يوم المشاعر ما هدفهـا عمولـه
وياما غرسنا بارضنا شجرة احلام=وليا اثمرت حتى الثمر ما نطوله
واليوم بكهوف الملل حلمنا نـام=كنه يبى يرمـى علينـا خمولـه
وكان الادب مظلوم بيدين ظـلام=ماهي غريبه تشتهر بـه خبولـه
جار الزمان وخلط العام بالشـام=واكبر مهرج بالعرب صفقوا لـه

اخلط العقل في دنياك جرعـة جنـون=وفك اسرك من حبال العقـل والخيـال
وان حسبت الخطايا تحت شوف العيون=ينتهي بك زمانك عبد وسـط الرجـال
وان كتبت القصايد لاجل مـا يملكـون=صرت شاعر ذليل ولو ملكـت الريـال
وان نختك العروبه والعـرب يلعبـون=( فالكـلام كـلامًُ والفعـالُ فـعـال )
لا تخيل المطيره جتك بـرق و مـزون=من جنوب الجزيره لين حـد الشمـال
شاعرٍ مـا يقلـد سابقـات اللحـون=مـن بنيـات فكـره ممتلكهـا حـلال
شاعرٍ ما تلبّس شعـر غيـرى زبـون=فيض فكري تجمـل بالحكـم والمثـال
لو نقول الحقيقـه للعـرب يزعلـون=الحقيقة مريـرة قـد تطيـل الجـدال
اكبر القوم ينهض لاجل ضحكة مجون=يلبسون المعاصى مثل لبـس النعـال
يدعـون العروبـه كلهـم يـدعـون=والعروبه تعاني من جيـوش احتـلال
اين جسمن تداعى لا اشتكى تشتكـون=اين درع الجزيره اين سيـف العـدال
جرح الامه عميـق وكلكـم تطعنـون=وافتخـار العروبـه بالغنـا والجمـال
لا تلومون شاعر صار شعـره يمـون=دام ما كـل مـذن فـي وطنـا بـلال

شعرى يجينى ساعة الحلـم والغيـض=وانا الصريح اللي كثر طيبـى اعـداى
وانا القصيد الي رمى بالبحـر فيـض=تنبع جزيلات القصايـد مـن احـداى
واكثرهن من بين المحانـى روابيـض=وان روحن عـدن علـى كـل عـداى
كم شاعرن يلفى على الشعر تحريـض=وكم شاعرا مثـل قصيـدى اومبـداى
الله مفوضنى علـى الشعـر تفويـض=كنه سحـاب وينتشـي غيـم بـرداى
مارحت ابيضهـن بالاعـلام تبييـض=الخيـل خيلـي والمعـارك ببـيـداى
يا مقرضين الشعر والحـرف تقريـض=ياليتكـم جيـتـوا تـقـدون بـقـداى
اسرى على وجه الدجى واكسب البييض=ياعلهـن طـول اليالـى مـن فـداى
وسويت مستشفـى دكاتـر وتمريـض=ولياانمرض شاعر خـذا وصفـة دواى
لا ستصعبن روضهن الفكـر ترويـض=ولايفن تلفـى علـى صـوت حـداى
واليوم اعرضهن على الناس تعريـض= هديتى واجمل هديـه مـن اهـداى