ثارت براكين الشجاعة بالابطال=عاشوا محررة ارضها مع سماها
بالفعل ماهي بالحكاوي والاقوال=صبوا على روس البلاوي بلاها
هذا السعودي لانتخى الجال بالجال=لبوا يسوقون العمار لثراها
تعطرت وديان خوبة باللي سال=يوم العدا قامت تناثر دماها
بالجو نفاثة وبالقاع زلزال=والله اكبر يوم دارت رحاها
ومن السما حول مظلي للاهوال =حول كما حر نزل من علاها
قمة شجاعة والشجاعة لها رجال=قل للقصايد تفتخر في عطاها
شفهم على حد اليمن صاروا جبال=درع الوطن والله بدرعه حماها
وردوا على حياض المنايا بلا حبال=كلن يقول انا الشهادة عشاها
من حثحث الحوثي على الحد يغتال= قل له يموت الشعب كله فداها
الدولة اللي حكمها بيد رجال =ليا وقف ترجع عداها وراها