يوم استدار الفكر والمعنى على الفكر استدار = وعزّمت اجابه مابدر مني وانا كلي ثقه
هذا وانا شاعر ولي جمهور وآجوب الديار = مايوم عديت الكلام الا وعقلي نمقه
الشعر مايجلب عصى موسى ولايجني ثمار = حتى ولو دارت مقولة : اعذب الشعر اصدقه !
كم لي وانا اقول الشعر مخلوق فوق الاعتبار = ماهو بعبد ٍ داخل ضلوعي ليا ضقت اعتقه
الشعر عندي حس صادق ماعلى وجهه غبار = يزفر همومي وآتنفّس واقعي واستنشقه
لامن تجهم صدري من الضيق باآفك الزرار = وليا احتمى راسي شعر بمسك عقالي وافهقه
كله عشان احسب حسابي قبل لاآفل الستار = ولاخير في رجال مايحسب حساب لمنطقه
وانا ليا مني نظمت الشعر ماعندي خيار = اما يجي من خاطري والا بلاش اني اطرقه
حضرت وانا ديرتي تبقى على الصدر افتخار = وشلون ابكتب والمزايا واضحه وموثقه
لو قلت آبعدد خصال المملكه ليل ونهار = ماضل بيديني قلم يكتب ولاشلت ورقه
من يوم اسسها ابو تركي بجهد واقتدار = وفي كل شبر ٍ بارضها يشهد على زخ عرقه
من دونها ناقف ليا ثار الغضب والدم فار = وكل ٍ يعن الخيل للهيجا ويحمل بندقه
ديرة خذت من كلمة التوحيد فالبيرق شعار = ودستورها الاسلام والقرآن وعلوم الفقه
ياما غمرنا خيرها من يوم ماكنا صغار = واصبح وميض احلامنا مثل الشموس المشرقه
في ظل ابو متعب نعيش العز بثياب الوقار = ومن فضل ربي مانعيش إلا بسعاده مطلقه
شيخ ٍ على دروب المعالي ثبّت اقدامه وسار = ماكن رب العالمين الا على الطيب خلقه
شاهد على سياسته حرصه على حسن الجوار = وشاهد على اصالته جوده وماله لانفقه
يامر وحنا تحت امره دام فيديه القرار = وحنا حزامه لااحتمى الموقف ودرعه وفشقه
عهد ٍ اذا قلبي يخون اني لآذوقه المرار = ولو شاربي مادسّم بفعل الوفا غير أحلقه
ماني ولد وايل اخون الدار لو صار اللي صار = حتى لو ان راسي تدلى فوق حبل المشنقه
ماقلت لي كلمه عشان آمارس طقوس الحوار = واتوه في فكري وادور بوسط حلقه مغلقه
لاكن ابعرف كيف يخلق ثار من واقع مثار = من يوم ماصرنا هدف للعالم المتشدقه
عالم تطول المملكه بالهرج ويديها قصار = والمشكله كل الكلام اللي تقوله : هرطقه
حنا مثل روس النخل مامال ذل وانكسار = ماميله غير الرطب اللي على اطراف عذقه
والحمد لله مانعيش الا بسعادة وازدهار = ولايوم عشنا باحتدام واختلاف وتفرقه