يامـا حـلا ياعبيد حـزاة الاسحـار = جذب الفراش وشب ضـو المنـارة
مع دلة(ن) تجذا على واهـج النـار = ونجر(ن) إلى حـرك تزايـد عبـاره
في ربعة(ن) ماهيب تحجب عن الجار = لا من خطوى اللاش ما شـب نـاره
النجـر دق وجاوبـه كـل مــرار = مالفـه الملفـوف مـن دون جـاره
وأخير منها ركعتيـن(ن) بالاسحـار = لاطاب نوم اللـي حياتـه خسـاره

تركي بن حميد

ياما حلا عقب العشا شبة النار
ــــــــــــــــــ عقب الهجوع لا رقد كل كوبه
بقفرية ياعبيد يودع له اشعار
ـــــــــــــــــــ وسواة فنجال يشوق بصبوبه
حبه على المطلوب من بن وبهار
ــــــــــــــــــ يعجبك بالفنجال صبغه وروبه
كيف يجوز لشارب الكيف والكار
ـــــــــــــــــ لو دوروا به غمزة مــــا لقوبه
في مجلس فيه المشاكيل حضـار
ــــــــــــــــــ بغيبة ردي الحظ عنهم بنوبه
اللي يخزوون المسير بالانظار
ــــــــــــــــــ تكاظموا واللي جليس شوشوبه

لا ضاق صدري شلت صفر المعاميل
ـــــــــــــــــــــــــ ونزلت في راس ضلع منيفي
أجر صوتي في قصيد ومواويل
ـــــــــــــــــــــــــ واشب ضوي لو انا بعز صيفي
وأدنيت يمي عزبة البن والهيل
ـــــــــــــــــــــــ وسويت لي كيفن على كيف كيفي