يومن كل قال لولو ومرجان = أنا جزت نفسي ولاني بقايل
سويت لي في ساحة الشعر ميدان = مايركضن به غير عقب الأصايل
بنت العبيا مهرتي من كحيلان = اليا تباهو بينهم بالسلايل
اليا تبارت مع عذيات الألحان = تسبق جميع اللي تسمى جزايل
أنا ليا مني تغنيت طربان = أطرب قلوبن قبل أغني غلايل
يا لابتي أتنم هل المدح والشان = لو يزعل التاريخ كل القبايل
الله خلق كل العظيمين ويلان = إلا النبي ماهو من أولاد وايل
حكمه من الله بختصرها بعنوان = من شان يبقى للبرية فضايل
وبالمصطفى حنا اجتمعنا بعدنان = الحمد للوهاب جزل النحايل
من مثلنا لاثارت الحرب شجعان = ولاخير في هرجن بليا دلايل
يومنها ضاقت على بنت نعمان = وتعذرت عنها جميع الحمايل
تبكي وتنخى كل ماقيل عربان = وين العرب عن ناقضات الجدايل
قلنا ازبني للي يزيلون الأحزان = عيال وايل محتمين الدبايل
عقيل لكنا مجانين الأكوان = الله كملنا بكل الخصايل
حنا كسرنا الفرس ماهم هل الضان = هل الجموع مقصرة كل طايل
من ضربنا راحوا هلاكا وذلان = من عقب ماهم مرهبين الأوايل
وحنا أكثر العربان بالكون فرسان = وهرجن بلا برهان يرث فشايل
رح إنشد التاريخ عن فعل مشعان = شيخ الشجاعه والكرم والمثايل
إنشد عن الهذال لاصرت بحلان = وتبغى تذرى عن سموم القوايل
وعن راع الأجرب والمسمى غزالان = وعبدالعزيز اللي لطم كل عايل
لابة هل العوجا طويلين الأيمان= صفوة بني وايل لها المجد آيل
وشعلان ماأدراك عن فعل شعلان = تنبيك عنهم مرهفات الصقايل
حكام من حكام من من نسل شيخان = عن مدحهم تقصر جميع الوسايل
وعن السمير أنشد مواريث عثمان = ولادعه يوم الملاقا هوايل
مايدري السلطان لوكان سلطان = يحسب معزتنا علومن سمايل
ذي قار ذي قارين في ماض الأزمان = أخوان عذرا جددوها فعايل
حكام نصف الأرض يوم الشفق بان = بأمر الدية قامت ترسل رسايل
وعن المهيد أنشد ولو رحت لعمان = تلقى علوم أهل النقا والنفايل
اللي تبشر بالعشا كل جيعان = يوم الدهر في كل الأعراب مايل
وعن البقية صار بالقاف نقصان = القاف شاب ولاحصرت الهوايل
ومن عقب ذا يامنكر الحق غلطان = من مثلنا من صفحة المجد نايل