قصيدة من الأرشيف 000 وتعتبر من البدايات الاولى 1402هـ

اقدمها لكم بناءا على طلب اخوي الشايب ابو محمد ( موسى المشعان ) لانه خابرها وابلشني عليها وقصده يعيدنا للماضي بعد ان حسستوه بكبر سنه فتذكّر هذه القصيده وأصر على نشرها هنا لانه خابر العد والمقاطين والابل وحياة الباديه عندما كان عمري (7 سنوات)000

عديت رأس مشلوحٍ يجـذب الشوف= ناب الحجاء روح المشقى فـتـنها
رجـمٍ بدأ فـتان في مرقـبه نـوف = ام الوحـش بحماه تبني اوكـنها
عمـردٍ يزمي على راس قـفـقـوف= يكشف طـوارف شامها مع يـمـنها
معلولياً من نحت الأرياح منحـوف=في راس عيطاء مكهفاتٍ اركـنها
يكشف غطاليس ومغارات وكهوف= ويبدي عليك المخـتفي من وطـنها
رجمٍ بمرقابه راع الصنف مكلوف=مرقاب من روحه تزايد شجنها
جلست بظلاله عقب ساعة اوقوف= ياما غروب الشمس قـرّب زمـنها
أدير بفكاري مواقـيف وصدوف=وعوايدٍ سيل التطوّر دفـنها
زاحت كما زاح الطخى ريح عاصوف= أقفـت بها جرد السنين (ونحنها)
عوايدٍ هجر النيا لافها لوف= عصر التقدم سيف غدره طعـنها
أقفى عليها دون رحمه ولاروف=وأحفاد اهلها حاملينن كفـنها
بس الأثار ورمس نقـشٍ على احـيوف=وأرضٍ خلا ماكن حياً سكـنها
جريت من صدري تناهـيت واحسوف= ونشدت دورات المقادير عـنها
وين الزحول اللي بهم يدحم الخوف= اللي نهار الكون تحمي ضعـنها
اسباع الرجال اللي لها الصعب معسوف= لرزم وغى الهيجاء وثوّر دخـنها
ماعدهم في هالفـيافي خذوا طـوف= ولاعـد مضهود الرفاقه زبـنها
من دونهم حالت غياهيب وألجوف= واللي خلف ريف الهجافا دشـنها
ووين الجهام اللي على العد مردوف= يدهل اقفور المرتفع مع طمنها
يرعى هيت ماصفقه كل مزهوف=بقفريتن نو الثريا مكـنها
يسرح بأمان مهديت كل مزغـوف= وقومٍ تنوش احماه تقطع أوتـنها
ووين البيوت اللي لها القدر معروف= عن المسيّر ما اتقطّب اعـنـنها
برفافها كيف الرجاجيل محيوف=ومن ضدته سود الليالي زبنها
بيوتٍ اتـبـنّا للمسايير وضيوف= وان طبها الخايف حياته ضمـنها
ميسورها يغني معاويز وضعوف= كم من ضريرا جاله العون مـنها
اسلوم عنها جيلنا يعلن اعزوف=داع الحضاره تحت سقفه ركـنها
دارت رحى شهبٍ شلاهيب وعجوف= بيعت بها الشيمه رخيصٍ ثمـنها
ادوار وأسرار ومقادير وحـتوف= سيرة حياة الحي هاذي اسـنـنها
تظهر علينا اشكال وانواع واصنوف= اتخيف اللبيب اللي بعقـله وزنها
تفرّقت شوفات وأهداف وشفوف=والكره خيّم بالنفوس وشحـنها
وحلّ الظلام وصاب شمس الضحى اكسوف= وعقيلها خافت بوايق خونها
وصارت على الطيّب مهاميز واوهوف= وعليه عـفـن الساس يأمر ويـنها
وقل التواصل وانمحى كل معروف=وأيامنا كثرة بلاوي أشطـنها
وعفن الرجال اصبح شجاعٍ وعيروف= سبع اللغات المستحيله رطـنها
ورأي المره مأخوذ ورجالها اوقوف=تقودهم قود العسيف برسـنها
ياحيف ماهاذا لنا عهد واوصوف= حياتنا نقطع بتايت أمننها
أحفاد من ترثت مقاديم وسلوف= نتبع غيانا والنفوس بوهـنها
تردت الهقوات والعزم متلوف= واهل السلوم الوقت غيّر لحـنها
تم الجواب اللي به القصد مكشوف= من عارفٍ له غايةٍ مالكـنها