حسيبي الله عليكم ناس=هرج القفا ماتخلونه
هرج القفا عندكم نوماس =لوهو شويه تزيدونه

يانوف بي ضاقت الانفاس=والنفس بالغبن مشحونه
والهم بالصدر ماينقاس=وبعيوني الحزن يقرونه
ماعاد بالخلق طيب احساس=والطيب بالشين يجزونه
من هرجهم صابنا وسواس=لو يترك الخلق يبلونه
وين الوفا وين طيب الساس=ليه اكثر الناس يجفونه
صارت مصالح ودور افلاس=ومن نافق وحش يغلونه
الوضع في هالزمن منحاس=بدوا هل الطيب ينسونه
والله واللي خلق هالراس=طبعي فلا اعيش من دونه
اشيم الجار والجلاس=واجنب الهرج وطعونه
واعطي ولا ادور النوماس=طبعي لو اموت ماخونه

خلاص راح وانتهى من حياتي=ولاعاد ابي ذكراه والله يهنيه
خله مع اللي به مسوي سواتي=باشيل حملي عنه من شان يعطيه
اول مكانه وسط روحي وذاتي=محدن وصله داخل القلب مخفيه
واليوم ودعته ولا ابيه ياتي=ماودي اشوفه ولا اسمع بطاريه

شهر ثلاثه قد قرب=ونوف تشوف ايامه طالت
صامت لا اكل ولامشرب=ولهم الدقايق شالت
سوت كل افكار اتجرب=حتى بكثر النوم احتالت
واللي له تجمع تسرب=من زود النحافه مالت
صارت عصلا ماتنقرب=دمعة هم وحيره سالت
وفستان الزفه تخرب=توسع واشباره طالت
تابت عن لبسه تهرب=قالت ماهو لا زم قالت؟؟

ابعدت انا اكرهك..واليوم اكرهك اكثر=واستغرب انك..ملكت القلب واعجابي
انشهد اني..عشقتك في زمان اغبر=نعطي ولاناخذ..الا غدر الاحبابي
زرعت حبك وسط..قلبي ولا اثمر=وليتك القلب..وانت شعورك ارهابي
فجرت موقع..غلاك وانت لاتشعر=انك ذبحت المحبه .. والرجا خابي
ماجابك الا شقاي.. وحظي الاقشر=واللي نصحني عن ..دروبك تشفابي
طلعت من تجربة..حبك وانا اصبر=قفلت كل الدروب..وصفحة اكتابي

مرتاحه اعيش بالدنيا بلا صحبه=وش لي بناس تغث البال صحبتها
الكون واسع وارض الله بي رحبه=وخل النفوس الخبيثه في خباثتها