الشعر منطق عذب وملامس احساس=ولفت انتباه بفكرة اللي بناها
كلمه .. ولكن نوب تاتي من الماس=واحيان تخجل من سمعها وقراها
ويضرب بها .. واشد من رمح جساس=وتظهر بها طيب النفوس ونقاها
وترفع عزوم القوم لا دقت اجراس=وتطحن رحى حرب وفتن من صداها
حكمه..وتاريخٍ مدون .. ونبراس=ياما اختفى ليل الجهل من ضياها
ماله حدود ولا نهايه ولا قياس=سفينةٍ ربانها اللي قداها
وش حركت بك نخوة الراس يـ ادباس=غير البيوت اللي بعيداً مداها
والشعر لو انه مخلد وله ساس=قامت به انواع الحناجر تباهى
في سوق سوداء دون ميزه ومقياس=وهذاك سايمها وهذا شراها
لو لبسوه ابهى الجواهر والالباس=بدد تصناع المشاعر حلاها
حتى تنافسهم على بنك الافلاس=ما طور الكلمه ولا مستواها
لا باس يا عشاق الابداع لا باس=افضل تصير النادره في خباها