لاوالله ألا عاشر الهم يانوف = قلب ٍ عقب فرقاك ماهو بسالي
الهم والغربال والحزن والخوف = هذي حياتي يابعد كل غالي
عايش وكني ياهوى البال مكفوف = مبعد عن الدنيا بعالم خيالي
أسأل واجاوب كيف مرتني ظروف = وخلتني ابعد عنك ياكل مالي
لاوالذي حلاك يازين بوصوف = ماغبت لحظه عن هواجيس بالي
ملهوف لك والله وبالحيل ملهوف = لضحكك وهمسك والحكي والدلالي
يااحساسي بدنياي يالسمع يالشوف = يااغلى الحواس الخمس واغلى حلالي
بين الحنايا منزلك داخل الجوف = قصر ٍ كبير ٍ غايتا ً بالجمالي
عقبك خلا اصبح متاهات وكهوف = مابه حياتا ً موحشا ً بالليالي
ونحت فيه بيوت شعر ٍ على حروف = اسمك ياروح الروح حلو الخصالي
قصدي بها لاشفتها تحن وتروف = في حال من حاله بلياك خالي
النون:نار الشوق ياشوق وصدوف = وقتي تزيد بكل يوم اشتعالي
والواو:وينك غبت وان غبت معروف = ترجع وتسأل عن علومي وحالي
والفاء:في قلبي حشا منت مخلوف = وانت الوحيد اللي بحياتي صفالي
اقولها يانوف والحال منصوف = نصفا ً قضى والنصف الآخر بقالي
بعيش به والحزن بالحزن مردوف = في خافقي مال السعاده مجالي
شمس الامل ظني غشى صفوها كسوف = تشرق وانا عيني تحرى الزوالي
ليت الأمل يشرق على حال متلوف = حتى اشرب قهوتي من احلى دلالي
ساعة لفى همي وحزني لي ضيوف = في ليلة ٍ مدري بها وش جرالي
كتبت لي يانوف باحساس مقطوف = من قلبي الصادق بيوتا ً جزالي