ناض الضمير اللي من العام مكلوم=هاض وتفجر وانبعث من مخافه
درّج على عوجٍ هواهن بزيزوم=فتّت حياهن واسود الثوب عافه
سبة رجا اضحى طريدٍ بلا لوم=الحلم كايد لو يقولوا خرافه
الله يلوم اللي يلومه على الدوم=من عاش بالذله حياته كلافه
يمنى الشجيع ان وافقت حفنة رخوم=تمسي هوان وتشتكي ألف آفه
بعض السكوت يحطك بخانة البوم=لو كنت طيب ساسك من الغرافه
الصبر جنه لكن الفعل معلوم=يبقى رصيدٍ للذي غصب حافه
سر يا ضميري واكتب العهد مبروم=لا .. لا تجامل ..عفنٍ .. القلب .. شافه
لا عاد تكسر بالرفق شخص وتسوم=ماترفعك قولة مخاوي لتافه
انا نديمٍ للعلا حرٍ احوم=اشيم عن دنس النوايا وقرافه
مليت قول الحكي فضه ومذموم=واصبر واصابر واتغيشم واسافه
واقول ياليت الحكي صف مردوم=والا المحاجر مثل عنق الزرافه
وان المخابي تجمع اطياب ورموم=حتى الذهب .. صفوه .. يعاني شفافه
ناسي وغادي والفكر ومضه غيوم=بامر الولي لا جاك فاض بضفافه
منه ذكرت السلة اللي بها الكوم=تفاحها أخضر ولا من نظافه
تمسي خمج والدود يبني بها رجوم=عقب الغلا تقلع و يرجى ذلافه
هذي الحقيقه والعمر قدر قمقوم=زل التجارب وانتهى من جفافه
لا ..لا تجامل يا ضميري من اليوم=صفّ الذهب من عتمةٍ في خلافه
وناض الضمير اللي من العام مكلوم=هاض وتفجر وانبعث من مخافه
درّج على عوجٍ هواهن بزيزوم=فتّت حياهن واسود الثوب عافه
سبة رجا اضحى طريدٍ بلا لوم=الحلم كايد لو يقولوا خرافه

ليه ياقلبي تدور ولا تِقَرّْب=خايفٍ من طعنةٍ عقب الأمان؟
كان حظك بالخفايا ماتِجَرّْب=صفّ نية خافقك وإنخ الزمان

لبيه جيتك اجاري حرفك وآرك=ياللي من الناس تنشدني عن اخباري
جيتك بجيش القوافي في عقر دارك=متحيزم(ن) في جديد القاف واشعاري
شمّر عن ايديك جيتك رافض اعذارك=عادتك صنديد بين الناس مغواري
وابيك تشرح لزواري وزوارك=عن سر قلبك قبل لكشف لك اسراري
خابرك وافي ونبغى نسمع اشوارك=باللي هجرني وفارق زوله اسواري
اما انت تفّصح وتكتب كفك اقرارك=والا انت تطفي لهيبً يحرق ازهاري
مابيك ؟وقت الشدايد ياجمل بارك= ابيك تنهض تشيل الحمّل ياجاري

هات القلم سجل على المحضر لجارك=ابيات شعرٍ تجيب العيد ياجاري
ابعترف واستقر مدامني بدارك=ولاني بخايف وعمري في ذرى الباري
غروٍ صدفته .. سبقته : حلوه اسوارك=فيها المعالي تشابه عالي اسواري
لد وتبسم وقال الكار من كارك=واصنافنا نادره بالحيل يا كاري
قلت البقا في وفا افكاري وافكارك=والوضع مزري وعرفك صار اجباري
انا السكير ومتيم في هوى بارك=ياخمرةٍ فاخره سميتها باري
من بعدها ضيقة المغبون في جارك=لاعاش سكره ولا خمره ولا طاري
نفحة شقا قلتها اطفي بها نارك=وإقفل محاضرك ياخلي عن اخباري
ومن بعدها طرّف الهين من اسرارك=واياك والعيد .. تاتي به على داري

جيتك على وضح النقا طالب رضاك=اسوق يمنى الود وتشوح غيثك
مزنك عشيري عاقبت نفس تنخاك=عدت على ماقيل : ياشوق ليتك
ما عاد لك بالعشق روحٍ تمناك=الجوف خالي شمعته دون زيتك
روضي خضر يوم المحاني تذرّاك=يومك تقول البيت ياخل بيتك
واليوم بعد الغدر ماوالله ارجاك=قاضي وعدلك بالهجر وإرتضيتك
يحرم علي اقول نفسي تحراك=لو طال وقتك يالخطا ما جفيتك
وان قاله الله وجيت ياغير آطاك=واقول سمّ الظيم منّه سقيتك
ودي مثل كرهي على الكل يجزاك=كثر الذي تعطيه أنا عطيتك
وحده بوحده ودامها هيك مابغاك=ماني صحيب وخل عنّك : فديتك

يا محمد الرويان بكشف لك احساس=خافي وعين الحسد لا لا تشوفه
من زود خوفي يابيض القلب ينداس=حتى خليلي ما عطيته وصوفه
هيبة يباس الجوف لا قلت يا ناس=عيّت على عين المعنّى تحوفه
الود فايق والغلا فاس بالراس=والبوح مابيّن حقايق نشوفه
مترادفين الضد والكل بالكاس=والموت كان الصمت سبّب عزوفه
ويا سرّي المدفون لا باس لا باس=محمد الرويان اعرف ظروفه
احرص من الضبه على جمع حراس=والطيب وسمه والنصايح حروفه
يمه زعجت القاف مكتوب بانفاس=لانه حكيم وسر خله يروفه

:more55:

اهلاً هلا يالوايلي عذب الاحساس =يامقلّط الجزلات واجب ضيوفه
ايوالله احضر وافتخر وارفع الراس=مادام مثلك حاضر(ن) مانعوفه
انصاك لو دونك جموع(ن) وحراس=وماهمنا لوصار فيها كلوفه
ابشر بعزك لو بها يقطع الراس=وينشال من فوق المتن مع كتوفه
آقف معك مثل المهلهل لجساس=واللي يقّرب غير يلقى حتوفه
وان كانها بالبعّد مع عذب الانفاس=لعيون جائز غير بيته نحوفه
مدامها طيبه ونخوة ونوماس= نرضي اهلها لين تقضّب كفوفه
وان كانها بالغصّب لندق الاجراس=لضرب بصفي ما احتمي من صفوفه
لـ( أجيه ) تالي الليل يالذيب عساس =ومع الشروق تشوف عينك وصوفه
هذا جوابي يافتى الجود بقياس =عشرة بيوت أبدون نقص وحسوفه

اعترف لك مابقى بالعمر شي=حتى اني اضحك وألعب معاك
جيتلك واضح وفارد لك يدي=وارتجي من خالقي اكسب رضاك