يالعين صيري دايم الدوم تبكين = على مدار أربع وعشرين ساعه
أرثي لعمرٍ فات وانعيه يالعين = وابكي على ما فاتنا من ُطماعه
اليوم كمّلتي من العمر خمسين = تلعبّك اوهام الغرور ومتاعه
يا ما خدعنا الوقت بالمظهر الزين = واليوم يا عيني عرفنا خداعه
ما ندري إن الوقت لُه باطنٍ شين = الاّ بعد ما قام يسقط قناعه
وإن ما انتهزنا تالي العمر فالدين = والاّ خسرنا ما لنا من بضاعه
باقي العمر في علم رب الثقلين = تماكني تاليه قبل انقشاعه
مع هجعة اوباش الملا لا تهجعين = احيي الدجا ذكر وتوسل وطاعه
اليا بقا ثلثٍ ومضى منه ثلثين = وقتٍ يربّح باذرين الزراعه
لا ناموا اللي فالملذات لاهين = تضرعي لله باكف الضراعه
ويا الاذن في قول الخنا لا توحّين = والذكر والنصح انصتي لاستماعه
اليا استمعتي للذكر والصحيحين = يصير عندك ضد غيره مناعه
ويا الرجل لوحيتي الندا لا توانين = اليا دعا داعي صلاة الجماعه
ويا النفس مع درب الهوى لاتميلين = بيعيه مثل اللي زهد به وباعه
الخمسة الاركان لازم تلبين = بتوحيد واخلاص ويقين وقناعه
عسى بتالِ العمر ثقل الموازين = كود يتعوّض ما مضى من ضياعه
سالين كنا دايم الدوم حيين = ولا دامت الدنيا لراع الشفاعه
والأنبيا والأوليا والسلاطين = واهل المروة والكرم والشجاعه
العبد مهما عمّر أحقاب وسنين = له ساعةٍ فيها يطوّى شراعه
يرحل وخلانه وربعه مقيمين = وتصير فرقا الشمل بعد اجتماعه
وصلوا على المبعوث جد الحسنين = ما نبت من نبتٍ وما ازهر طلاعه

المشاركة الأصلية كتبت بواسطة فهد الشافي (المشاركة 183280) احسنت ثم احسنت بنقلك لهذه القصيدة الجزلة للشاعر غازي بن عون وفقك الله تحياتي

المشاركة الأصلية كتبت بواسطة ابوهيثم النومسي (المشاركة 183312) لا هنت ويعطيك وصح لسانك ولسان قايلها

المشاركة الأصلية كتبت بواسطة صقر الصقور (المشاركة 183344) ســـلمــت يميـــنك عـــلى هــاالنـــقــــل وصـــح لســـان شـــاعــــرهـــا...

المشاركة الأصلية كتبت بواسطة مزيد المزيد (المشاركة 183346) سلمت يمينك وجزاك الله كل خير على النقل المميز وصح لسان شاعرها دمت بكل خير

المشاركة الأصلية كتبت بواسطة هيـاا العـازمـي (المشاركة 183367) . . عليه أفضل الصلاة والسلام . . الفاضل .. مسفر الدوسري طبتَ وطاب حضورك مساء معطر يليق بحضورك وسمو ذائقتك مساءات الروحانية والطهر والتقوى قصيدة إيمانية راااائعة وإنتقاء جميل جدا ً صح الله لسان قايلها غازي بن عون ولاهان والشكر موصول لكَ على مشاركتنا وإتحافنا بها في إنتظار جديدك تقديري هيــــااااا

المشاركة الأصلية كتبت بواسطة السيف القادم (المشاركة 183387) الاستاذ مسفر الدوسري شكرا لك على نقل هذه القصيده الجميله الملئيه بالحكم والكثيره قصيده جزله من شاعر جزل صح لسان الشاعر وسلمت يمينك على كتابتها لنا في متصفح شبكة ويلان العربيه دمت بود

المشاركة الأصلية كتبت بواسطة سعوط المجانين (المشاركة 183402) لاهنت على النقل الموفق يالدوسري وبيض الله وجهك وصح لسان الشاعر غازي بن عون ...