لايغرّك حجب دمعي عن ظهـوره = لاتقول أنّي سليتـك .. ماسليتـك
دايم أستر دمع عيني ستر عـوره = والاّ أنا يامـا تضايقـت ..وبكيتـك
أوّله يوم الغـلا فأربـع شهـوره = وآخره في يوم جيـت ولا لقيتـك
أعتبر مسياري لجارك.. ضـروره = لجل أوقّف موتـري قـدام بيتـك
وأنتظر لي ربع ساعة.. عند سوره = ماخبرت أنك دخلته.. ماأحتريتـك
وأنت تأخذني على عميا مشـوره = مسرفٍ بي لارحم حيّـك وميتـك
تحسب أنّي ناسـيٍ حبـك ودوره = لو نسيت أبوي وأمّـي مانسيتـك
الله اللي حطّ لك في العين صوره = والله أن يمحـا نظرهـا مامحيتـك
تلمحـك روضٍ يقلدنـي زهـوره = ناعـمٍ لـو أنّـك بتوكـل ..كليتـك
موج حبك في الحشا صفقه وفوره = والظنون تسـد نفسـي لأشتهيتـك
وش تعللها علي مـن الخطـوره = يامعللهـا علـى ليتـك وليـتـك
واحدٍ من طاري أسمك طق زوره = وش يقول أن سمع لبيـك وفديتـك
عذره بمخباه لـو يفقـد شعـوره= وأنت عذرك لارماك الله ..رميتـك
لاتهز الغصـن وتطيّـر طيـوره= أتق الله وأحترم مجـدك وصيتـك
وأن حداك مساير النفس الغيـوره = مرحبـا مـن واحـدك لكمبليتـك
أرمني فالنار من عميـا مشـوره = وأسرف أسرف لارحم حيّك وميتك