ياناشدٍ عن مامعي من طرايف=ماعاد به عندي علومٍ طريفه
أبحث عن أهل الطيب بيض الصحايف=أهل الوفا وأهل النفوس العفيفه
روس الرجال إموردت كل خايف=ألي تبيِّن بالضروف الكليفه
يعني مثل زبن الضعيف أبو رايف=الشيخ إبن رشدان يحى خليفه
اللي توفر فيه كل الوصايف=اللي نبي راع العلوم النظيفه
اللي ليا جيته علومه لطايف= مثل العسل لهل النفوس اللطيفه
أمّا الكلايف مايحسب الكلايف=الضيف والزاير ربيعه وريفه
يحى عقيد مبعدين النكايف=حرٍ معرّب مايصيد الضعيفه
وأبوه متعب موميات السفايف=كم عد قومٍ حثّهن من غريفه
حتى غدن عقب المرادا سنايف=وأوبارهن صارن تقل لون ليفه
نايف وعلمه مع هل الطيب نايف=وجهه ذري ياهل الوجيه القضيفه
ماشيخته شيخة ختوم ووظايف=شيخة وراثه ماخذاها وظايف
تشهد له العالم بكل الطوايف=لو له عريف المجد قلنا عريفه
مايستطيع يقلّده كل زايف =مهما بلغ مكره ومازاد زيفه
أصل الحسد شيمة طيور الجوايف=ماهوب طبعٍ للرجال الشريفه
تشوم عنه أهل النفوس العفايف=وللا الهديفه طول عمره هديفه
مالي على هذا ومثله حسايف=خلّه يوللي يانقي الصحيفه
الله يوللي بالعفون الهدايف=ويجمّل الطّيّب على كيف كيفه
ربّ العباد اللي للسرار شايف= هو منتهى دعواي يابن خليفه

يالله يامسقي الكبود اللهايف = بسحبٍ من الغربي تبارا صفيفه
غرّ المزون المرزمات الردايف=اللي من المنشى تتابع رفيفه
وأنبت نبات العشب مثل القطايف=وعقب اليباس الأرض صارت مريفه
عطفك ولطفك يوم يبس الشفايف=جفّت شفيفه ثم بلّت شفيفه
الله عليمٍ ويش تخف النحايف=عليم يعلم بالأمور المخيفه
أمّا أنت ياماضي علومك طرايف=والنّاس ترغب كل حاجه طريفه
مدحتني ياشوق جال الرهايف=بنت النشاما والثنايا رهيفه
إختارتك من بين كلّ العرايف=عندل من الخفرات ماهي خفيفه
من لابةٍ يوم الملاقى زهايف=ضدّ العنيد إن كان نفسه زهيفه
نوامسه من فوق عوصا عسايف=يتلون ذيب الخيل مرذي عسيفه
يافزعت المضيوم من ضيم حايف=فزعاتكم بالعون وقفت نزيفه
كم من زعيمٍ راح مقفي وعايف =عاف المكاسب وإنجبر النكيفه
وش أنت سامع قلنا ويش شايف=وفاك يبصر بالعيون الكفيفه
لنّك تجيد العلم وبالطيب كايف=عنك الردى بعد اليمن عن حنيفه
والسّب ماردّّى شهير المضايف=والمدح ماطيّب رديٍ وشيفه
وبعض الدعاوي يابوفيصل خفايف=سيلً ظهر ببروق ورعود صيفه
مايهمني هرجٍ سخيفٍ مسايف=من واحدٍ راحت حياته كسيفه
وأهل الردى والطيب ماهم ولايف=وكلٍ على طبعه يميّز وليفه
تباً لكم ياهل النفوس الضعايف=تبّاً وتبّاً يالعقول الهفيفه
قلته وربعي للمعادي كسايف=مثل الجبال الشامخات المنيفه
هذا الوكاد بدون زيف ولفايف=وحنّا بحكم من طوع النّاس سيفه

المشاركة الأصلية كتبت بواسطة خلف الغريب (المشاركة 202620) صوت وصدى رائعين.. الف نعم بكم كلكم وانتم وافين من وافين... صح لسانك اخوي ماضي وصح لسان ابن رشدان.... تقبل مروري...

المشاركة الأصلية كتبت بواسطة طلال الايداء (المشاركة 202645) صح لسانكــ اخوي ماضي وصح لساان اخوي يحى على هالنصين الجميلين ولاهنتوا على هالجزاله وفي انتظاار جديدكــــــــــــــــــــــــــم تقبلو تحياات اخوكــــــــــم طلال الايداااااااااااء

المشاركة الأصلية كتبت بواسطة الجوكر (المشاركة 202656) مســـاجله رائعه صح لسانك ولسان ابن رشدان ونعم فيكم جميعاً تقديري

المشاركة الأصلية كتبت بواسطة محمد المقبل (المشاركة 202686) الاخ الشاعر الكبير ماضي الصبر ونعم بك وبيحيا بن خليفه الرشدان وصحت السنتكم جميعاًكلكم ابدعتوا لك جل التقدير والاحترام