يامرحبا والذيب في وسط القليب = مير انتبه في كلمتك واعرابها
ان جيت او اقفيت تعرف من انا = ومسيله كذاب ومحمد نبي
ماجلس سوى براس الجبل والذيب ذيب = مانعرف سهول الديّر واشعابها
لو كنت عارف مقصدك من يمنا = ومسيلمه كذاب ومحمد نبي

دام البقا بك وانت فنان ورهيب =مار المشاكل لا تجيب اسبابها
ترى العنا يقلقاه من يبغى العنا= ومسيلمه كذاب ومحمد نبي
ياذيب دارك ممحله راحت ذهيب= واللي مسك ربابته غنابها
صارت علوم اصحابنا دن دن دنا=ومسيملة كذاب ومحمد نبي

ابنشدك عساك ياكاتب لبيب = ويش الهنوف اللي تدق خضابها
من دونها المصقول مع ضرب القنا = ومسيلمه كذاب ومحمد نبي
اعلومنا فنجال مع طاسة حليب = عند الرجال اللي تشرع بابها
والدندنه ماهي يابن عمي لنا = ومسيلمه كذاب ومحمد نبي

اخطيتها ولاظنتي فيها تصيب = منته بيم ابيوتها واطنابها
ماتفرّق السرقه على حكم الزنا = ومسيلمه كذاب ومحمد نبي
اصبحت في في ذيك الديّر حال الغريب = واثر السبب كفك معا مشعابها
واللي هدم ماهو سواة اللي بنا = ومسيلمه كذاب ومحمد نبي

مااخطي واميزللبعيدوللقريب= والمشكلة بالسالفة من جابها
وده يمشيها يحسبه غرنا= ومسيلمة كذاب ومحمد نبي
الحمد لله مابنا شك وريب= من عقبنا الديرة طمع طلابها
فعل المغفل مايفور دمنا= ومسيملة كذاب ومحمد نبي

وشلون ضقتم في فضا الكون الرحيب = وانتم طيور ٍ تحتمي مخلابها
من ذاق طعم المر يحلم بالهنا = ومسيلمه كذاب ومحمد نبي
محد طمع بك لاتحسب انك كليب = بعض السوالف ماحسبنا حسابها
كثرت وساويسك وضيعك الطنا = ومسيلمه كذاب ومحمد نبي