يا الشوق وان ماغفى ليلي على كمـه=يصبر على ملح دمعي ظامي وسـادي
وانت انتظارك غياب الروح من يمـه=وعودة حياتي ليـا نـورت ميعـادي
زرعت امان الضيا في وحشة الظلمـه=لحظة حضورك وكانت طلـة اعيـادي
بعيد عن الصخـب والنـاس واللمـه=فرشت لك في ضفاف القلب سجـادي
كل احاسيسي حضور.. وفيك مهتمـه=من حد حس الجنون لحسـي العـادي
يحكي هدوءك تـذوب الكلمـه بفمـه=كن السوالف تناغـم طبعـك الهـادي
يوقف معـاك الكـلام العـذب واتمـه=وينساق سرب الحروف بسحرك ينادي
الورد يفتـن بعطـرك كـل ماتشمـه=ويحسد عليك النسيم الفـل والكـادي
غابت نجوم السمـا والصبـح مالمـه=ليـل تفتـق غـرام بجنـة اسيـادي
قبل يحين المـوادع شايـل(ن) همـه=( ودعت لحظة وداعك طلة اعيادي )

اشتاق اسولف للورق واهجر النـاس=وارسم صور.. والوانهـا تحتوينـي
كذا تعلمت الشعـر فكـر واحسـاس=وصارت مساري نجمتـه تهتوينـي
ليا مال جفن الشمس لغروبها نعـاس=يشعل شموعه للسهر وسـط عينـي
وتوقف خيالاته بمحـراب الانفـاس=وانـا بخيالـي راهــبٍ مبتليـنـي
عاشق .. ونبضه قافية شعر واجراس=وليا تجلـى يشعـل الشـوق فينـي
والملهمة غصـن تمايـل لنسنـاس=يرمي شذا عطـره علـى راحتينـي
لو ظلها مـر ومـع العالـم امـواس=مدري .. اخـاف الله يبـدل يقينـي
هي سالفة عشق وحكايات واونـاس=وهي الضيـاع وكـل شـي يهدينـي
هي المسافة بيـن الاحـلام واليـاس=هي هاجسٍٍ حتى بخشوعـي يجينـي
فيها نظمت الشعر في صادق احساس=وصارت مساري نجمتـه تهتوينـي

أمسك يديني وانا اطلع من جنوني للصـواب=خلني أول ( عنيد أحساس ) عنـدك يسجنـه
بس ناظرني وشفني كيف اغيب بـلا غيـاب=أرحل من العالـم لعالـم ضياعـي واسكنـه
الله اكبر لا همست اشفيك مع ضحكة عتـاب=كيف اشوف الجنه بدنيـاي صـارت ممكنـه
مد لي كاس العقوبه وأشرب بكـاس الثـواب=كل موطن للغـلا بيـن الضلـوع استوطنـه
تدري لولا العشق ما حن لظما الصحرا سحاب=وانا بأحساس الصحاري وانت غيمك حننـه
من سهيلك للجدي وانا أحسب نجومك حساب=من شروق النجم لين الشمس صبحك تحضنه
خلني أظما واشـوف بسكتـي للمـا سـراب=حتى لو جيت ارتويك أشربك بعروقـي سنـه
كل ما وقفـت حـرف بآخـر شفاهـك وذاب=بين عقلي والجنـون شـوي تكفـى جننـه
أترك ايديني وانا ارجع للجنون من الصـواب=خلني أول سجين أحساس عشقـك يسجنـه

لوكـان مالـي بالحيـاه اختـيـارات=الا خيـار المـوت . يصعـب عليـه
اليا اعتمت شبيـت بالصـدر الآهـات=وضميت وجهـي فـي خناجـر يديـه
ياما تمنـى حلـم عمـري ولا مـات=وياما ا شرقت شمسي على غياب ضيه
وياما انكتبت بصفحة الشعـر عبـرات=ويامـا قرتنـي كـل عيـن بشهيـه
كل السكـك فيهـا المآسـي محطـات=وانا قطعـت الوقـت روحـه وجيـه
لو الحكي يرمى علـى دكـة سكـات=تبقـى طباشيـر الشعـر فـي يديـه
يامن غدا تابوت واحساسـه امـوات=اقلط على ضلوعي ترى النـار حيـه
خلني اعيش الموت ولا العمـر فـات=ان كـان باقـي فـي حنانـك بقيـه
تعـبـت ادور للـسـؤال الإجـابـات=ليه انحسب بحساب غيـري هديـه ؟؟
( ما عاد باقي بـا الحيـاه اختيـارات=ما دام حتى المـوت يصعـب عليـه )

ينشق صدرالعشق عن نبع الابداع=بين الضلوع وقلبي اللي نزفها
مجنونه بدمي على لسان ملتاع=قصيدتي واللي عسفني عزفها
أسرج لها بري وبحري لها شراع=تختال بعيون الخيال وقطفها
حتى تجي بإقناع ما يشبه إقناع=لعيون ذوق اللي حياتي خطفها
يذوب ليل الشمع والشمع ما ماع=بين القلوب اللي تعانق ولفها
نادمتها شعري شجن. حد الإمتاع=وانا غمامة عشقها ملتحفها
أصباع ضاعت بين لهفات الأصباع=واصباع لهفتها تبدد وجفها
وسلهام عين ورمش للود منصاع=ولحظات كنت اهنابها ما اعرفها
حتى جدايل شمسنا ضمت القاع=ولفت جدايل ليلها من طرفها
مجنونه وغنت على لسان ملتاع=قصيدتي واللي عسفني عزفها

(نار السهر)

الياغفت نار السهر للتعاليل. =وتلحفت روح المولع دفاها
فلي معي سجادة البوح والليل=لقلوبنا وعشق يعيش بذراها
وتقهوي من دلال شعري فناجيل= وهزي عذوقه و يتساقط حلاها
ابي اشعل حروف الغلا لك قناديل=تمطر على ذوقك سحابة ضياها
الشعر بغيابك صدى لآهة الويل=من لهفة خايف تموت بظماها
ما هي كلام استهلكته الأقاويل= ولا هي عبارات واردد صداها
مشتاق يا همس الشفاه المثاميل=لرشة عطر عذب الحروف وشذاها
مع كل داعي للعدل هاتي الميل=وهاتي قبل طعنة رماحك دواها
خليني احلم والليالي المقابيل=الله عليم بما يكنه خفاها

ما استمطر غيوم الشعر شعري غيوم=وخيمة سماي احساس شعري سكنها
فارس خيالي مهرته عزمها عـزوم=على سعـة كونـه يطـوح رسنهـا
لو جرة الوقت وسمت شعري همـوم=ما اخلف طواريقي ولا احيـد عنهـا
لا صرت في جو على الشعر ملـزوم=دفعت مـن وقـت القصيـده ثمنهـا
ما ينثي عن سكـة الـود محـروم=لو لبسـوا بيـض النوايـا كفنهـا
يا حبك اللي كـل مـا غـرد النـوم=على جفونـي طيـر النـوم منهـا
تحت الضلوع اللي غدا نحفها هـدوم=خلوة غلاك وروحـي اللـي فتنهـا
مهما تنايف للسمـا واهـج نجـوم=راحـت تسابـق للغيـاب وسجنهـا
و انتي سنـا نجمـه ووهاجهـا دوم=يكتب فرح روحي ويرسـم شجنهـا
كل ما قطعتي با الغلا حاجـز اللـوم=احمرت ورود الخجـل فـي وجنهـا
وهبت مساءات الهوى عج يشمـوم=ليـن العيـون اهدابهـا تحتضنهـا
واصبح على عقد من الشعر منظـوم=يسرق عصافيـر المـوادع لحنهـا

أهديها الى شاعرنا العذب رابح الغضيان ..

الكون زحمه و اعقل الناس مجنـون=واكبر مساحات العقل تمتلي شات
كنا عرب واللي نـزل دونـا دون=واليوم صار الحي كلـه عمـارات
والمجد للـي بالملاسـن يفوقـون=والماضي الحاضر و ما فاتهم مـات
طفل الشعر بيدين الايـام غليـون=يلقط ضلوعه من عنا الوقت جمرات
يا شاعري لو ضاق بانفاسك الكون=غن بفضاك وخلهـم للفضـاءات
لوتنثر حروفك عبث صارت لحون=لو تنظم انفاسك شعر صارت ابيات
تكتب فرح فيك الحزانـا يغنـون=تكتب حزن تشب نـار المعانـات
دامك شعر لا تجلس بكرسي الهون=لا تمتطي للمجد صهوة علاقـات
دام انت ثابت قل لهم وش تمنـون=ماني بحاجه ادفـع لعرفـي اثبـات
رابح وغيري بالمواجـه يخسـرون=ليا اعتزيت بعزوة ترفـع الـذات
خل الفقر يشره على صيت قارون=وحلم الثرى يوصل صفوف المجرات

علي السابل

أنفاس الغمام

واقف على قاع الظما والري بكفوف الغمام=طالت مسافات الجفا ما بين حظي والقدر
حبيبتي والليل نبض و صمت وانفاس و كلام=والعشق حلم يعلق بدربي مجرات وبدر
ينام مجنون السهر والمستحيل اني انام=والهم صاحي يرسم الضيقه على وسع الصدر
اهيم لين المرتوي يظما على طبع الهيام=ويغني الراعي على نايه تحت طلح وسدر
لو اتسلق رغبتي ويطير من غصني حمام=ابقى الشجاع اللي هزمت الخوف وسلاح الغدر
ان ما جمعت الضحكه بيوم المواجه والزحام=حرمت اصير اللى نثردمعه من سنين الكدر
واللي هدر دمع الحبيب بطعنة عتاب وملام=يحلم يكسر فرحتي ويضيع احلامي هدر
ما عاش في قاع الظما من يشرب انفاس الغمام=لكن انا لي سالفه ما بين حظي والقدر

وسلامتكم

علي السابل