السلام عليكم ورحمة الله وبركاته
ولاول مره في شبكة ويلان
اضع امامكم هذه المتواضعه لعلها تنال اعجابكم

سراني الهاجوس والناس نيام = امشي على الذكرى وروحي عليله
وتركت هالعالم ومابه من خصام = ومن الفيافي الجرد عندي بديله
ورحت لمكان(ن)دايم اجيه منضام = لاجتني الضيقه لزوم(ن) اجيله
وشبيت به ناري وانا همومي ركام = وحكرت فنجالي بتزويد هيله
وقمت اتذكر ماجرالي قبل عام = بنفس المكان اذكر سوالف طويله
اذكر جلسنا فيه وايامنا ايام = جلسة محبه بين خل وخليله
كان الحكي مابيننا همس وانغام = سوالف(ن) مااظن بالقى مثيله
ماحولنا حاسد ولافيه نمام = ماغير انا وابو الرموش الضليله
يرسم على رمل الثرى قلوب واسهام = واذكر رسم حرفي وسهم(ن) يجيله
اليا تبسم زود هيامي هيام = واذوب لاسلهم بعين(ن) كحيله
كانت اماني وكل منا له مرام = والله جمعنا جلسة(ن) وتعليله
وباقي السوالف لو ذكرته ابنلام = عاهدت خلي وسط قلبي اشيله
واليوم جالس مع خياله والاوهام = كن الغضي جنبي اشوفه اخيله
لامن ذكرته خافقي بالصدر زام = لولاضلوعي كان مافيه حيله
اتلى العهد بالزين وادعني وقام = ودموع عينه فوق خده هميله
مسحت دمعه وقلت لظروفنا احكام = وترا الصبر يازين افضل وسيله
سافر وخلا ذكرياته كالافلام = اعيدها لااشتقت في كل ليله
اتذكره ويزيد جرحي والآلآم = من غيبته ياويل حالي ياويله
اشكي معاناتي وحزني للاقلام = وترسم همومي بالورق تشتكيله
يارب تلهمني الصبر انت علام = وترد من روحه لروحي عديله

المشاركة الأصلية كتبت بواسطة خلف الغريب (المشاركة 299933) صح لسانك اخوي احمد وحضور جميل ونتطلع معك الى الجديد الافضل ان شاء الله ,, تحياتي لك..

المشاركة الأصلية كتبت بواسطة بدرفهد الجعفري (المشاركة 299954) احمد الضوي صح لسانك ابيات فيها من الجمال الكثير صح لسانك

المشاركة الأصلية كتبت بواسطة طلال معيض (المشاركة 299988) احمد الضوي صح لسانك ولاهنت جزل

المشاركة الأصلية كتبت بواسطة البدر (المشاركة 300014) احمد الضوي مشكور على هذه المصافحه والله يعطيك العافيه صح لسانك

المشاركة الأصلية كتبت بواسطة حمد الخمعلي (المشاركة 300024) الاخ القدير احمد الضوي صح لسانك وياهلا فيك0 نتطلع لابداعاتك الشعريه0 كُن بخير

المشاركة الأصلية كتبت بواسطة جائز المليحان (المشاركة 300036) الشاعر الكريم الاخلاق وصاحب الحضور المميز صح لسانك اخي عرفتك متواجدا في المختارات وسعدت برؤيتك هنا فكن بالقرب دوماً تقبل مرور اخيك من هنا