ياصاحبي مجبور اعاتبك لاباس=كله من اسباب الغلا يوم اعاتبك
لو للحكم في صحة الراي مقياس=كان اقتنعت برايك وراي صاحبك
أكبر عيوبك دايمآ يابس الراس=ماتستريح الا على اللي يناسبك
ترا الحياه اكبر من مجرد أحساس=تضيع في غبة بحرها مواهبك
مافيه شك دروس الايام نبراس=الشك في.... هل تحتويها تجاربك؟؟
تعيش في دوامة العمر عساس=تلميذ واحداث الليالي تدربك
ومن مبتدا عمرك إلى نزع الأنفاس=تلقى حصيلك مايضاهي متاعبك
علم الحياه ادراكه اصعب من الياس=واوسع رحابه من وسايع مذاهبك
ولو كان تقدر تحصره بين الاقواس=ماعكرت سود الليالي مشاربك
والناس قالوا: قبلي ..وقبلك أجناس=ولاحدن على رايه من الناس غاصبك
لاتحسب اللي يعجبك يعجب الناس=ولاتحسب اللي يعجب الناس يعجبك
بعطيك لدروب الأمل..درة ألماس=قبل الصبر ينفذ..وتقرب حضايبك
اليا اعتنيت بحفظها فزت بالكاس=وأبشر بعز(ن )مايقصر شواربك
معرفة في غير دين الله افلاس=تلقى جزاها عند من لايخيبك