يا ابن فطيس إن كان بك ضيقة عصير = يا ضيقتي ياهي تهد الجبالي
إن جيت أزحزحها بكثر المسايير = كني أناديها تعالي . . تعالي
الضيقة اللي بالحشا وقعها غير = ضيقة وناتجها دواعي هبالي
مرة تجي كتمة ومرة معاصير = ملازمتني كنها من ظلالي
يالله تعدي هالليالي على خير = يا ثقلها من بد كل الليالي
همومها عندي ..ورود ومصادير = يروح هم ..وينولد هم تالي
يا ليتها قصة وضمن الأساطير = ما كان تلقاني وحيد لحالي
وياليت لي جنحان .. أو أقدر أطير = وأشوف حال اللي تبي شوف حالي
كانت جريئة حيل من دون تبرير = وكانت تقاطع قبل لا أطرح سؤالي
حذرتها ولا فكرت بالمحاذير = كانت تذوق المر لرضاي حالي
هفوة وغلطة ما لها أي تفسير= وكانت نتايجها تفوق احتمالي
غلطة وراحت ما تفيد المعاذير = وأستاهل اللي في حياتي جرالي
يا الله ياوالي صروف المقادير = يا واليٍ ما بعد رحمتك والي
إنك تطمني بزف التباشير= وترد غالي فاقدٍ روح غالي

المشاركة الأصلية كتبت بواسطة تركي صالح (المشاركة 176996) المبدع الرائع / نفاع العنزي رائع دومً والاروع ما قدمته عبر هذه الفاتنه وهذا ما عودتنا عليه في كل مره تقدم فيها جديدك لله درك ايها المبدع وصح لسانك وسلم بنانك ودمت بكل خير وعافيه تثبت