مع غيبة خيـوط الظـلام و طلعـة خيـوط الفجـر=كـان الوعـد بالسـدره اللـي مـا بعـد مريتهـا
أقبلت ادرج خطوتي و امشـي تحـت نـور القمـر=و اردد ابـيـات" لميـعـاد الـغــلا سويـتـهـا
أردد ابياتـي بصـدري وانـا اتـوخـى الـحـذر=أخـاف مـن زلــه توهقـنـي لـيـا زليتـهـا
و مابين انا ماشي بدربـي مـن ممـر إلـى ممـر=و وصلت جذع السدره اللـي مـن غلاهـا جيتهـا
إلا و صوت اقـدام مضنونـي مـع اوراق الشجـر=كنـه يحيـي جيـتـه يـمـي و انــا حييتـهـا
من خف خطواته مـا تتـرك بعـد ممشاهـا أثـر=و إلا هنـا يـا ثقـل منزلهـا و مكـبـر بيتـهـا
في حينها شفت السمـا بـه بـدر و قبالـي بـدر=لحظـه عسانـي مـا اعدمهـا كـل مـا اتمنيتهـا
و أبياتي اللي كنت ارددهـا بصـدري مـن عصـر=ضاعـت!! و مـا كنـي لميعـاد الغـلا عديتـهـا
ورجعت اصوغ ابيات شعري له شطر . شطر . شطر=و مـن زود فرحـة خاطـري فـي جيتـه غنيتهـا
غنيتها و أنـا بوجهـي حـزن و بصـدري قهـر=مـن حـزة يضيـق بالـي كـل مـا استنيتـهـا
حزة وداعه لانتهى الموعـد و جـا وقـت السفـر=و ناظـر لساعـة يـده لامنـه وصـل توقيتـهـا
بس المهـم رحبـت باسمـه بالجـوارح و الشعـر=ترحيبـة يـروق بـالـي كــل مــا اطريتـهـا
يـا مرحبـا ترحيبـة" تشبـه لـزخـات المـطـر=لا بلـلـت معطفـتـك الملفـوفـه و ضميتـهـا
لبيه يا نورك ليـا اضفـى عالمـي شبـر . شبـر=لبيـه لا مــن دلـنـي حـروتـك لا ضليتـهـا
لبيـه يـا سكـة ضلالـي يـا هـداي المنتـظـر=اللـي لعينـه نـاس كارههـا و نـاس اغليتـهـا
يـا فاتنـي يـا ورثـة بيـوت المعـزه و الفخـر=يالـلـي أحاسيـسـك تلبيـنـي لـيـا ناديتـهـا
يا اسمى الخصايل و الصفات اللي تضمنهـا بشـر=يا معجزه لو جيت اوصـف حسنهـا مـا اوفيتهـا
تدري اشلون بـدون كثـرة فلسفـه و بالمختصـر=قلبك مدينـة حـب طابـت لـي و انـا احتليتهـا
لو الثمـن عمـري لشوفـك قلـت يفـداك العمـر=روحـي لشوفـك لا قـسـم بالله مــا عزيتـهـا
ما جيت لك و انـا أبـي "اصطـاد بالمـاء العكـر"=جيتك و أنا عروقي بـدم أهـل الشمـال أسقيتهـا
ما جيت أبـا استغـل طيبـك بالدهـاء و بالمكـر=جيتك على نهـج الرجـال اللـي يشـرف صيتهـا
جيتك و انا ابا اضفي على منكبـك جلبـاب الستـر=هـذي نوايـاي الشريفـه عنـك مــا خبيتـهـا
جيتك و انا مليـان راسـي بالطنـا منـذ الصغـر=يـوم انـي اجهـل قيمـة الغلطـه إذا أخطيتـهـا
قـدام لايطلـع لشعـري فيـك صيـت و لاذكــر=يـوم انـي ادرك شوفتـي لـك كـل مـا بغيتهـا
و الحين لامن جيت اشوفـك مـت و آنـا منتظـر=ياليتهـا ترجـع بنـا أيــام الـزمـن ياليتـهـا
يا صاحبي جت حزة فراقـك و جـا وقـت السفـر=و اللحظه اللـي خفـت منهـا وصلـت لتوقيتهـا
لكـن قبـل لا تـروح ودي التمـس منـك العـذر=عـن كـل زلـه منـي بحقـك و انــا زليتـهـا
يمكن بعد ميقـاف هالسـدره مـا يجمعنـا القـدر=ولا يبـقـى الا اشـرطـة ماضـيـك لا فليتـهـا
و اقفيت و آنا اقول يـا قلـب الوفـا كـل الشكـر=لانـك تداركـت الـعـروق الميـتـه و احييتـهـا