°~*¤®§(§ شبـــكة ويــلان العـربـيـه §)§®¤*~ˆ° - يقولون وكر الحر مايعتليه البوم

- منتدى المختارات الشعريه (http://www.weelan.com/vb/forumdisplay.php?f=10)

- - يقولون وكر الحر مايعتليه البوم (http://www.weelan.com/vb/showthread.php?t=20332)

يقولون وكر الحر مايعتليه البوم

يقولون ماللعبد بد عن المقسوم=وانا اقول صح ويقنع العبدمقسومه

عسى الله يعين اللي توافد عليه هموم=همومن تخلي طبلة الراس منجومه

ترى والله انه مايكدر عليك النوم=سوى كلمة من بعض الاصحاب مسمومه

اذاجت من الغالين ولا الرخوم رخوم=ولا امحق من الغالي اليا شانت علومه

ضعاف الروابع تبتلش والقروم تشوم=ولاهيب لا شامت من الشين مليومه

ولا الزين من القاع الخلا والوجيه سلوم=ولا رفقتٍ مع طول الايام ملغومه

ولا الذ من عشرة شريفن من اقصى القوم=يبادلك فعل الطيب معناه وسلومه

واذاشفت في جو الصداقه غبش وغيوم=عطيت الدروب اللي مع الارض مرسومه

ولامثل عز النفس لو مامعك مطعوم=وعن اهل الشماته خل الاسرار مكتومه

معي لوسمحت شوي عقب عداك اللوم=ابعطيك عن بعض الرياجيل معلومه

ترى اللاش لو وقف معك في حياته يوم=تشوف الردى متبين فيه من يومه

وانا اقول لوان في وجيه الرخوم وسوم=عرفنا نميز قيمة النذل بوسومه

على شان نجلس مع رجال الوفا ونقوم=ونبعد من اللي عند الاجواد مذمومه

وانا اسمع مع اهل التجربه في الحياة علوم=بعضها صحيح وبعض الاخبار موهومه

يقولون وكر الحر مايعتليه البوم=وانا شوف عيني وكر حر تحت بومه