أقدم محاورة شعرية جرت حينما اجتمعو في مكة المكرمة عام 1927 ميلادي لاداء فريضة الحج، لشعراء عمالقه :
صقر بن مسلم النصافي الرشيدي - سليمان بن شريم من بني زيد - عبدالله اللويحان العنقري التميمي .
اللويحان:

الاياجالب الأرزاق ماغيرك حدن جلاب
جميع الناس راضين بنفعاته وتدبيره
سلام الله الحضار قبل ربوعنا الغياب
عدد ماهل وبل وأخضـرت نواويـره

صقر:

الا يامرحبا ترحيبت الحبٌان للاحبـاب
الى طالت بهم غربه وطبوا داخل الديره
الايالله تعين اللي ذلوله تطلب المشعاب
ولاهو من ردا فيها ولكن طالت السيره

ابن شريم:

هلا باللي لفوا واستانسوا في ديرة الأجناب
جمعهم والي الأقدار في حكمـه وتدبيـره
الايارب عبد مخضر قلبه وراسـه شـاب
يشوف من الليالي مايضيمه يالله الخيـره

اللويحان:

تراني فرح دان ركابكم ياصقـر بالمعـزاب
ولكن البـلا مـن قولـت مـدت مظاهيـره
هبوب الريح هبي وأطلبي لي صاحبي مطلاب
وردي لي سلامه واخبريني ويـش تعبيـره

صقر:

تكلفنا بدرب طال مشيه والدروب أتقـان
أبي جمع الخشب لاشك ناصلتٍ مساميره
تحملنا بحمل صار في ظهر الجمل شذاب
وأشوف الوقت ضايمنا بتطويله وتقصيره

أبن شريم:

أنا حولت من رقي النجوم وخاطري ماطاب
ماغير الدمع متعبني الى كفـت معابيـره
الاياطير بلغ لي سلامي ماحـواه أكتـاب
تراني ذاهب من كثر عيضاتـه وتدويـره

اللويحان:

الا يالله يالمطلوب لاتتكل على الأسبـاب
الا ياعاقل يوسف على يعقوب من بيـره
أدوا جرحي اللي سبته من ضاحك الانياب
أنا واحد وهو له محملن تضرب مزاميره

صقر:

أنا جيشي الى شفته وقفت وخبث لي ماطاب
شحمهن راح والمطراش ريٌضت محاديـره
الايازين حدرتهن مع الباطن لهن ضبضـاب
إبلا عشيت في روض تشوقني مخاضيـره

ابن شريم:

الا يالله يامزبان مسكين نصـاك وتـاب
مقاصيده بوالي العرش ماله مقصدن غيره
ختمناها عدد ماسهل المولى وصك الباب
ترى للشي زبده والبلد يعـرف بتسعيـره

* المصـــــدر : ديوان الشاعر سليمان بن شريم رحمه الله .


مدونه لكل شاعر

الشاعرالكبير عبدالله بن عبدالحمن اللويحان وشهرته (لويحان) من قبيلة بني تميم ولد عام 1312 هجري ببلدة نفي في نجد توفي رحمه الله عن عمر يناهز التسعين. له ديوان يحمل اسم (روائع الشعر النبطي)، له العديد من المحاورات وكثير مايستعمل اسلوب الكنايات والمجاز والتي تدل على عظمة شاعريته.

الشاعر الكبير صقر بن مسلم بن زيد النصافي الرشيدي من قبيلة بني رشيد ولد عام 1302 هجري يعتبر من فحول الشعراء وله العديد من القصائد. والمحاورات الشعرية مع الكثير من الشعراء المعروفين مثل سليمان بن شريم وسالم الدواي ومرشد البذال. وتوفي في الكويت 1372 هجري .

سليمان بن شريم عاش بالقرن الرابع عشر الهجري. ومتمكن من الشعر جيد العبارة يمتاز بقوافيه الموزونة ومعانيه القوية كثير الأسفار بحياته والتي كان لها دور في حياته الشعرية


ولكم مني الشكر والتقدير[