محمد البرقي تهيض بونّه=في مسجد الحمّه مداهيل الاجواد
صليت لي فرضٍ وخليت سنّه=شفقٍ على هراج مركوز الانهاد
الحال ونات العشي كملنَه=والجوف تومي به خفيفات الانواد
لي صاحب وادي الدواسر مغنّه=في ديرة فيها نفانيف وبراد
من حدّر الوادي لقا فيه جنه=ومن سنّد الوادي لقا فيه الاجواد
الله علم عن صاحبي ويش ظنه= لا يحسب ان الحب يمحاه الابعاد
لابد عجلات الركايب يجنه =في ساعة والناس في النوم هجاد
الحق والمفرود ما ياصلنه=كود حرةٍ يبري تعبها التجلاد
وجدي عليهم وجد من هملنه=عيرات الانضا لا شراب ولازاد
او وجد سرحانٍ ليا حيّزنّه=سحم الضرايا واصبح الصبح ماصاد
او وجد من خلي بحدبا مجنه=لاجاه زوار ولاجاه رواد
على وليف كن براق سنّه=شهلول برقٍ خِيلت عقب رعاد
قلبي عليهم يقرع اقراع شنّه=يلعب بها الركبي مع كل وراد
شبهت خلّي غرسة مستكنه= او بكرة عفرا مقاديم الاذواد
ما انساه كود الخيل تنسى الاعنه=والحضر والبدوان ينسون الاعياد
ريحه زباد من سويقه مغنه=تلفي به الحجاج من سوق بغداد
ازميّمه في سلة الخشم كنّه=يشدي زهر حوذانة غب الارثاد
شبه الغزال اللي التواصيف منّه=خذيتها غصب على كل حساد
خذيتها في الليل يوم احجبنه=فوق الذلول اللي زهت خرج وشداد
يوم القيان السود قد قرننه=شقر عكاريشه على الصدر وراد
وزبنت به ربعي حداد الاسنه=جمع البروق اللي على الهوش وراد