يـا راكـب اللـي ربعـت بالغبيـة = اربع سنين معشبـة تقنـي الحـال
يا ما الاباهـر كـرب الجلـد نيـه = وحدر الدفاين صار له حقف وظلال
وترا الشحم دايـم يعثـر المطيـة = ادرا عليها عن بعض مشي الاسبال
امـا هـدد والاطـوت مـن يديـه = لياما بعيد الدرب ينقص من الحـال
ولا هـي عسيـف توهـا عيهليـة = حال عليهـا فرغـت قدمهـا حـال
هي منوة اللي ضارب صـوب نيـة = شف الهوى ماضي لها جلس وحيال
تلفي لريف الضيف واهـل اليديـة = حماية التالـي وماضيـن الافعـال
تلفـي للايـدا راعـي الشاذلـيـة = اللي مناخه لاهـل الهجـن مدهـال
وان قطب الدخـان فـي كـل هيـة = يشدا ربـان بـه هماليـل وخيـال
زبن الحصان ومـن جـواده رديـة = في حـزة مـا فيـه منـع وعـذال
ترعى به القطعـان مـع كـل نيـة = وكم من عقيد جـا يبيهـا ولا نـال
تلفي محمـد شـوق جثـل اللويـة = اللي لضيفه يرهن الـروح والمـال
يا ريف من تقصر عن المـا دليـه = ويا ريف اهل هجن من البعد قفـال
يقعـد العانـي بنـفـس رضـيـة = شيخ الشيوخ ووافي كـل الاكمـال
والا لبـن هـزاع زبـن الونـيـة = مروي المصقل فوق شهبات الاذيال
اهل الصخى واهل الوجيه الفضيـه = وعقبان نجد اللي على ماض الاجيال
ونعم لابـن مجـلاد ونعـم لحيـه = سواقـة العطفـة وحمايـة الـذال
يا ما ارملوا من عين بنت غضيـة = خلوا محاجرها على الشوق همـال
سعـران وقـت الديـن والجاهليـة = مثل الحيا تنجع له النالـس حـوال
اللي عطى من حـر مالـه حذيـة = عوص النجايب موصلات عن اللال
ويا ما عـزل مـن عاقـر اجنبيـة = بالسيف تاتي واشقر الـدم شـلال
ومثـل المهـادي صابـر بالخفيـة = يرفا لجاره صيفـة العـش بظـلال
اودع لـه الدنيـا رخيـص غليـه = ويرفا خماله لو بدا فيـه مـا قـال
وابـن مهيـد مـعـزب الآهلـيـة = اللي يصوت بالعشـا وابـن هـذال
يا ريـف ضيفـه بالقـرا والتحيـة = قولة هلا يا مرحبـا مالهـا ابـدال
شوق الهنوف اللـي تـردع شفيـه = اللـي نهـوده قعـد تقـل فنجـال
وخيال وضح فـي فيـاض عذيـة = وليا مشت وسط الدبش تعجب البال
ومن مثل ابن شعلان جزل العطيـة = يا ريف هجن للمسا عقـب مقيـال
بيته محل الضيـف والا قعديـة = ويقلط الترحيب فـي سهلـة البـال
وعقيـد عيـرات تبـوج الـدويـة = ويثني بيـوم فيـه عـدل وميـال
يثني ليا ذهل الخوي عـن خويـه = وليا غدا الصابـور مشيـه تعـزال
ونعم العواجي يـا عقيـد السريـة = وعقيد قـوم تـدرق فيـه الانـذال
يفـوز بالرجلـي وراع المطـيـة = ولا حـط دون البـن قفـل وكيـال
ونعم بكم يـا عنـوز بالذكـر ليـه = يا عنوز مانتم للردى بيت مدخـال
ولا اسبكـم والله رقـيـب علـيـه = النور في وجه الفتـى سـرج دلال
تمت وصلـى العبـد علـى نبيـه = وصلوا على المبعوث عاقل وجهـال