عوج الحنايا و الخطا و المعاذير=و الرفض و انواع القبول و عطاها
و الحب و الشوق و حلول التباشير =و الحل و التفكير لحظة عناها
كلمات توحي بالفرح و التحاذير=متعاكسه و الحب يمسح خطاها
بنت ٍ ليا من قلت اشوفك على خير=ترد لكن حسبي الله علاها
تنوي بي الوقفه على حفة البير=لا و اعنا روحي الا واعناها
ليا سلهمت ثم قالت الموعد عصير=و انا على الموعد شقاي بشقاها
ثم الحقت قولت ترا الموعد آخير =و الدمع همّل من سماي و سماها
مسافره ما بين هاك المشاوير=و القلب لا راحت تقفّا وراها
طبت معاليقي و تاثيرها غير =الا بعد غير البشر في حلاها

تعرا ياحزن و اكشف ستار الظلم والدهشه=وانا بكشف لك دموع الغرام اللي تواسيني
تعبت اصبر وانا اشوف الحنان يذوب في نعشه=وضيقة صدري بداعي علاقتها تعزيني
كذا ياقصة الحرمان و الهجران والوحشه=كذا ياقصة الجرح الغبر مابينك وبيني
يميني تبرك لجرحك و تطعن صدرها رعشه=واشوف ان اصدق التعبير دمع طاح من عيني

الشقا و الجرح و احزان الغرام المرّه=رافقتني من عرفت الحب و المحبوبه
كاتب الله .. قلبي المجروح يكشف سرّه= ما ملكت الصبر و افراح الغرام اكذوبه
اسمعي يا ام الخدود الحلوه المحمرّه=اشهد ان الحب ظالم مثل ما قالو به
ودي اعرْف وش سبب كره الزهر للجرّه=جاوبيني يا عذاب العاشق و مكتوبه
ارتخي لمواصلك و استلهمه و ابرّه=حتى زولك كل ما مر اتوجه صوبه
صارحيني بالغلا يا منيتي لو مرّه=و ابشري بالحب و الاخلاص يالحبوبه
يا دواليب الزمان العسره المنفرّه=ما رحمتي شاعر ٍ تصعب عليه التوبه
ماجهلت الا متاهات الغرام و شرّه=و لاعرفت الا قصيد ٍ زفرته منكوبه
حبي الاول دروبه مهلكه مقفرّه=ودونه اسوار ٍ بناها الشرع طوبه طوبه
شاعِرِك يا اغلى الخلايق كل شي ٍ غرّه=حتى غابت شمسه و عاش الزمن بغروبه
ساعة الفرحه بعينه ساعة ٍ منغرّه=غطرستها تقهر شفاه ٍ فرحها اعجوبه
يا حياتي رحت لكن جيت اعيد الكرّه=و اسمعي بيت ٍ بقى ما صغته امن اكذوبه
كل ما يطري رحيلك و الظروف المرّه=ينهمر دمعي و اكفّه ثم يرجع نوبه