أهلاً وسهلاً سامعي والمشاهد=وخذ آخر الأخبار بعد آخر الليل
تفجير واستنكار وجروح واجد=وارهاب عقب الأمن عزله وترحيل
وأفراح عمت والحزن خص واحد=هذا هو الموجز وجتك التفاصيل
البارحه محسود من فعل حاسد=فارق مناة الروح ذاق البهاذيل
قلبه تفجر عقبها صار فاقد=فاقد حنان وعطف واحلى التماثيل
النار وسط الصدر والقلب واقد=ودموع عينه طول ليله هماليل
باسباب عاذل في دجى ليل هاجد=دربل على قصر الهوى بالدرابيل
خطط على انه مايطول التواجد=وانه يبدل هالفرح بالمواويل
إرهاب للعشاق من قلب حاقد=إرهاب ناقص بوش وبلير وارييل
صوب وصاب وصار بعد وتباعد=واستطرد العشاق شجب وتحاليل
وصار الفراق اللي بلا وعد واعد=في ليلةٍ ماقبلها وبعدها ليل
قصر المحبه صار بنيان هامد=نتج عن اثره فقد كل المحاصيل
الحب..والاخلاص..واحساس وافد=والحلم..والآمال..وعهد المواصيل
وشعوريصدر عطف..وشعور وارد=والذكريات..وجمعهم..والتعاليل
الحب مات وصار وسط اللواحد=وخلف جروحٍ دمها يشبه السيل
ترسم معاني حب مع ذل خالد=وان الهوى في جنته ينوجد ويل

بقلم:عبدالله بن مطلق العجلان