شيخات قصيد عنزة
هذه القصيدة من شيخات عنزة وسميت بهذا الاسم نسبة الى شاعرها الشيخ والبطل والقائد الشجاع مشعان بن مغيليث بن هذال رحمه الله ( ت 1240 ) وفيها يذكر سبب رحيله ونزوح قبيلة عنزة من بلاد نجد ثم عودته لها لحمايتها من الاجناب وذكر فيها الديار التي سكنها في الشمال وهي تعتبر وثيقة تاريخية للقبيلة عموما ....
يالله يـا مديـر الهبايـب والادوار=شانك عسى تصريف شانك لنا خير يالله يـا عالـم خفيـات الاسـرار=يامعتنـي بالخلـق وال المقـاديـر قلته ونوم العين عن جفنهـا طـار=والقلب كنه فوق حامـي المجاميـر جانا الخبر يالابتـي وليـت الـدار=سكانها الاجناب هـم والبقـاقيـر من عقب ماحنا بها مثـل الاسـوار=نامر وننهي نحمي الجـار ونجيـر من عقب ما كنا بنجد كمـا الطـار=نقطع بها شر وناصـل بهـا خيـر حنا الذي ترجع لنـا كـل الاشـوار=لاصار بالقـالات شـوار ومشيـر حامينها في لابـة تسقـي الامـرار=عدوهـم مـا يحتسـب للمخاسيـر لابد مـا ناتـي لا بـانـات زوار=باسلاف عجلات تعـدا المضاهيـر يهومن هومات بعيـدات واعسـار=وكم ذيرن من غافـل مابعـد ذيـر وكم فاجن العدوان غرات واجهـار=الى انتون كم يسبقن مـن معاميـر ظعايـن حطـن ملـكٍ بسنـجـار=وبنن على الخابور زين الدواويـر وتواهلن الزور حصـن لهـن كـار=ومن البطين الى الرها لـه معابيـر وكتن مع الحاوي وداجن بالامصـار=وجابن خفارتهـن بفكـر وتدبيـر وحطن على السلمان طيحات الامطار=وصارت لهن لينه وخضرا مصادير ومالن على رجم الهيازع وسنـار=وجابن حلال المحمره من ورا النير وراجن على الشنبل وداسن الاخطار=وهدن بها العاصي بيسـر وتيسيـر ثم انتحن مـع كفـة الشـط عبـار=وهاجن وماجن فوق روس العناقير واقفن وكالن من شثاثـا بالاسعـار=وحطن لملـوم المسمـى مسابيـر واقطعن ينون الخطايـط والاقفـار=وكم طيرن جول الحباري مخاميـر وخلن فوق الشبك عج الرمك طـار=وحلو هاك اليـوم خـز المعاشيـر واركن على ورد الدجاني لهب نـار=وغدوبها الويـلان مثـل المداويـر وشدن وحطن الثمامـى بالايسـار=وخلن على المطران مثل المعاصيـر سارن بنا الزرفات باقبـال ودبـار=من غوطة الفيحا الى غشلة الديـر نروم من زيـن المنـازل ونختـار=ونستارد الخـوه بحـدب البواتيـر الياما نخونا اللي على نجد حضـار=وجانا كتاب من زبـون المقاصيـر من ماجد ابن عريعر حـر الاوكـار=يقول وليـت داركـم يـا لمناعيـر الشيخ اللي حيف على البيض بالغار=يقول حل بداركـم حـرب ومطيـر وجيناه مثل السيل طمـام الاوعـار=الياما غدت عنه البـوادي شعاثيـر اولاد عـم ولا بنـا قـول شبشـار=وشيخ لنـا عنـده جـلال وتقديـر اولاد عم ومـا حذانـا لهـم جـار=وحنا عليهم نحمي الجـار وانجيـر حنا شبات الحرب وان شبت النـار=وتوايقـت بيـن الحنايـا الغناديـر حنا بنـي وايـل بعيديـن الاذكـار=اليا تناخـوا بالجمـوع المشاهيـر حنا هل الجمع المسمى اليـا سـار=بمركاضنا يشبع به الذيب والطيـر وين انت ياللي تايهه منك الابصـار=جيناك حوله من شثاثا وابـا القيـر هج الحريبـي مـا لقينـاه بالـدار=زبن على الحره وذيـك الشناخيـر باغي عليهم صايرن مثل ما صـار=ذبح الشفايـا واغتنـام الخواويـر كسيرة مـا قـط ذكـرت بالاذكـار=فيها القلايع مثـل روس الخنازيـر صحنا عليهم صيحة باللقـا الحـار=حتى جبرناهم عـن الـدار تجبيـر لولا شفاتي فيـك يانجـد مااحتـار=فكـري ولاكثـرت علـي التفاكيـر لولا شفاتي فيـك ماجيـت مـرار=نادى نذيرات الهواجيـس وانديـر واندير حيـلات بالاريـا وتبصـار=وارجي من الباري عساها مسافيـر نجـد جفتنـا وكـل دار لـنـا دار=ماهي معافه ميـر جـوع ومداهيـر قطعاننـا ترعـى زماليـق نــوار=اليامـا غـدا فـوق الاباهرقناطيـر مابيـن مسنـاد ومابيـن محـدار=ياما قطعنا بدربنـا مـن مشاويـر وياما ركبنـا بالسرا قـب الامهـار=وعيرات الانضا كنهـن السنانيـر نعتاض عن دار عليها الدهر جـار=ديد العسل فيهـا تعيـش المفاقيـر مثل المسوح اللي ترزم على حوار=دار مريه بالشتـا تسمـن الضيـر دار بها بالقيض غـدران وانهـار=والتمن المجروش ملـي الجواخيـر وصلاة ربي عد مـا بالسمـا طـار=وعداد ما وردن ظمايا علـى البيـر على الرسول المصطفى سيد الابرار=نور العباد اللـي يشيـع التباشيـر وسلامة الجميع |
من شيخات قصيد عنزة ... الشاعر مقحم النجدي الصقري رحمه الله ..
هذه إحدى شيخات قصيد عنزة و دررها الثمينة وهي للشاعر مقحم بن محمد النجدي الصقري من العمارات من عنزة رحمه الله وسميت بالشيخة لاشتمالها على كثير من مفاخر قبيلة عنزة وأخلاقها الفاضلة التي عبر عنها شاعرها .. وهذه القصيدة التي قال عنها ابن علي حاكم حائل ( وفي رواية ابن رشيد ) : " لو كانت هذه القصيدة لشمر ما تحسفت على شيء من القصيد " وهذه القصيدة يختلف الرواة في ترتيب أبياتها تقديما وتأخيرا الا انها ثابتة الرواية .....
يالله يالمـطـلــوب يـــاوال الاقـــدار=انــت الــذي مــدات جــودك لـطـيـفــه من البارحة بالقلب هجـس ٍ وتعبـار= هجـس ٍ وهاجـوس ٍ تعاقـب نـكـيـفــه الصبر مفتاح الفـرج هـو والافكـار = من لاصبر تصبـح حـوالــه كـسـيـفــه يالله يالـمـعـبــود عــاون هــل الكـــار = تــحــل شـــدات عـلـيـهـم كـلـيــفــه اللـي مجالسهـم بهـا بـن وبهـار= ونـجــر ٍ يـصــوت لـلـمـسـيــر رجـيـفــه ومكارم ٍ للضيـف عجـلات وكبـار =ومـفـطـحــات فــي صـحــون نـظـيــفــه تقليطهـم للضيـف قعـدان وبـكـار= وحيل الـغـنـم وقـت السنيـن الـحـفـيـفــه اكرام ضيـف البيـت حـق وتعبــار= والـكــل مـنــا يـفـتـخــر فـيــه ضـيــفــه يا مزنةٍ غــرّا مـن الـوســم مــبـدار = اللـي جـذبـنــي مــن بـعـيــدٍ رفـيــفــه هلت مـن القبلـه هماليـل الأمطـار= مـن سـيلهـا الــوادي غـدالـه وحـيـفــه تمطر من الهدرا اليـا خشـم سنـار= وتسقـي ديـار مـحـقـبــه والـحـتـيــفــه وتضفي على كل المفالـي والاقطـار= وتصبح بهـا خــدان ربـعــي مـريـفــه عقب الحيا فاحت بها ريـح الازهـار=وتعاقـب الـنــوار مــثــل الـقـطـيــفــه وترعا بها الغرا وتبنـي لهـا طـار =عقب الضعــف راحــت ردوم مـنـيـفـــه اذوادنــا مـايـرتـعــن دمــنــة الـــدار = ولا يـرعــن الا بـالـفـيـاض النظيـفــه يرعـن بعـبـدالـلـه وجـبــر ٍ وجــبــار =خـيــالــة يـــوم الـمــلاقــا عـنـيــفـــه ترعـى بها الوضحا من الذود معطـار =غبوقـة الخطـار عـجــلٍ عـطـيــفـــه يبنـي عليهـا بنيـة اللُّبْـن لجــدار =عـقـب الـضـعــف راحــت ردومٍ مـنـيـفــه اذوادنـا يرعـن بنـا سـر وجهـار =من دونـهـن نــروي الـغـلــب والـرديـفــه ترعى بضف الغوش بقصاف الاعمار= تقطف زهر مرباعهـا مـع مصيفـه ما هي سوالف مسرد ٍ عقب ما نـار = اللي هرب واطراف رمحـه نـظـيـفــه إن سوهجوا عنهـا قليليـن الابصـار= من دونها نـروي السيـوف الرهـيـفــه ان سوهجوا عنها معاميس الابصـار = حنـا نـرد اللـي يـبـيــهــا نـكـيــفـــه خطو الولد مثـل البليهـي اليـا ثـار=زود ٍ على حمله نـقــل حـمــل ألـيـفـــه بشدا هديب الشـام شيّـال الاقطـار= واليـا كـبــر حـمـلــه تــزاود زفـيـفـــه وخطو الولد مثل النداوي اليـا طـار = صيده من الجزلات ماهـي ضعـيفـــه ترجي العشا من مخلبه وقـع وطيـار= حسه على صيد الخـلا لـه وحــيـفــه وخطو الولد يصبر على موتـة النـار= صفـر علـى عـود تضـبــه كــتـيـفـــه وخطو الولد يامال قصـاف الاعـمــار = لانـافــع ٍ نـفســه ولا مـنـه خــيــفـــه ورجل ٍ بلا ربعه على الغبن صبــار= يمنـى بلا يـسـرى تـراهـا ضــعـيـفـــــه واليا بخصته ماسـوى ربـع دينـار = مع العـرب يشبـه خـطــاة الـهـــديـفــه حنا فريـق ولا نغبـي سـنــا الـنــار=مـا نـنــزل الا بــالــديــار الــمـخـيــفــه ودار ٍ به الحقـران ماهـي لنـا دار= حتيش لو صــارت خـصــاب مـريــفـــه وحنا لك الله مـن بعيديـن الاخبـار=والنفس مـا نلحـق هواهــا حـسـيــفـــه حلويـن للصاحـب وللخصـم قهــار = وعـدونــا لــو هــو بـعـيــد نـخــيــفـــه حنا كما المشخص عن الصرف ما بار =بالوزن يرجـح والمصـاري خفـيفــه وتلقـى منازلنـا رفيعـات واخـيـار = والرجل عن دوس القصايـر حـفـيــفــه لابـد مـا نـسجـلهـا تواريـخ واذكـار = وتبقـى لـدسميـن الشـوارب وظــيـفــه الا ومـع ذلـك لــك الـلـه لـنــا كـــار = عــن جـارنــا ماقـط نخفـي الـطـريـفــه نرفا خمال الجار لو هـو بنـا بـار = ونضحك حجاجـه بـالـعـلــوم الـلـطـيـفــه ولا نبدي الخافي لاصار مـا صـار = وندمح خمال الـجـار لــو بــان حـيـفــه ونرفا خمالـه رفيـه العـش بالغـار =ونودع لـه النـفــس الـقـويــه ضـعـيـفــه والجار له قيمـة وحشمـة واعتبـار=وجارتـنــا عــن كــل عـايــز عـفـيـفــه ما زارهن مـن يـبـغــي الحـيــف زوار=الا ولا عـنــهــن نـــدس الـغـريــفــه نـبـيــه إلـيــا بــدل الـــدار بــديـــار= وكــل بـجـيـرانــه يــعــد الـوصـيــفــه نكرم سبال الضيـف حــقٍ وتـعـْبــار = لا مــن ولــد الـعـفــن شــح بـرغـيـفــه أحد ٍ علـى جـاره بختـري ونــوار = و احـدٍ عـلـى جــاره صـفــاتٍ مـحـيـفــه وصلاة ربي عـد ماخضـر الاشجــار =على الرسول اللـي عـلـومــه شـريـفــه وسلامة الجميع |
من شيخات قصيد عنزة ... للشاعر الحكيم محمد الدسم رحمه الله....
هذه القصيدة من شيخات قصيد عنزة وهي للشاعر الحكيم محمد بن حسين الدسم السبيعي رحمه الله وسميت الشيخة لاشتمالها على العديد من الحكم والوصايا التي أوصى بها الشاعر أخاه
يـا خـوي لك عندي وصــاة مصيـبـه=ترا وصاتـي تلمس العقـل وتصـيـب إقضب وصـاة اخــوك مـابـه معيـبـه=وصـاة اخـوك مكمـل العقـل ومنيـب إفطـن لوصاتـي كـان عقلـك يصيـبـه=يكـفـيـك شرالـبـالـيـات الـحـراديــب اخــاف امــوت ولاذرا تلـتـجـي بـــه=تـوزا لضنكـات الـدروب الضنابيـب اول وصـاتــي بـالـفـروض الاديـبــه=صيـام وصـلاة وفعلـهـن بالمواجـيـب وثـانـي وصـاتــي بالأمورالصعـيـبـه=إحسب لها من قبـل هـون ٍ وتصعيـب جــرحٍ عـبـي لــك مايكـلـف طبـيـبـه=مــاشــي ٍ الامــاضــي بالـتـجـاريـب ابـيـك تــذرا عــن بـلـى كــل ويـبـه=يصيـر بـك عقـل وكـمـال ٍ وتـوديـب والاالـمـدبـر كـايــنٍ مـاحـكــي بــــه=ماينمـحـي شــي ٍ مــن الله مكـاتـيـب هــــذي الـدنـيــا ومـاتـعـلـم بـغـيـبـه=ولايعـلـم الا صـاحـب العـلـم بالغـيـب وثالـث وصاتـي تلعـة ينـعـدي بــه=تـلـقـى علـيـهـا بـيّـنـات المـكـاريـب اللـي سكنهـا ذيـب مــن بـطـن ذيـبـه=ولايقـربـه يـاكـود ذيــب ولــد ذيــب هـذاك تـره العـرف مـن قـبـل ريـبـه=راعـيـه لايطـلـب ولالـــه مطـالـيـب ورابـع وصاتـي كثـرة الهـرج خيـبـه=تـرا كثيرالهـرج مسمـوك ومخـيـب لاصــار ما تـجـيـب العـلــوم الغـريـبـه=وعند الرجـال ترتـب الهـرج ترتيـب وخامس وصاتـي خفـة الرجـل عيبـه=من راكض الفرقان يركض له العيب لاصـار ماانـت بحاجـة ٍ لــك تجيـبـه=إفطن للزومـك كـان ماجـاك او جيـب وسـادس وصاتـي شرهـا ينحـري بـه=تـرا العلـوم الخايـبـه مابـهـا طـيـب درب الـزنــا والخـايـبـه والقـريـبـه=هذيـك عنـدي مـن كـبـار العـذاريـب قصـيـرك الـلـي مايصيـبـك يصـيـبـه=وصى بـه الله لا تحسـف بـه الطيـب حــق ٍعلـيـك تـــزود الـقــدر هـيـبـه=الياما يـروح بـزود حشمـه وترغيـب وسابـع وصاتـي وان بـدا فيـك سيبـه=وتقدر على حوش الثمـن والمطاليـب إشفـق علـى بنـت الـرجـال العريـبـه=شرايـهـا يصـبـح بكـيـف ٍ وترغـيـب واللـي شـرى بنـت الـردي والهليـبـه=اصبـح بهـم ومجنـب الربـح تجنـيـب وثامـن وصاتـي عـن مناقـر شريـبـه=لاصـار ماهـو مـن وسـاع المشاريـب أخــاف هــو يـبــلاك اوتبـتـلـي بـــه=يـجـلا حديـكـم يــم ديــار الاجانـيـب وتاسع وصاتي وان بـدا بـك مصيبـه=وبـلاك ربــك وابتـلـوك المغاضـيـب بـالـك تمـضـي مــن تسـمـى غلـيـبـه=ارق وتبيـن عـن لـحـاق المشاعـيـب وازبن على حصن الرجال الصريبـه=عـدك بعيطـا عـن سـمـوم اللواهـيـب ومن عاذ عن الشيطان حقه غـدي بـه=ومن هاب هوزات المغاضيب ماهيب وعاشـر وصـاتـي بــه معزه وهيـبـه=عليـك بسفـن البر حـرش العراقيـب لا يـغـديـك الـزبــد هـــو والـرويـبـه=تنهـج تعـوش الضـان وتخلـي النيـب راعـي الغنـم يشيـب مـن قبـل شيبـه=والبـل معــز ٍةتجـلـي الـهـم والشـيـب ولوإشلـهـب الـوقـت لـوهــو حلـيـبـه=تلحـقـك لايــام الـطـرب والتعاجـيـب ومعـي وصايـا غـيـر هــذي عجيـبـه=والكـل منهـن تبهـج القـلـب وتشـيـب والكـل منـهـن يــوم تـبـرق مصيـبـه=والـكـل منـهـن يلحـقـنـك مشـاعـيـب الضيـف ضيـف الله وصــى حبيـبـه=حـق عليـك بـزود حشـمـه وترحـيـب وقلـط مـن الميسـور ومـاهـان جيـبـه=وإحلف ور االميسـور ديـن المعازيـب وراع النقـيـلـي لاتــنــازل شـعـيـبـه=مايستحي مـن حكيـة الكـذب والعيـب حـكـاي وجهـيـن(ن) وجــذاب غيـبـه=حكـاي وجهيـن(ن) يحـش العراقـيـب يودعك بالسيبـه تـروي العجـز خيبـه=ارد الرجـال اللـي يسمـونـك السـيـب إشفـق علـى السقمـه ولوهـي صعيبـه=لومطلـبـك عـــزم تـنــط المـراقـيـب تــرا كثـيـر الـمـال كـــل ٍ حبـيـبـه=ويقال له فت جاي لـو ماعمـل طيـب وتـرا قليـل المـال شـنٍ رمــي بــه=عنـد الرفاقـه صايـر ٍ بــه عـذاريـب واحــذر تــر الحـكـام بـزمـل منيـبـه=يتحدرجـون بغيـر صـوت وتـذ نيـب اهــل خـفـي وغيبـهـم مــا دري بـــه=وبهـم نكـال وقضـي لازم وتـود يــب لاصــار مـاحـد الـثــلا ثـــة تجـيـبـه=وش لك بهم والدرب شـرق وتغريـب خـويــك الـلــي بالخلا تـبـتـلـي بــــه=خـيّـال والافــوق عــوج المصالـيـب او زاد هــذلــوف ٍ بـلــيّــا نـجـيـبــه=او حرمـة ٍ يبلـى بـهـا عـالـم الغـيـب وسلامة الجميع |
رد: من شيخات قصيد عنزة ... للشاعر الحكيم محمد الدسم رحمه الله....
الشاعر والراوي المميز : خلف الغريب
كل الشكر والتقدير لك على اضافة هذه القصائد التي تعتبر من شيخات القصيد ويفترض ان يجدها الباحث عنها في منتدى ويلان لن توفيك العبارات حقك في ما تقدمه لك كل الشكر والتقدير |
رد: من شيخات قصيد عنزة ... للشاعر الحكيم محمد الدسم رحمه الله....
الشاعر والراوي المميز : خلف الغريب
بيض الله وجهك كفييت ووفيت |
رد: من شيخات قصيد عنزة ... الشاعر مقحم النجدي الصقري رحمه الله ..
اقتباس:
خلف الغريب احسنت بارك الله فيك |
رد: من شيخات قصيد عنزة .... الشاعر الشيخ مشعــــان بن هذال رحمه الله ....
اقتباس:
خلف الغريب الله يسلمك و احسنت بارك الله فيك |
| الساعة الآن (03:11 AM) |
Powered by vBulletin® Version 3.8.7
Copyright ©2000 - 2024, Jelsoft Enterprises Ltd
شركة استضافة:
استضافة
رواد التطوير
مايكتب في هذا المنتدى لايعبر بالضروره عن وجهة نظر ادارة الموقع وانما يعبر عن وجهة نظر كاتبه