يا مرحبا بقدومكم يابو نواف = ترحيبتن تسمو لقدرك جليله
ترحيبتن ريحة شذاها والاصناف= بخور عود مع ورودن جميلة
يامرحبا بك عد ما هل هتاف= اقولها بسمي وباسم القبيله
شعر مشاعر شاعرا يصخر القاف= ذربن لسانه والشعر ينحني له
اقولها مالي مقاصد ولا اهداف= الا فرح باهل الفعول الجزيله
ما اشحذ ملي بطني ولا بشحذ لحاف= ولا قول شعري بالرجال الهزيله
لان الشعر ميزان للطيب وانصاف= ومدحن بغير اهله حرام وفشيله
وانا ترى نهجي على نهج الاسلاف= والنعم ما قوله لنفسن ذليله
النعم شانه يرتفع ببو نواف =ومليار نعمن في حقوقه قليله
عبد العزيز اللي له النعم ينضاف= الشيخ ابن ملحم زبون الاصيله
يا تاجنا اللي نلبسه فوق الاكتاف= يادرعنا وقت السنين المحيله
من اعلام وايل بيرق فوق مشراف=عالي مقامه والشعر يرتقي له
هذا ابن ملحم ياهبا كل خواف=ظله يظلل كل من يلتجي له
ويوم العرب مابين شلفا وسياف= اخوان فضه يحتمون الدبيله
احمول خيل وباللقا تكسر انعاف= ياما ارملوا بسيوفهم من حليله
كم فارس من ضربهم شاف ماعاف= وعدوهم منهم قليلن حصيله
يوم المراجل كسبها بحدبن ارهاف= هم من اهلها ومهي عليهم دخيله
وهم عز مضيومن شكا ضيم وجحاف= وعز الفقير اللي نقص عنه كيله
جديدهم بالطيب للماضي يضاف =رصيد وافر حاضره ينتمي له
بهم افتخر ربعي وراسي بهم ناف= اولاد وايل كلنا من فصيله
واختامها صلوا عدد طايفن طاف= على نبين جاب حق وفضيله