ربيع رووحي
وين انت يانوم ٍ عصاني وانا ابيه =يوم البشر في نومها مستريحه ماغير اسلي خاطري والمشاريه =ولافاد في قلبي كثير النصيحه الشعر صار لصدة الوقت تنفيه=اتعب على نظمه واميزفصيحه وارسل مع الابيات فكره وتنبيه=واكشف ستاره واغتنم واستبيحه ياليلي اللي طال وابطيت ساريه=من علةٍ وسط الضماير لحيحه اللي نسى ودي وانا دنيتي فيه =انشهد اني صرت بعده ذبيحه اقول يمكن قاسي الوفت حاديه =واخلق له الاعذار لوهي شحيحه جرح بوسط القلب وازريت اداويه=حتى المدامع من صدوده جريحه واللي ٍ سعى بالبعد زانت مساعيه =ماهو خفا لاكن نطقها صريحه ماباقي ٍ باليدْ شيّ ٍ واسويه =ماعدت اميز وش خطاه وصحيحه اشيل همي في خفوقي واداريه =ولاني من اللى ينطحون النطيحه ياخوي لو غيرك جرحني بخليه =واعرّض جروحي لـ نجد الفسيحه همي كبير وحرت انا وين اوديه=ماتنفع الدمعه ولا شيل صيحه سقت البشاير لجل قربك وطاريه=وعودت من صدتك روحي كسيحه دربي على قربك تباعد خطاويه=وان دق جوالك قفلت الشريحه ياخوي عمري راح ماذقت حاليه =وانت ابخص بقسوة زماني وقيحه ياخوي مالي غير ظلك اخاويه=ولالي سوى طيبك ولوزان ريحه لو وصلك يقدر ترى القلب شاريه=ولو الشعر يشكي بكتك القريحه غلاك عندي ماخلق من يساويه =ربيع روحي قحويانه وشيحه وان زاد قلبك في قساه وتماديه =الله على كسرة سنيني يبيحه |
رد: ربيع رووحي
الشاعره القديره
طــيــــف القــصــيــد صح لسانك مدد بلا عدد وكما تعودنا من شاعرتنا الراقيه والرائعه ومن إبداع إلى إبداع ماشاء الله تبارك الله . تعجز الكلمات أمام هذه الشامخه فألف شكرعلى إتحافنا لقد إستمتعنا بها رغم ماتحتويه من آهات وآلام أعانك الله على قسوة الزمن ولكن أصبري أختاه فالصبر مفتاح الفرج . وأحتسبي الأجر عند الله ولك وافر الشكر والتقدير |
رد: ربيع رووحي
هذه قصيدة اعتبرها بصمة شاعرة قوية في جزالتها وروعتها
باختصار هنا شعر نسائي غير تحياتي لك |
رد: ربيع رووحي
اقتباس:
صح لسانك ملايييييييييين تعجز الكلمات عن التعبير لجمال ما قرأته تحياتي |
رد: ربيع رووحي
الشاعره القديره : طيف القصيد
صح لسانك وسلم فكرك على هذا البوح الشعري الممتع ابدعتي .. فشكرا لك |
رد: ربيع رووحي
الشاعره القديره
طــيــــف القــصــيــد صح لسانك مدد بلا عدد وكما تعودنا من شاعرتنا الراقيه والرائعه كل الشكر لك دمتي بخير |
رد: ربيع رووحي
الشاعره القديره : طيف القصيد
صح لسانك على هذه القصيده الجزله ابدعتي اختي طيف فصح لسانك |
الساعة الآن (12:57 PM) |
Powered by vBulletin® Version 3.8.7
Copyright ©2000 - 2024, Jelsoft Enterprises Ltd
شركة استضافة:
استضافة
رواد التطوير
مايكتب في هذا المنتدى لايعبر بالضروره عن وجهة نظر ادارة الموقع وانما يعبر عن وجهة نظر كاتبه