تشبعت نفسي من الصكّات والوقت امتحان = والحمد للي بأمره المسلم يظل ويهتدي
ياكثر ماني باتعزز واجحد طعون الزمان = اللي بعضها ينقض جروحي ويحداها حدي
مالله خلقني للظنون اللي مسامرها هوان = باموت ياخدي ماعنزّتك على راحة يدي
لو كان حزني في زوايا القلب ماخذ له مكان = والدمع يحرمني ملذة مايحل لمرقدي
لابارك الله فالهبوب اللي تغانمني عشان ؟ = ابيح شي ٍ لو عرضته للعرب طاح اجهدي !!
لكن ّ هبّي دام راسي له مع اهل الشان شان = اعصير توه منتهي ! والليل توه مبتدي
ابكرب احزامي واعصب الراس واعن ّ الحصان = وبهد ليل ٍ شرّد اطعونه على البيد اتعدي
أنا سمحت ومملكة الاحلام ماتعطي ضمان = لاصار شفي سرمدي والحلم ليل ٍ سرمدي
وشلون اصدق فلسفة الاحلام واعطيها الامان ؟؟ = والوقت بالصوت يحدي وانا على الصوت احدي !!
غنّى يموت المرء في عز ٍ ولاذل ٌ يٌهان = ( وغنيت له حسبي على الايام والحظ الردي )
انا بشر واحس واحساسي شعوره شي ثان = واحب واكره وابذل ليومي ولااهتم لغدي
واعشق هوى الغربي وذب ّ الصوت في عالي البيان = والذود والمرباع والمرقاب والسير اوحدي
واهيم فالروض الخضر والماء والعود الليان = وارسم طموحي وابني آمالي على سطح الجدي
شاعر وتفسير الخيال أمرّ من مس البطان = واخاف يجرفني شعور ٍ مايفسر واغدي !
ياصاحبي لاعاد تقصاني ترى اللي كان كان = لاتجرح شعوري وانا من جور الايام امحدي
بذلت مجهودي وبار الحظ في جهدي وخان = ولاكل من يجهد يصيب ولا على المجهد فدي
هانت وانا ماني بلوم النفس لافات الآوان = امّا وصلت لمقصدي ! لابد ماوصل مقصدي
ولا انت يغلبك الشعور ورقة احساس الحنان !! = واقصى طموحك وردة ٍ حمرا وتي شيرت وبدي ؟
غاوي وتلعبّك هبوب النود لعب الخيزران = ومنين ماهب ّ الهوى ميّلت يالغصن الندي