ياصباح الفرح والونس عمرك طويل = خيم بصدري وكسر غموض القدر
يكفي إني تسربلت الحزن وسط ليل = وأتحرى يشعشع من خيوطك فجر
والسهر والقهر وإرهاق جسمن نحيل = والليالي وصوت الماء ودق النجر
كلها تجتمع في خاطري ياجميل = وأكتم الحزن وأقنب من صدوف الدهر
ياكليل الفؤاد ويالفؤاد الكليل = أعشقك للثمالة وإنتهاء العمر
فيك شين من الإعجاز والمستحيل = كل ما أمر دربك فاح دربك عطر
في شفاهك عسل وبمبسمك سلسبيل = وفي جبينك ضياءً غار منه القمر
والعيون الوساع تمد طرفن كحيل = يابعد كل عين صار شوفه شجر
والخشم مصقل وأتلاه شذرة سليل = ياعذاب السمر لايادمار الشقر
كل ما أقفيت زم المتن موج الجديل = وكل ما أقبلت زم الصدر ثقل الصدر
واعذابي معك يابو قوامن طويل = عنقك أغرب من الوقفة وأدهى وأمر
لاتنحيت عني صار جسمي عليل = ولا لفيت إسفهليت وبديت أستقر
لكن اليوم غبت ولابقالي خليل = وإنت تعرف غلاك ومابودك تمر
رح عسا الوالي يحفظك وإنس الجميل = وإنس شخصن يودك عاش عمره سهر
بس لاتتهم غيري بليا دليل = مايعرفك سوا أمك وأبوك وعمر
لو تعلمت بأن للحب معنى نبيل = ماتركتن وأنا قلبي على أولع جمر