راكب اللي حسها تسمعه من كل صوب=مثل زلزال الرعد في المزون المظلمه
كنها يوم استدارت وضاقن الدروب=فرخ شيهانٍ على الطلع ينهض مُقدمه
تلها جرج الخواجه ونطحها الهبوب=واعلنوا بطفي الزقاير وربط الاحزمه
من سلايل شايبٍ ماجمع غير الذنوب=والديانة عكس الاسلام ماهي مسلمه
مايعرف يقول هذي شمال وذي جنوب=الدليلة بوصلة والحروف مترجمه
وا هني اللي على رحلته يلقى له ركوب=ان رجع والا توفى عسى الله يرحمه
ان نوى في مشرق الأرض والا في الغروب=المـهــم يـنـفـذ الـلازم اللي يلـزمـه
فاقدٍ لي شيخ قومٍ عزيزٍ ومحسوب=محزمٍ في الضيق يا سعد منهومحزمه
والجفا مابين الاصحاب عيب من العيوب=والصداقة من بنى بيتها ما يهدمه
والغلا والكره ما تسكن الا في القلوب=بس مابه قلب فيه الثنين مخيمه
اتحمل مزح الاصحاب عذبين السلوب=واتخير واكل التمر واطش اعجمه
واعرف الكذبة لا جات من فم الكذوب=لا قعد يرفع لسانه ويرخي برطمه
واقفل الجوال عن راعي الغوج الهذوب=وافصل التعميم عن بيجري واعممه
وزلة الطيب ما تجرح متينين الجنوب=عقب اللي زلةٍ من صحيبه تفحمه
إيه يا ضيدان والناس حارب ومحروب=وانا عارف كل واحد بحبره واقلمه

راكب اللي كنها البرق في عرض النصوب=دايمٍ مسرى الليالي عليه معلمه
بكرةٍ كن خف يدها على الزور مغصوب=لا عقلها اللي عسيفه ماهي بمخزمه
وان تساوت واستعدت لها وصفٍ عجوب=كنها تدي القسم عند قاضي المحكمه
وان رفع ركابها الصوت باسلوبٍ عذوب=ازجلت ماكنها الا هنوفٍ محرمه
وكنها قشعٍ تزبر على صدر الجذوب=لاخذت في صحيح البيد سك ودرهمه
ما شريناها من السوق من جيز الجلوب=من سلايل جيش جدي ذلول مكرمه
تنحر اللي كل ماتبت عيا لا يتوب=صاحبٍ اغليه جدا واعزه واحشمه
صاحبٍ من لابةٍ ما يهابون الحروب=بني هاجر فخر الأمجاد كفو الملحمه
مثل ما تجمع شبابه عتيبه والحروب=بيننا حلف وعهود وعقود مبرمه
كان يا سلطان ناسيه واصياحك طنوب=مرحبا بك وانتبه والدروب ملغمه
والجفا من بين الاصحاب ياالصاحب ماهوب=عيب لاكن غيره العيب يااللي تفهمه
والصداقة كنز ماهيب تسمل سمل ثوب=وللصديق ان صار ما صار ما ذوق لحمه
وله علي ان حده الوقت في الشدات انوب=ولي عليه ان كَره صاحبه لا يظلمه
والرجل لا صار بيته حجر والسور طوب=ما عليه من المنافق ليا رز علمه
عادني من دون روحي ليا شبت شبوب=والا كم وكم دهاني رموزٍ مبهمه
وكم نواني من لصاحيب دجالٍ لعوب=يبي يأخذ خيرة ابلي وانا اخذت اغنمه
ومعرفة بعض الاصاحيب ذنب من الذنوب=علةٍ من علته أون يا مثقل دمه
وعلته ماهي بتنشاف بالميكروسكوب=ودك احياناً ليا طال صوته تكتمه
والرجل لا صار شيخٍ عزيزٍ ومحسوب=استوت زلات رجله وزلات اقدمه
إيه يا سلطان والناس غالب ومغلوب=والأعادي من تحاكى حثينا في فمه