لو مأنتي كنتي نور ..في عالم الليل=ماكان جيتك ليل ..في عالم النور
شرب المصايب ..مثل شرب الفناجيل=دستوركم ..وانا كذا ..دون دستور
أبني مدائن غيم ٍوسط التماثيل=يدور فيها الفكر ..ويدور ..ويدور
كنت ِ لي فيها شجرة ٍ لي تضاليل=وكنت بظلالك ..أصدح الصوت عصفور
وكنت ِ كما انتي ..نافلة كل هالجيل=بالذات لاجيتي لي والشعر ..منثور
وكنت ..بحضورك ..اعصير الغيم واخيل=برق يقول الغيم ..هالحين معصور
وكنت أكتبك بالغيم ..تاريخ للجيل=حتى قراك الجيل ..بسطوري سطور
كانت مدائن غيم ..لو غيمها قليل=فيها ..لقيت الصدر ..كم لملم صدور
وكنتي بها الماء ..والسماء ..اخر الليل=واخر بنات الانس ..تتشبه بحور
وكنتي بها الماء والنفس ..والمناديل=لالامسة ..ماطر سماء دمعي بزور
وكنتي بها ..اللي مايشبه ..بتفضيل=مافيك عن مافيهن ..بشوق ممطور
احيان ..فيها ..عاش كل التفاصيل=واحيان ..عاشته التفاصيل مقهور
كان اوله ..يسأل سوال ..المهابيل=قولي من إنتي ..مابقى اي محضور
وجاه أخره ..فرقىٍ ..تهدهد بها الحيل=الين عاش الصدر في داخل الزور
يافلوة ٍ جتني تفرد ..عن الخيل=ما للخيول اليوم من بعدك ..شعور
ياحلمي ..اللي مات حلم وتأميل=مامني قصور ٍ ..ولا منك قصور
علمتني ..كيف السهر والتعاليل=وعلمتك شلون السهر ..حلم منحور
وعلمتني ..وش تعني كلمة بهاذيل=وعلمتك شلون البهاذيل بالدور
يافلوتي ..جف الحكي ..بالفناجيل=وفنجالنا ..ماهو عن البن ..معذور
امى تجين ٍ بروح فلوة مثل سيل=مر الفياض اللي لها اعوام في بور
وقش بمسيله كل هم ٍ حمل ويل=وانبت بداله يامها ..عمري زهور
والا ..ترى ما عاد ..بي حمل للشيل=الضهر من طول السهر صار مكسور
امى تجين ٍ بكل نورك ..مع الليل=والا أتركيني بليل ..ليلك ..بلا ..نور