°~*¤®§(§ شبـــكة ويــلان العـربـيـه §)§®¤*~ˆ°

كان الفارس الشهير فهيد الفواري من العمود من شمر من اهل الجزيرة بالعراق سمع عن عقاب العواجي
ومافعله في شمر وجاء من الجزيرة رغبة منه في مقابلت عقاب والانتقام منه.
ثم رحل فهيد الفواري الى ديار ولد سليمان غرب حايل واصرعلى ان يقابل عقاب ويقال انه قد نصحوه
بعض عقلاء شمرعن مقابلة عقاب ورفض وكان هناك منطقة خطرة بين القبيلتين وفي نفس الوقت خصبة
مراعيها ووفيرة فقام فهيد الفواري بــ توجيه ابله الى هذه المنطقة والتي تقع غرب ريع المغني جنوب فيضة
ابن سويلم 7 كم تقريباً وتسمى ابواعة والمصيد تشاهدها وانت مع الاسفلت العام
ثم قال فهيد الفواري هذه القصيدة.

انا من العصـلان واصلـي عريبـي = علي بالقفر المطـرّف الـى هيـب
قالوا ابواعـة والمصيّـد خصيبـي = تعكفت جرع المصيّـد مـن الطيـب
وانا على اللـي كنهـا راس ذيبـي = اكحيلة(ن) من محكمـات المجاذيـب
انطح عليها كـل ليـث(ن) مريبـي = واثني عليها دون زمـل الرعابيـب
تلاوحوا من فوق شهـب السبيبـي = خيل(ن) تطارد دون حرش العراقيب
صاح الصياح وحان ثـار المغيبـي = وتسابقـن ريـع المغنـي جناديـب
شهب(ن) عليهن مهزمين الحريبـيا = للي على جمـع المعـادي مهاذيـب

وقد شاهده عقاب العواجي ابل فهيد الفواري وانقض عليه وحصل بينهم كر وفر وحاول عقاب اللحاق بالفواري
الا ان فرس الفواري كانت سريع فصاح عقاب ثم اخمرت فرس الفواري وترجل الفواري على الارض
مستسلم لعقاب وقد اسره عقاب ثم عفا عنه وقال عقاب للفواري الفرس والأبل لنا والزمل خذه يشيل ابوك
عليه اذا رحلوا شمرحتى لايبقى على الدار(المراح) وقد روح الفواري مامعه غير الزمل ثم سئله والده
وين البل فقال فهيد الأبل اخذها الولد اللي يستاهلها فقال والده اخس ذلك سمي الطير فرد على والده بهذه الابيات

يابـوي يازبـن الجـواد الهزيلـه = ان حل عند اقطيّهن ضرب مسنـون
ان جاء نهار(ن) مظلم(ن) مثل ليلـه = ياملحـق اللـي بالمعـارة يخلـون
الديرة اللي اخمـرت بـه الكحيلـه = والله ماتسوى عندنا شرب غليـون
ما اقعد بهـا ياوالـدي ربـع ليلـه = ماهي لنا ديرة عقاب(ن) وسعـدون
دونه عقاب الخيـل يلمـع صقيلـه = كم فارس(ن) من حربته طاح مطعون
وحيـاة منشـي المـزون المخيلـه = ان الجزيـرة مـا لنـا دونهـا دون

ثم بعد ذالك قال سعدون العواجي هذه القصيدة مفتخر بفعل ابنه عقاب

عقاب حق الطلع من راس مرقـاب = خم الفواري يـوم مـاح الجناحيـن
جلاّه من نجد(ن) على غير ماطـاب = وقبله عثا بجموع قـوم(ن) قوييـن
له مخلب(ن) مايقدره كـل مخـلاب = ليث الليـوث الهايجـة بالاكاويـن
نجمه طلع وفهيد نجمه عنـه غـاب = مااسب ذيب الخيل مار السعد زيـن
تعيش ياعقاب(ن) ذعر خيل الاجناب = اهل الرمك من سطوتـه مستخفيـن
ان جاء نهار(ن) فيه وقفات الاشناب = يوم(ن) به يثارون طلابـة الديـن
سيفه بهامـات المناعيـر قصّـاب = عوق الخصيم اليا تعـدى القوانيـن
يلكد على الصابور والجمع ماهـاب = اليا عثى فيهم عثـى فيهـم البيـن
يلكد ملاكيد(ن) لبـا زيـد وذيـاب = ليث السبايا ماضي(ن) له براهيـن
ان مد عقاب الخيل للسـرح جنّـاب = نامت عيون اهل الدبش مستريحين
حنا تنام عيوننـا فـي ذرا عقـاب = واضدادنـا منـا يباتـون سهريـن

ويلاحظ ان سعدون العواجي ماسب فهيد الفواري انما قال بالحرف الواحد
نجمه سطع وفهيد نجمه عنه غاب ما اسب ذيب الخيل مارالسعد زين
ومن عادت الأولين مايسبون الفارس ويذكرون افعاله

من قصايد عقاب ابن سعدون العواجي في بعض فريس شمر
المشهورين والتي حصل معهم بعض المعارك مع فريس ولد سليمان
وحيث ان عقاب مدحهم على فعولهم

إنا جنبها يم شحوا السنا عيس= ,أجنب لها عن الحدب والفواري
على جواد ماغياها هلا بيس = من ساس خيل مدوسين المحارى
تهوي أهواي أمشوهقات القرانيس = أن طالعت عن بعد جول الحباري
عابينها لعدوان وافهيد واجريس = فريس يرمون لعشا للضواري
نبي نطارد كاسبين النواميس = خيالهم ماهو عن الموت داري
أهل الفعول ومتعبين المحا ميس = والكل منهم في افعوله يماري
من دمهم نروي حدود العبابيس = وبيمامنا هدف السيوف الهواري
أن جنهاراً فيه جدع الملابس = والمـنع ماله في هـكا اليوم طاري
في معتلجهن حاضرً حضرة إبليس = صاح الصياح وحان وقت المثاري
من بيننا ضرب النمش له تضاريس = والعمر يرخص بين بايع وشاري
ليه على جدع المدرع ملامس = ومني سروج الخيل تنهج عواري

وحيث ان عقاب مدح فريس شمر مدح يليق بهم حيث قال:

عابينها لعدوان وافهيد واجريس = فريس يرمون لعشا للضواري
نبي نطارد كاسبين النواميس = خيالهم ماهو عن الموت داري
أهل الفعول ومتعبين المحا ميس = والكل منهم في افعوله يماري

وبعدين ذكر فعله وقال :

من دمهم نروي حدود العبابيس = وبيمامنا هدف السيوف الهواري
أن جنهاراً فيه جدع الملابس = والمـنع ماله في هـكا اليوم طاري
في معتلجهن حاضرً حضرة إبليس = صاح الصياح وحان وقت المثاري
من بيننا ضرب النمش له تضاريس = والعمر يرخص بين بايع وشاري
ليه على جدع المدرع ملامس = ومني سروج الخيل تنهج عواري

تحياتي واحترامي للجميع 0وامل ان تعجبكم

وسلامتكم