"العمر رحله " والصبر يُعد نوع من الجهاد = واليأس عن تحقيق حلم يراودك " قلة وعي !
والآدمي مهما وضع خطة لتحقيق المراد = مافيه حلم يحققه إلا بمجهود وسعي
وانا تركت الحلم يغلي فوق " نيران الفؤاد" = وليا طفى " حطبت " من صدري وشبيت اضلعي !!
وقفت من بين "التعاسه" و"الفرح" موقف حياد = وإلا الزمن ماهوب لا ضدي ولا واقف معي
على غرار الجرح وسنين الشقا والاضطهاد = حاولت لاكن ماقدرت القى مكان لموضعي !
كم لي وانا اتابع " مسار الريح " وآحرث الرماد = واضيق لامنه تفجر وسط همي .. منبعي
الحلم لامنه لبس بعد الامل "ثوب الحداد" = ماتستفيد العين لو تكثّر على الحلم " النعي" !
واذا ان صوتي عند غيري ماله اية امتداد = يكفي ليا منه هجر "فمي" ولاذ "بمسمعي"
الشعر عندي مثل ليله من ليالي شهرزاد = رغم انه اذنب في بعض فكري وكدّر مضجعي
وانا ليا مني اعتبرته "نزوه" و "كبوة جواد" = يطري علي اسلوب "ابو الطيب" وفكّر "الاصمعي"
كذا تمرست الادب والفضل من رب العباد = اللي وهبني اجعله خاتم يدور بااصبعي
وماعمر شعري انخدم من كبّر اسمي ...والوكاد = اني بري من تهمة الحاقد ومما يدعي
تركت مبدأ : من يخاف الشمس ينعم باالبراد = واخذت مبدأ : مايقول الرجل شي إلا يعي :
ان الطموح احيان يقتله التغطرس والعناد = باالذات لامن قابله رجال به قلة وعي !!