إذا المراجل لبسـة شمـاغ وعقـال =قـل للعـذارى يلبسـنّ العمايـم
ما عاد يفرق زول حرمـه ورجـال =دام الفعايل تشبه البعـض دايـم
المرجله مـا هيـب كلمـه وتنقـال =وتروح ما راحت هبوب النسايـم
وإلا خشونة صوت أو رفع الأثقـال =أو رزة صـدور وفعـل الزلايـم
ولا هي بعد مفتـاح موتـر وجـوال =وإلا ردى لسانن حديثـه شتايـم
المرجله شيمه عن القيـل والقـال =رفيع نفس (ن ) حر بالجو حايـم
المرجله عقـلٍ وزن وزنـه جبـال =ودون العقل وش فرقنا والبهايـم
يا مسندي لو مايل الوقت بـي مـال =يا ولد أبويه يـا عظيـم العزايـم
يا معرب الجدين من العـم والخـال =يا نخوة المفزوع وقـت الهزايـم
المرجله يا خوي هي طولـة البـال =هي العزم هي الصبـر فالظلايـم
فيهـا الكـرم عـزه دلـه وفنجـال =فيها الكرامه عن ردى الطبع شايم
والدين لامنـه خـذا القلـب منـزال =مشى طريق الحق وابليس نايـم
ومن لا عرف ربه في طيب الحـال =لابد وقت الضيـق بالهـم هايـم
حتى صلاتك مع جماعـات ورجـال =في خيرها يا خوي نعـم الغنايـم
ولامن نصف ليلك قم صفـي البـال =يا عظم أجرك بين ساجـد وقايـم
ولا من رفع ربي له كـل الأعمـال =حسن الذكر لا قالو فلان صايـم
وخلك شريف القصد يا طيـب الفـال =سوء المقاصد فالبيـوت الهدايـم
واحذر تبيع النفس في درب الأنـذال =وتتبع خوي إبليـس راع النمايـم
النفس خيـل لـك إذا كنـت خيّـال =ومن لا قوى نفسه قوته الهزايـم
ولا صرت ما تدري لو يش أنت رجال =والله خسارة فيـك ذبـح التمايـم