لو مات راع الطيب مامات طاريه = والا الردي طاريه ميت وهو حي
مرحوم ياللي له مواجيب تحييه = وسط المجالس سيرته ترسل الضي
من بعد (متعب) مابقى حي نبكيه = كن البشر من بعد موته ولا شي
من طيب ساسه شامخاتً مباديه = ومن طيب رأسه مامشى سكة الغي
اللي علوم الطيب حاضـر لماضيـه = له حكمةٍ مضمونهـا ماهـو شـوي
متعب مدار الفكر هاجس معانيه = صورة خياله فيها الابعاد تشفي
صفحة بياضً عطرتها قوافيه = على الوفا ماهي خيالات منفي
له سيرةٍ مابين ربعه واهاليه = بصدورنا لو غاب تبقى كما هي
وله صورةٍ مافارقت عين مغليه = رغم الفراق اللي كوا مهجتي كي
ياوجد حالي وجد من غـاب غاليـه= وجد الذي ذاق المراره وهـو صِْبـي
راضي على المقسوم والوجد طاويه = همه طواني وانطـوى داخلـي طـي
يالله ياعلام .. ماكان نخفيه = لك أبتهل وادعوك وارفع لك أيدي
يارب تلطف به وترحم وتنجيه = وتجعل مقره بين الانهار والفي
وتجبر عزا ناسً تحبه وتغليه = ياكاتب الآجال .. يالدايم الحي