يابنت لاتبدين بي عيني خيـــر = ترى التأني بعض الاحيان خيره
كتبت لك يابنت الاجواد تقرير = بالاوله والثانيه والاخيـــــــــــره
الاوله تكبير تكبير تكبيـــــــــر = الله اكبـــر كبري ياصغــيــــــــره
والثانيه باقة زهور ونواويــــر = وازكى سلامي للهنـــوف الستيره
والثالثه تحتاج وقفه وتفكيــــــر = كمــــــا يلي تفسيرها ياغــــريره
انتي عيونك للذهب والدنانيـــر = وانا عيوني للعلــــــوم الشهيـــــره
وانتي تصيدين السمك بالقراقير = وانا العقاب اللي بعيد مطــيـــــــره
وانتي على صدرك رسوم ودواوير = وانا على صدري همـــــوم مثيره
وانتي تحبين البحر والنوافــيـــر = وانا هوايه بالخبوت المطيـــــــره
وانتي غرامك في حياة المشاهير = وانا غرامي مادري وش مصيـره
وانتي تخافين الحرس والنواطير = وانا ارتجف من خوف نار سعيره
وانتي تعدين التفاهات تحريـــــر = وانا اعتبرها للصبايا حضيــــــــره
وانتي تحيكين الحيل داخل البير = وانا على قمة بـــــروج منيـــــــره
وانتي اسيره في بيوت الدبابير = وانا اتنقل كــــل يــــوم بـــديـــــره
وانتي على صوتك تهيض العصافير = وانا ورايه صيت قوم وعشيــــــره
وانتي تقولين ادهن السير ويسير = وانا حلفت اني لخــــــلي مسيــــره
مالي ومال المقبله والمصاديــر = ومالي ومال الموبقات الخطيــــره
قناعتي تملي علي المحاذيــــــر = والله يعلـــــم في خفايا السريـــــره