سألتيني عن اسمي وادري انك ماتعرفيني=سألتيني من اي الناس قلت اعلمك بعدين
أنا مجهول ماعندي هويه أو مضاميني=كرهت الحاله وجيتك امارس لعبة الحبلين
عرفت اني من الويلان والويلان تكفيني=وباقي ذكرياتي ماعرفت خيوطها للحين
ولكن عندي احساس انّ حاجه مسهره عيني=ولا ادري وش سبب هذا الشعور اللي يخص العين
احس ان السهر يا بنت من صغري مخاويني=واحس اني تعبت من السفر ومرافق السارين
تعالي شوفي آثار الرحيل معذب يديني=ولا ادري رحلتي هذي بدت والا انتهت بي وين
حياه احسها صعبه واحس بشي مغويني=وانا اللي كل ماجبت القصايد زادو الغاوين
عشقت الضحك رغم انه مخليني وناسيني=عشقت الفرفشه رغم انها صعبه على الباكين
تجاهلت الظروف اللي تنسيني عناويني=وغيرت العناوين القديمه و البشر قاسين
تخيلت الحياه أجمل من ورود البساتيني=حياه مبروزه بالضحك و التنكيت و التزيين
تشوف الضحك بلساني وانا التجريح باريني=اغير موجة الحزن و محطات الزمان الشين
حياه اجمل .. حياه اروع و لكن بينك وبيني=حياتي لغز حيرني و لا حليته امن سنين
صباحي منبع البسمه....مسائي مايدانيني=كذا ذابت حروف الحكي.. محتاره مع الاثنين
تعالي و اسأليني عن مداي و غبرة سنيني=تعالي و اسأليني عن بيوت العز بعد الطين
تعالي و اسألي عني و عن طلعة مجانيني=تعالي و اكشفي سيرة غريب مات من عامين
تعالي ما بكى موت الغريب الا شياطيني=و لا عزا على فقده ولا واحد من الغالين
اجابه ناقصه .. ادري ..و هذا ربع ما فيني=امانه لا تحديني اجيب العلم ثم تبكين