ياكم تمنيت الطفولة حياتي = لا هم لاضيقة ولا به وجع راس
اكبر حدث يمر في امنياتي = لعبة والوانٍ بعلبة وكراس
ما غير اشخبط وارسم احساس ذاتي = من قلب ما يعرف الاعيب جساس
اركض وانا من دنيتي ما احاتي =الين ما يمسي على عيني نعاس
اضحك مع النسمة وهذي صفاتي = معانق البهجة وتغريد الاحساس
اتبع شروق الصدق ما تبع غواتي =وجه البراءة يكسر غيوم الاتعاس
احلم ابكره كيف اداعب كراتي = عايش على قوت الفرح والهنا كأس
ومن هو شريت رضاه يشري رضاتي = من صغري الخوة لها قدر ما يقاس
حتى الزعل يدمح بظرف التفاتي = امدله يمناي واضم الاخماس
واليوم غير بحكم دنيا شتاتي = ما تعرف تميز مضامين هالناس
حقد ونميمة مع سوالف وشاتي = ومعارك الانفس يولد له انجاس
وطرد المصالح صار لحساب هاتي = كل المبادىء ماتت بوسط قرطاس
والكلمة اللي كانت بعهد فاتي =رمز الوفاء ولحكمة الناس نبراس
اظلم عليها كهف نوم السباتي = والله يعلم صحوة صدور الانفاس
دورة حياة ونهجها للمماتي = اما غناة اعمال والا للافلاس
حسن التعامل والادب والصلاتي = ترويض نفس ويذهب الهم والباس
كذا بديت استطرد افكار ذاتي = واحرر الفكرة عن قيود الاقواس

.
.